អតីតមេបញ្ជាការយោធាអេហ្សីប និងជាបេក្ខជនប្រធានាធិបតីឈ្មោះ Sami Anan ត្រូវបានចាប់ខ្លួន ដោយសារតែ ប្រកាសពីបេក្ខភាពរបស់ខ្លួន មុនពេលមានការទទួល ស្គាល់ពីគណៈកម្មាការបោះឆ្នោត។
ការចាប់ខ្លួនបានធ្វើឡើងភ្លាមៗមុនពេល ការថ្លែងតាមកញ្ជក់ទូរទស្សន៏របស់អគ្គមេបញ្ជាការកង ប្រដាប់អាវុធ ដោយបានប្រកាសថា លោក Sami Anan បានល្មើសទៅនឹងច្បាប់យោធា ដោយបានប្រកាសពីបេក្ខភាពរបស់លោក ដោយមិនបានស្វែងរកការទទួលស្គាល់ពីអាជ្ញាធររៀបចំការបោះឆ្នោតជាមុនសិន។
កងកំលាំងប្រដាប់អាវុធបាននិយាយថា ការប្រកាស់របស់លោក Sami Ananគឺជាការញុះញង់យ៉ាងច្បាស់លាស់ប្រឆាំងនឹងកងកំលាំង ដោយមានការប៉ុនប៉ងធ្វើឲ្យមានការបែកបាក់រវាង កងកំលាំង និងប្រជាជនអេហ្សីប។
យោធាក៏បានចោទប្រកាន់លោក Sami Anan ផងដែរ ពីបទក្លែងបន្លំឯកសារដើម្បីបញ្ជាក់ថា តួនាទីយោធារបស់គាត់បានបញ្ចប់រួចរាល់ហើយ។ ការចាប់ខ្លួននេះ ធ្វើឲ្យមានការរិះគន់យ៉ាងខ្លាំងពីសំណាក់ មនុស្ស និងអ្នកគាំទ្ររបស់លោក។
ចំនែកអ្នកគ្រប់គ្រងការិយាល័យរបស់លោក បានអះអាងបញ្ជាក់ថា លោក Sami Anan មិនទាន់ទាំងបានដាក់ឯកសារសំរាប់ស្នើធ្វើបេកជនប្រធានាធិបតីរបស់លោកទៅកាន់គណៈកម្មការបោះឆ្នោតនៅឡើយទេ ហើយក្នុងការថ្លែងនោះ គាត់គ្រាន់តែបានបង្ហាញពីបំណងរបស់គាត់ក្នុងការចូលរួមការបោះឆ្នោតប៉ុណ្ណោះ។
សូមបញ្ជាក់ដែរថា កាលពីសប្តាហ៍មុន លោក Sami Anan បានប្រកាសថា គាត់នឹងធ្វើការប្រកួតជាមួយ ប្រធានាធិតីកំពុងកាន់តំណែង Abdel Fattah el-Sisi នៅក្នុងការបោះឆ្នោតខែមិនាខាងមុខ។ លោក Sami Anan បានប្រកាសពីបេក្ខភាពរបស់លោកតាម
ទូរទស្សន៏ដោយបានធ្វើការរិះគន់ដល់រដ្ឋាភិបាលបច្ចុប្បន្ន៕ សុភ័ក្ត្រ
