សៀមរាប ៖ ម្ចាស់ការដ្ឋានប្រកបអាជីវកម្មជីកអាចម៌ដីលក់មួយកន្លែងស្ថិតនៅភូមិសាស្ត្រ ភូមិត្រាវកៀត ស្រុកសូទ្រនិគម លួចជីកដីស្រែលក់ចង់ដល់ក្បាលប្រែត ទើបសមត្ថកិច្ចភ្ញាក់ខ្លួនទៅចុះបង្ក្រាប ។ ការចុះបង្ក្រាបនេះ សមត្ថកិច្ចចម្រុះ បានបញ្ជាក់ថា មកពីម្ចាស់ការដ្ឋានប្រកបអាជីវកម្មជីកអាចម៌ដីលក់ រកស៊ីគ្មានច្បាប់អនុញ្ញាត ពីរដ្ឋបាលខេត្តសៀមរាប ឬក្រសួងរ៉ែ និងថាមពល ប៉ុន្តែអាជ្ញាធរបានប្រាប់ម្ចាស់អាជីវកម្មថា ត្រូវដាក់ពាក្យស្នើសុំលិខិតអនុញ្ញាតពីរដ្ឋបាលខេត្ត ឬក្រសួងរ៉ែ និងថាមពលជា មុនសិន ទើបអាចដំណើរការអាជីវកម្មបាន។
សូមបញ្ជាក់ថា កម្លាំងការិយាល័យប្រឆាំងបទល្មើសសេដ្ឋកិច្ច បានសហការជាមួយក្រុមការងារចម្រុះ ចុះបង្ក្រាបការដ្ឋានជីកយកអាចម៌ដីចំនួនមួយកន្លែង គ្មានលិខិតអនុញ្ញាត ស្ថិតនៅភូមិសាស្ត្រ ភូមិត្រាវកៀត ឃុំដានរុន ស្រុកសូទ្រនិគម ខេត្តសៀមរាប កាលពីថ្ងៃទី ១៥ ខែឧសភា ឆ្នាំ២០២០ វេលាម៉ោង១៤រសៀល ។
ក្នុងប្រតិបត្តិការនេះ សមត្ថកិច្ចចម្រុះ បានមានចំណាត់ការមួយចំនួនដូចជា ធ្វើកំណត់ហេតុបិទទីតាំងអាជីវកម្ម ជាបណ្តោះអាសន្ន។
ចាប់ដកហូតគ្រឿងចក្រចំនួន ៣គ្រឿង រួមមាន អេស្ការវ៉ាទ័រចំនួន ១គ្រឿង ឡានដឹកដីចំនួន ១គ្រឿង គោយន្ដដឹកដីចំនួន ១គ្រឿង។ ធ្វើការផាកពិន័យអន្តរការណ៍ យោងតាមច្បាប់ស្តីពី ការគ្រប់គ្រង ការធ្វើអាជីវកម្មធនធានរ៉ែ មាត្រា ៣៥ថ្មី និងធ្វើកិច្ចសន្យា បញ្ឈប់ការជីកអាចម៌ដី គ្មានលិខិតអនុញ្ញាតបន្តទៀត។ ក្នុងករណីម្ចាស់ការដ្ឋាន មានបំណងប្រកបអាជីវកម្មជីកអាចម៌ដីលក់ ត្រូវដាក់ពាក្យស្នើសុំលិខិតអនុញ្ញាត ពីរដ្ឋបាលខេត្ត ឬក្រសួងរ៉ែ និងថាមពលជាមុនសិន។ ចំពោះគ្រឿងចក្រ សមត្ថកិច្ចចម្រុះ បានប្រគល់ឲ្យជំនាញ ដើម្បីអនុវត្តបន្ត បន្ទាប់មកបានធ្វើកំណត់ហេតុប្រគល់ ទទួលឲ្យម្ចាស់ការដ្ឋាន រក្សាទុកបណ្តោះអាសន្ន ៕
ដោយ៖បញ្ញាស័ក្តិ
