ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំឲ្យអាជ្ញាធរពិនិត្យភោជនីយដ្ឋាន ហាងលក់ដូ បើមិនអនុវត្តវិធានអនាម័យប្រឆាំងនឹងជំងឺកូវីដ១៩ ត្រូវផ្អាកបណ្តោះអាសន្ន ។
នេះជាបទបញ្ជារបស់សម្តេចតេជោ ហ៊ុន សែន បានធ្វើឡើងក្នុងពេលដឹកនាំកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី១៥ ខែឧសភា ឆ្នាំ២០២០។
សម្តេចតេជោ ហ៊ុន សែន នាយករដ្ឋមន្ត្រី បានណែនាំដល់អាជ្ញាធរឱ្យចុះពិនិត្យភោជនីយដ្ឋាន អាហារដ្ឋានឲ្យគោរពវិធានការអនាម័យ បើភោជនីយដ្ឋានណាមិនអនុវត្តតាមវិធានអនាម័យ ក្នុងការប្រយុទ្ធប្រឆាំងជំងឺកូវីដ១៩ ឬទប់ស្កាត់មិនឱ្យជំងឺនេះ រីករាលដាលទេនោះ ត្រូវផ្អាកជាបណ្តោះអាសន្ន។
ក្នុងឱកាសនេះសម្តេចតេជោ ហ៊ុន សែន បានបញ្ជាក់ថា កម្ពុជាយើងមិនតឹងពេក មិនធូរពេក ហើយក៏មិនធ្វើឲ្យពលរដ្ឋលំបាកដែរ តែផ្ទុយទៅវិញគឺជាការពារជីវិតពលរដ្ឋទៅវិញទេ។
គួរបញ្ជាក់ថា នៅកម្ពុជា មានភោជនីយដ្ឋាន និងអាហារដ្ឋានទេសចរណ៍ ប្រមាណជិត ៩០០កន្លែង បានដាក់ពាក្យចូលរួមប្រឡងប្រណាំង ភោជនីយដ្ឋានស្អាតរបស់ក្រសួងទេសចរណ៍ គ្មានសម្រាមជាក្រដាសក្រោមតុ និងមានការចូលរួមជាបន្តបន្ទាប់ (ប្រមាណជិត៥០%) នៃភោជនីយដ្ឋាន អាហារដ្ឋានទេសចរណ៍ទូទាំងប្រទេស។ ជនបរទេសជាច្រើន បានណែនាំអំពីភោជនីយដ្ឋាន ដែលល្អជាងគេនៅភ្នំពេញ នៅតាមអត្ថបទនានា សម្រាប់ជាផ្លូវដល់ជនបរទេសដទៃទៀត ក្នុងនោះភ្នំពេញ ត្រូវបានជាប់ចំណាត់ថ្នាក់មួយ ក្នុងចំំណោមចំណាត់ថ្នាក់កំពូល នៅតំបន់អាស៊ីអាគ្នេយ៍ សម្រាប់ផ្នែកបរិភោគអាហារ៕
ដោយ៖សម្ផស្ស