ស្ទឹងត្រែង៖ រថយន្តដឹកឥដ្ឋផ្ទុកលើសចំណុះ និងបើកលឿនជ្រុលបានរេចង្កូតធ្លាក់ពីលើផ្លូវជាតិលេខ៧ ក្រឡាប់បះជើងទ្រមេឃ នៅចំណុចគីឡូម៉ែត្រលេខ១៦ ស្ថិតក្នុងភូមិរាជានុកូល សង្កាត់ក្រុងស្ទឹងត្រែងខេត្តស្ទឹងត្រែង នៅវេលាម៉ោង១១ ថ្ងៃទី១៥ ខែឧសភា ឆ្នាំ២០២០។
លោកឧត្តមសេនីយ៍ត្រី ឌៀប ចាន់ធី ស្នងការរងទទួលផែនសណ្តាប់ធ្នាប់ចរាចរណ៍ផ្លូវគោក នៃស្នងការដ្ឋាននគរបាលខេត្ត បានណែនាំដល់ម្ចាស់ រថយន្តធ្វើអាជីវកម្ម សូមឲ្យគោរពច្បាប់ចរាចរណ៍ ពេលដឹកអ្នកដំណើរ ដឹកសម្ភារក្តី មិនត្រូវផ្ទុកទំនិញ សំពីងសំពោង ឬលើសចំណុះ។ ករណីនេះអាចបង្កគ្រោះថ្នាក់ចរាចរណ៍បាន ដោយសារអ្នកបើកបរខ្វះការប្រុងប្រយ័ត្ន ។
លោក ជិន ភាន ជាប្រជាពលរដ្ឋដែលបានឃើញហេតុការណ៍នេះ បានរៀបរាបថា រថយន្តដឹកឥដ្ឋនេះ បើកលឿន ហើយមកដល់ផ្លូវចុះចំណតរថយន្តធ្ងន់ផង អ្នកបើកបរជាន់ហ្វ្រាំងមិនជាប់ ទើបរេចង្កូតធ្លាក់ពីលើផ្លូវជាតិ ក្រឡាប់ផ្ងារជើង តែមិនមានបង្កគ្រោះថ្នាក់ដល់អ្នកធ្នើដំណើរនោះទេ ។
អ្នកបើកបរបានប្រាប់ថា ក្នុងរថយន្តនោះ មានអ្នកបើកបរម្នាក់ និងព្រូម្នាក់ បានរងរបួសស្រាល ហើយក្រោយពេលក្រឡាប់ អ្នកទាំងពីរ ក៏បានដើរចេញពីកន្លែងកើតហេតុទៅបាត់ ។
រថយន្តធ្វើអាជីវកម្មដឹកឥដ្ឋក្រឡាប់ផ្ងារជើងនេះ ជាប្រភេទរថយន្តកូរ៉េ (៣តោនកន្លះ) ពណ៌ខៀវ ពាក់ផ្លាកលេខភ្នំពេញ 3A 7135 ទំនងដឹកលើសទម្ងន់ ហើយអ្នកបើកបរងងុយដេក នេះបើតាមសមត្ថកិច្ចធ្វើការសន្និដ្ឋាន ព្រោះរថយន្តមិនមានបែកកង់នោះទេ ៕
ដោយ៖សុខុម
