ភ្នំពេញ ៖ ឃាត់ខ្លួនបុរសម្នាក់ បន្ទាប់ពីប្រទះឃេីញកំពុងឈរលក់ថ្នាំញៀន ដោយដកហូតវត្ថុតាង ក្រាមពណ៌សថ្លា (សង្ស័យជាគ្រឿងញៀន) ០២កញ្ចប់ រួចនាំយកទៅស្នាក់ការប៉ុស្តិ៍ ដេីម្បីសាកសួរបន្ត កាលពីវេលាម៉ោង០០និង០៥នាទីយប់រំលងអធ្រាត្រ ឈានចូលថ្ងៃសុក្រ ទី១៥ ខែឧសភា ឆ្នាំ២០២០នេះ នៅត្រង់ចំណុចសំណង់មិនរៀបរយ ផ្លូវ៦០ម៉ែត្រ ក្នុងភូមិព្រែកតាឡុង សង្កាត់ចាក់អង្រែលេី ខណ្ឌមានជ័យ រាជធានីភ្នំពេញ។
ជនសង្ស័យមានឈ្មោះ ចក់ រ៉ាវី អាយុ ២៦ឆ្នាំ មុខរបរ មិនពិតប្រាកដ មានស្រុកកំណេីត នៅភូមិបេង ឃុំថ្មពូន ស្រុកកញ្ច្រៀច ខេត្តព្រៃវែង ។
លោកវរសេនីយ៍ត្រី អុំ រតនា នាយប៉ុស្តិ៍ចាក់អង្រែលេី បានប្រាប់ឲ្យដឹងថា មុនឈានដល់ការឃាត់ខ្លួនជនសង្ស័យខាងលេីនេះ ក្រោមការបញ្ជាដឹកនាំផ្ទាល់ពីលោកវរសេនីយ៍ឯក ម៉េង វិមានតារា អធិការដ្ឋាននគរបាលខណ្ឌមានជ័យនោះទេីប កម្លាំងប៉ុស្តិ៍នគរបាលរដ្ឋបាលចាក់អង្រែលេី ដឹកនាំដោយរូបលោកដែលជានាយប៉ុស្តិ៍ បានចុះល្បាតក្នុងមូលដ្ឋានមកដល់ចំណុចកេីតហេតុខាងលេី ក៏ប្រទះឃេីញជនសង្ស័យឈ្មោះ ចក់ រ៉ាវី កំពុងឈរលក់ថ្នាំញៀនតាមទីសាធារណៈទាំងកណ្ដាលយប់ស្ងាត់ លុះពេលឃេីញសមត្ថកិច្ច ក៏ស្ទុះរត់គេចខ្លួន ចូលទៅក្នុងច្រកដេីម្បីរត់គេចខ្លួន តែរត់មិនរួចក៏ត្រូវបានកម្លាំងសមត្ថកិច្ចរត់ដេញតាមចាប់ឃាត់ខ្លួនបាន និងសុំធ្វើការត្រួតពិនិត្យឆែកឆេរ រកឃេីញក្រាមពណ៌សថ្លា (សង្ស័យជាគ្រឿងញៀន) ២កញ្ចប់ ទេីបឃាត់ខ្លួនយកមកធ្វេីការសាកសួរនៅប៉ុស្តិ៍នគរបាលចាក់អង្រែលេីតែម្ដង។
នៅចំពោះមុខសមត្ថកិច្ច ជនសង្ស័យបានឆ្លេីយសារភាពថា វត្ថុតាងដែលសមត្ថកិច្ចដកហូតនោះ មាន៖ ក្រាមពណ៌សថ្លា ចំនួន២កញ្ចប់ថង់តូច ពិតជារបស់ខ្លួនប្រាកដមែន ។
បច្ចុបន្បន្នជនសង្ស័យឈ្មោះ ចក់ រ៉ាវី កំពុងឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធី៕
ដោយ៖សាម៉េត
