ជនជាតិរ៉ូហ៊ីងយ៉ាង ២នាក់ដែលរស់នៅជំរុំភៀសខ្លួន ដែលមានមនុស្សរាប់លាននាក់ ក្នុងប្រទេសបង់ក្លាដេស ត្រូវបានគេរកឃើញមានផ្ទុកវីរុសកូរ៉ូណា។ នេះបើតាមការបញ្ជាក់របស់មន្ត្រីបង់ក្លាដេស។
នេះគឺជាករណីឆ្លងវីរុសកូរ៉ូណាដំបូងដែលត្រូវបានរកឃើញ ក្នុងចំណោមជនភៀសខ្លួន នៅក្នុងទីក្រុង Cox’s Bazar កន្លែងដែលមានជនជាតិរ៉ូហ៊ីងយ៉ាប្រហែល ១លាននាក់កំពុងរស់នៅក្នុងជំរុំ។
មន្ត្រីបង់ក្លាដេសថ្លែងប្រាប់ BBC ថាអ្នកដែលមានផ្ទុកវីរុស ២នាក់នោះកំពុងត្រូវដាក់ព្យាបាលដោយឡែក ខណៈដែលជនភៀសខ្លួនប្រហែល ១.៩០០នាក់ទៀត កំពុងត្រូវបានគេដាក់ឲ្យនៅដាច់ដោយឡែកដើម្បីធ្វើតេស្តរកមើលវីរុស។
សូមបញ្ជាក់ថា ជនជាតិរ៉ូហ៊ីងយ៉ាងដែលកំពុងរស់នៅក្នុងជំរុំ ក្នុងប្រទេសបង់ក្លាដេស មានដើមកំណើតនៅក្នុងរដ្ឋរ៉ាឃីន ប្រទេសមីយ៉ានម៉ា។ ជនជាតិទាំងនោះ បានចាប់ផ្តើមរត់ភៀសខ្លួនយ៉ាងច្រើនទៅកាន់ប្រទេសបង់ក្លាដេស ដោយសារតែមានការបង្ក្រាបដ៏ឃោរឃៅ ពីសំណាក់ទាហ៊ានរបស់មីយ៉ានម៉ា៕
ប្រភព៖ BBC
អត្ថបទប្រែសម្រួលដោយ៖ សុភ័ក្រ
