ថៃ៖ ក្មេងស្រីម្នាក់ដែលមុខមាត់ស្រស់ផូរផង់ បានមានសំណាងត្រូវបានអនុញ្ញាតឲ្យរៀនបង្ហាញម៉ូតដោយឥតគិតថ្លៃ បន្ទាប់ពីរូបភាព១សន្លឹកនាងអង្គុយលក់ផ្កានៅច្រកចូលនៃផ្លូវប្រសព្វ Rama 9 និង Phet Uthai ក្នុងទីក្រុងបាងកក ដែលត្រូវបានអ្នកប្រើប្រាស់អ៊ីនធឺណិតម្នាក់ចាប់អារម្មណ៍ និងលួចថតបង្ហោះ ដោយសារតែចាប់អារម្មណ៍ ចំពោះសកម្មភាពនាងចងសក់ ក្នុងកាយវិការប្រៀបដូចនាងកំពុងបង្ហាញម៉ូតអ៊ីចឹង។
យ៉ាងណាមិញ រូបថត១ប៉ុស្តរបស់នាងដែលមើលទៅហាក់ដូចជាកំពុងបង្ហាញម៉ូត នៅទីសាធារណៈបែបនេះ ដែលទទួលបានការចាប់អារម្មណ៍ និងចែករំលែកយ៉ាងផុសផុលនៅលើបណ្តាញសង្គមនៃប្រទេសថៃ នៅពេលនេះ បានធ្វើឲ្យមហាជនបានស្គាល់ពីស្ថានភាពជីវិត របស់នាងកាន់តែច្រើន។
ក្មេងស្រីរូបនេះមានឈ្មោះថា ផនវីផុង ភីន ឬ ឈ្មោះក្រៅ ណង ជេវវី អាយុ ៩ ឆ្នាំ រៀនថ្នាក់ទី៣ ។ នាងគឺជាកូនស្រីដ៏កត្តញូម្នាក់នៅក្នុងគ្រួសារ ដោយនាងតែងតែជួយធ្វើកិច្ចការងារផ្ទះ និងឆ្លៀតជួយឪពុកម្តាយក្រីក្ររបស់នាង ដោយមកលក់កម្រងផ្កានៅទីនេះ រៀងរាល់ពេលល្ងាច បន្ទាប់ពីនាងចាកចេញពីសាលារៀន។ នាងមានក្តីសុបិន្ទនៅថ្ងៃអនាគត គឺចង់ក្លាយជាគ្រូពេទ្យម្នាក់ ។
នាងក៏ចូលចិត្តច្រៀង និងរាំ ផងដែរ ។ គ្រប់ពេលដែលនាងទៅលក់ នាងតែងតែឆ្លៀតមើលបន្ថែមចំណេះដឹងតាមរយៈវីដេអូនៅលើ Youtube ដូចជារបៀប Makeup ជាដើម។
ក្រោយពីនាងល្បីនៅលើអ៊ីនធឺណិត អ្នកចាត់ការដៃឯកខាងម៉ូដែលឈ្មោះ វីរីយ៉ាភុង អាតចាហាន ក៏បានប្រកាសស្វែងរករកនាង ហើយទីបំផុត ក៏បានជួប និងផ្តល់ឱកាសឲ្យនាងបានរៀនការសម្តែង និងការដើរបង្ហាញម៉ូដ ដោយមិនគិតថ្លៃនោះទេ។ នេះអាចចាត់ទុកថា ជាសំណាងមួយរបស់នាងហើយ ព្រោះថា ថ្លៃរៀនការដើរបង្ហាញម៉ូដ និងសម្តែងនេះ គឺពិតជាត្រូវចំណាយលុយមិនតិចនោះទេ ឬក៏អាចនិយាយបានថា វាសនាមនុស្សម្នាក់ៗមើលមិនឃើញនោះទេ៕
ប្រែសម្រួល៖ លឹម ហុង (ប្រភព៖ sanook)
