ប្រសិនអ្នកជាស្វាមីភរិយាដ៏ល្អ ដែលតែងតែស្រឡាញ់ យកចិត្តទុកដាក់មើលថែគ្នា ដោយមិនឲ្យអ្នកណាម្នាក់ខ្វល់ខ្វាយ ឬ រងទុក្ខ នោះអ្នកប្រហែលជានឹងមានសុភមង្គលខ្លាំងណាស់ សម្រាប់ជីវិតអាពាហ៍ពិពាហ៍។ ជាក់ស្តែង ដូចប្តីប្រពន្ធវ័យចំណាស់មួយគូនេះ ដែលបានរៀបការជាមួយគ្នាអស់រយៈពេល ៨០ មកហើយ តែពួកគាត់នៅតែស្រឡាញ់គ្នាមិនប្រែប្រួលនោះទេ។
ហើយថ្មីៗនេះ ពួកគាត់ទាំងពីរបានសម្រេចចិត្តគ្រោងឈុតអាពាហ៍ពិពាហ៍ជាថ្មី ដើម្បីអបអរខួបអាពាហ៍ពិពាហ៍គម្រប់ ៨០ ឆ្នាំ ដែលពួកគាត់រៀបការដំបូង ពុំមានលុយសម្រាប់ថតរូប និងស្លៀកឈុតអាពាហ៍ពិពាហ៍ស្រស់ៗស្អាតអ៊ីចឹងទេ។
លោកតា Song Qinglin អាយុ ១០៣ ឆ្នាំ និងប្រពន្ធរបស់គាត់លោកយាយ Li ថតរូបអាពាហ៍ពិពាហ៍ជាថ្មី ដើម្បីអបអរពិធីមង្គលការ ៨០ ឆ្នាំ នៅថ្ងៃទី ២៣ ខែកក្កដា ស្ថិតនៅក្នុងភូមិ Songzhai ទីក្រុង Fuyang ខេត្ត Anhui ប្រទេសចិន។
អ្នកស្ម័គ្រចិត្តមកពី Fuyang បានផ្តល់សម្លៀកបំពាក់ និងជួយរៀបចំតុបតែងខ្លួនឲ្យគូស្វាមីភរិយាវ័យជាង១សតវត្សរ៍នេះ អាចបង្កើតបានរូបថតខួបអាពាហ៍ពិពាហ៍របស់ពួកគាត់យ៉ាងល្អឥតខ្ចោះ។
អ្នកជិតខាងបាននិយាយថា ប្តីប្រពន្ធនេះដែលជាឪពុកម្តាយមានមោទនភាពខ្លាំង ចំពោះកូនៗ៤នាក់របស់ពួកគាត់ គឺនៅតែស្រឡាញ់គ្នាដោយការគោរពបំផុត។ ពួកគាត់នៅតែអាចមើលថែគ្នាទៅវិញមក បើទោះជាម្នាក់ៗមានវ័យជាង១០០ ឆ្នាំ ទៅហើយក្តី៕
ប្រែសម្រួល៖ លឹម ហុង (ប្រភព៖ globaltimes)