ភ្នំពេញ៖ ក្រុមប្រតិកម្មរហ័សអគ្គស្នងការដ្ឋាននគរបាលជាតិ បានលើកឡើងថា មានប៉ុន្មានថ្ងៃចុងក្រោយនេះ មានរូបភាពវីដេអូឃ្លីប បុរសស្បែកខ្មៅម្នាក់ ស្លៀកឯកសណ្ឋានទាហាន ធ្វើត្រាប់ផាកពិន័យ អ្នកធ្វើដំណើរតាមដងផ្លូវ ដែលត្រូវបានគេបង្ហោះនោះ មានរូបភាព និងខ្លឹមសារដៀមដាម បន្តុះបង្អាប់ បរិហារកេរ្តិ៍ ដល់សកម្មភាពរបស់មន្ត្រី ដែលមានភារកិច្ចត្រួតពិនិត្យ ការរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោក និងអាចបង្កឲ្យមហាជន មានការយល់ច្រឡំ។
ក្រុមប្រតិកម្មរហ័សអគ្គស្នងការដ្ឋាននគរបាលជាតិ នៅថ្ងៃទី១៤ ខែឧសភា ឆ្នាំ២០២០នេះ បានឲ្យដឹងថា ខណៈពេលដែលការរឹតបន្តឹងច្បាប់ ស្ដីពីចរាចរណ៍ផ្លូវគោក តាមស្មារតីអនុក្រឹត្យលេខ:៣៩អនក្រ.បក ចុះថ្ងៃទី១៧ ខែឧសភា ឆ្នាំ២០២០ បាននឹងកំពុងអនុវត្តយ៉ាងសកម្ម និងម៉ឺងម៉ាត់បំផុតនោះ អគ្គស្នងការដ្ឋាននគរបាលជាតិ សង្កេតឃើញថាមាន ការបង្ហោះព័ត៌មាន តាមប្រព័ន្ធផ្សព្វផ្សាយ និងបណ្ដាញទំនាក់ទំនងសង្គម ជាច្រើនដែលរួមមានទាំងការទិតៀន រិះគន់ ក្នុងន័យកែលម្អ និងព័ត៌មានដែលមានបំណងទុចរិតប្រឌិតរូបភាព និងខ្លឹមសារបង្កាច់បង្ខូចធ្វើឱ្យប៉ះពាល់កិត្តិយសស្ថាប័ន និងមន្ត្រីអនុវត្តច្បាប់។
ជាក់ស្តែងរូបភាពវីដេអូឃ្លីប ដែលត្រូវបានគេបង្ហោះនោះ មានរូបភាព និងខ្លឹមសារដៀមដាម បន្តុះបង្អាប់ បរិហារកេរ្តិ៍ ដល់សកម្មភាពរបស់មន្ត្រី ដែលមានភារកិច្ចត្រួតពិនិត្យការរឹតបន្តឹង ការអនុវត្តន៍ច្បាប់ស្តីពីចរាចរណ៍ផ្លូវគោក និងអាចបង្កឲ្យមហាជនមានការយល់ច្រឡំ។
ផ្អែកតាមការស្រាវជ្រាវរបស់ជំនាញ បានឲ្យដឹងថា វីដេអូឃ្លីបនោះ ផលិតនៅក្រៅប្រទេស ត្រូវបានគេ Uploaded រក្សាក្នុង YouTube ជាព័ត៌មានក្លែងក្លាយ ជាការសម្តែងដោយប្រើប្រាស់ បច្ចេកទេសកាត់តសុទ្ធសាធ និងត្រូវបានប្រព័ន្ធផ្សព្វផ្សាយ និងបណ្តាញទំនាក់ទំនងសង្គម ទាញយកមកបង្ហោះ ក្នុងគណនីផ្ទាល់ខ្លួន ឬ Page ក្នុងបំណងទាញយកប្រជាប្រិយភាព, Likes, Views និងផលប្រយោជន៍ផ្ទាល់ខ្លួន ហើយក៏អាចនិយាយបានដែរថា គឺជាចេតនាទុចរិតវាយប្រហារ បំផុសចលនាប្រឆាំង រារាំងការអនុវត្តន៍ច្បាប់។
អគ្គស្នងការ បានលើកឡើងថា យើងខ្ញុំសូមអំពាវនាវដល់សាធារណជន និងអ្នកនិយមប្រើប្រាស់បណ្ដាញសង្គម សូមមេត្តាពិចារណា កុំបន្តផ្សព្វផ្សាយ (Share) ព័ត៌មានមិនពិតនេះតទៅទៀត ព្រមទាំងសង្ឃឹមថា បងប្អូននឹងប្រើប្រាស់នូវសតិសម្បជញ្ញៈ ប្រកបដោយវិចារណញាណ ជួយដល់សង្គមរបស់យើង។ យើងខ្ញុំសូមអរគុណ និងទទួលយកនូវការទិតៀនទាំងទ្បាយណា ក្នុងន័យស្ថាបនា និងធ្វើការពិនិត្យកែលម្អទ្បើងវិញ ប៉ុន្តែយើងខ្ញុំនឹងធ្វើការស្រាវជ្រាវ ចាត់វិធានការច្បាប់យ៉ាងម៉ឺងម៉ាត់បំផុត ចំពោះបុគ្គលទាំងឡាយណា ដែលមានឧបាយកលប្រើប្រាស់ព័ត៌មានក្លែងក្លាយ ក្នុងចេតនាប្រមាថដល់កិត្តិយស សេចក្តីថ្លៃថ្នូរ នៃស្ថាប័នអនុវត្តច្បាប់ ញុះញង់ រារាំងការអនុវត្តន៍ច្បាប់ បំពុលសង្គម ដើម្បីកេងយកប្រយោជន៍ផ្ទាល់ខ្លួន ឬបក្ខពួករបស់ខ្លួន ឬក៏ផលប្រយោជន៍ខាងនយោបាយ៕ដោយ៖កូឡាប
