ភ្នំពេញ៖ តាមការឲ្យដឹង សាលារៀននឹងបើកទ្បើងវិញនៅខែវិច្ឆិកាខាងមុខ ដោយអាស្រ័យទៅតាមស្ថានការណ៍ជាក់ស្តែង ខណៈដែល ការសិក្សាតាមអនទ្បាញមានទាំងគុណសម្បិត្តនិងគុណវិបត្តិ។
ដោយវីរុសកូវីដ១៩ ជាបញ្ហាធំ នៅលើសកលលោក រួមទាំងកម្ពុជាផង ធ្វើអោយនៅតាមសាលារៀននិងមហាវិទ្យាល័យនានា ត្រូវផ្អាកសិក្សានៅកន្លែង និងបិទសាលា ដោយមានការបើកបង្រៀនតាមអនទ្បាញ និងការផ្តល់ឯកសារនិងលំហាត់តាមប្រព័ន្ធអេទ្បិចត្រូនិក និងការបង្រៀនតាមទូរទស្សន៍។ ក្នុងនោះសិស្សមួយចំនួនពិសេសសិស្សតូចៗ នៅថ្នាក់ទាបអាចចាប់យកចំនេះនេះបានតិចតួច តាមការបង្រៀនមិនផ្ទាល់នេះ។
អ្នកស្រី ចរិយា ពិសី មានកូន២នាក់ បានឲ្យដឹងថា កូនរបស់គាត់រៀនអនទ្បាញពេលចូលឆ្នាំខ្មែរហើយ ដែលត្រូវរៀនតាមក្រុម។ ក្នុងក្រុមនោះ គ្រូបង្រៀន បានផ្ញើឯកសារជាមេរៀន និងលំហាត់ដើម្បីធ្វើការអនុវត្ត។ ដោយផ្ទះរបស់អ្នកស្រីមានគ្នាតិច មិនមានអ្នកមើលកូនពេលអ្នកស្រីចេញមកលក់ដូរ ទើបអ្នកស្រីចំណាយពេលប្រមាណជា១ម៉ោងសម្រាប់ទាញយកឯកសារនោះ យកមកឲ្យកូនដើម្បីរៀន។
អ្នកស្រី បាននិយាយថា នៅពេលបិទសាលាបែបនេះ ធ្វើអោយអ្នកស្រីមជួបការលំបាក ដោយអ្នកស្រីមិនមានពេលគ្រប់គ្រាន់ ក្នុងការបង្រៀនកូននៅផ្ទះតាមទូរស័ព្ទ ឬតាមទូរទស្សន៍ទេ។ ដូច្នេះកូនរបស់គាត់រៀនបានតិច ទោះបីជាមានការបង្រៀនតាមទូរទស្សន៍ក៏ដោយ ក៏អ្នកស្រីមិនបានឲ្យកូនគាត់មើលដោយមិនទុកចិត្តពេលកូនមើលទូរទស្សន៍ខ្លួនឯង។
ដោយឡែកសម្រាប់និស្សិតដែលសិក្សាថ្នាក់មហាវិទ្យាល័យ បានបង្ហាញទស្សនថា ការរៀនតាមអនទ្បាញ មានទាំងចំណុចវិជ្ចមាន និងអវិជ្ចមាន ព្រោះថា នេះមិនមែនជាការរៀននៅតាមសាលាឬក្នុងថ្នាក់រៀន ដែលមានគ្រូ និងសិស្សប្រាស្រ័យផ្ទាល់នោះទេ។ គុណសម្បត្តិនៃការរៀនតាមអនទ្បាញ គឺទី១អត់សូវមានសំពាធពីអ្នកនៅជុំវិញខ្លួនគឺយើងនៅតែក្នុងបន្ទប់ ប៉ុន្តែដូចជាពិបាកសួរគ្រូជាដើម៕
ដោយ៖សម្ផស្ស