ការរាតត្បាតនៃវីរុសកូរ៉ូណា អាចធ្វើឲ្យសេដ្ឋកិច្ចពិភពលោកខាងបង់ប្រាក់ចន្លោះ ៥,៨ ទៅ ៨,៨លានលានដុល្លារ។ នេះបើតាមការព្យាករណ៍របស់ធនាគារអភិវឌ្ឍន៍អាស៊ី (ADB)។
ការព្យាករណ៍នេះមានច្រើនជាងទ្វេដង បើធៀបទៅនឹងការព្យាករណ៍កាលពីខែមុន និងស្មើចន្លោះ ៦,៤ ទៅ ៩,៧ភាគរយនៃទំហំសេដ្ឋកិច្ចពិភពលោក។
ការព្យាករណ៍នៃទំហំទឹកប្រាក់ដែលអាចនឹងខាតបង់នេះ កើតឡើងខណៈដែលវិធានការដើម្បីបន្ថយការរាតត្បាតនៃវីរុសកូរ៉ូណា កំពុងបន្តធ្វើឲ្យសកម្មភាពសេដ្ឋកិច្ចពិភពលោកជុំវិញពិភពលោកធ្លាក់ចុះ។
អាជ្ញាធរជុំវិញពិភពលោកបានចាត់វិធានការយ៉ាងខ្លាំងក្លា ដើម្បីទប់ស្កាត់កុំឲ្យសេដ្ឋកិច្ចរបស់ពួកគេ ប៉ះពាល់ដោយសារវីរុសកូរ៉ូណា។
ប្រធានសេដ្ឋវិទូរបស់ ADB លោក Yasuyuki Sawada បាននិយាយថា “ការវិភាគថ្មីនេះ បង្ហាញពីស្ថានភាពដ៏ធំ នៃការប៉ះពាល់សេដ្ឋកិច្ច ដ៏មានសក្តានុពលនៃវីរុស COVID-19″។
លោកបន្ថែមទៀតថា “វាក៏បានបង្ហាញពីអន្តរាគមន៍គោលនយោបាយដ៏សំខាន់ៗ ដែលអាចជួយកាត់បន្ថយ ការខូចខាតដល់សេដ្ឋកិច្ច”។
កាលពីថ្ងៃម្សិលមិញ តួលេខថ្មីបានបង្ហាញពីការប៉ះពាល់យ៉ាងធំ របស់វីរុសកូរ៉ូណា លើប្រទេសមហាអំណាចសេដ្ឋកិច្ច ខណៈដែលចំនួនប្រជាពលរដ្ឋអាមេរិច ស្វែងរកអត្ថប្រយោជន៍ ពីការបាត់បង់ការងារ បានហក់ឡើងជិត ៣លាននាក់កាលពីសប្តាហ៍មុន។
នៅដើមសប្តាហ៍នេះ ប្រធានប្រព័ន្ធធនាគារកណ្តាលអាមេរិច បានព្រមានថា ការងើបឡើងវិញនៃសេដ្ឋកិច្ចអាមេរិច ទំនងជានឹងមានភាពយឺតយ៉ាវជាការសង្ឃឹមទុក៕
ប្រភព៖ Channelnewsasia
អត្ថបទប្រែសម្រួលដោយ៖ សុភ័ក្រ