ស្ទឹងត្រែង៖ រថយន្តម៉ាក ម៉ាស់ស្តាមួយគ្រឿង បានបើកបុកជាមួយគោយន្តពេញទំហឹង បណ្តាលឲ្យមនុស្សជិះលើគោយន្តកន្ត្រៃ ទាំងក្មេងចាស់ ទទួលរងរបួសធ្ងន់ស្រាលចំនួន៩នាក់។
ហេតុការណ៍គ្រោះថ្នាក់ចរាចរណ៍នេះ បានកើតឡើងលើផ្លូវលំចំណុចអូរុន ស្ថិតនៅក្នុងភូមិកាំងចាម ឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង វេលាម៉ោង៥និង៥០នាទីល្ងាចថ្ងៃទី១៤ ខែឧសភា ឆ្នាំ២០២០។
សមត្ថកិច្ចបានឲ្យដឹងថា អ្នករួមដំណើរនៅលើគោយន្តកន្ត្រៃ សរុបទាំងអស់មានចំនួន១៣នាក់។ ចំណែកអ្នករបួសធ្ងន់ ចំនួន៤នាក់ និងស្រាល ចំនួន៥នាក់ ត្រូវបានដឹកទៅកាន់មន្ទីរពេទ្យខេត្តភ្លាមៗ។ សមត្ថកិច្ចបានបញ្ជាក់ថា អ្នកបើកបររថយន្តមានឈ្មោះព្រីង ពិសិដ្ឋ ភេទប្រុស មានអាយុ៣៧ឆ្នាំ មុនរបរជាអាជីវករ មានទីលំនៅរាជធានីភ្នំពេញ បានបើកបររថយន្តម៉ាកម៉ាស់ស្តា ពណ៌ត្រាវ ពាក់ផ្លាកលេខភ្នំពេញ2AZ 1057 បើកបរមានទិសដៅពីលិចទៅកើត បានបើកទៅបុកជាមួយគោយន្តកន្ត្រៃម៉ាកគូបូតា ពណ៌ក្រហម បើកបរក្នុងទិសដៅពីកើតទៅលិច។
អ្នកបើកបរគោយន្តមានឈ្មោះប៉ាង ព្រឹត្ត មានអាយុ២៩ឆ្នាំ មុខរបរកសិករ មានទីលំនៅ ស្ថិតនៅក្នុងភូមិឃុំកាំងចាម។
រថយន្តម៉ាកម៉ាស់ស្តា ដែលបង្កគ្រោះថ្នាក់ខាងលើនោះ រងការខូចខាតមួយកំណាត់ខាងមុខ ចំណែកគោយន្តកន្ត្រៃ គឺមានការខូចខាតតែបន្តិចបន្តួចប៉ុណ្ណោះ ៕
ដោយ៖សុខុម