ឧត្តរមានជ័យ៖ ករណីអំពើដ៏ឃោរឃៅរបស់បុរសម្នាក់ជាឪពុកចុង ដែលកាច់ដៃកាច់ជើងកុមារា ម្នាក់ជាកូនដើម នោះ គណៈកម្មការដឹកនាំការអនុវត្តន៍ផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ សូមអំពាវនាវដល់គ្រប់ក្រសួង ស្ថាប័ន អង្គភាពពាក់ព័ន្ធ និងអាជ្ញាធរមានសមត្ថកិច្ចគ្រប់លំដាប់ថ្នាក់ ជាពិសេសស្ថាប័នតុលាការ មេត្តាយកចិត្តទុកដាក់ ចាត់វិធានការ និងដាក់ទោសឲ្យបានធ្ងន់ធ្ងរជាដាច់ខាត ស្របតាមច្បាប់ ជាធរមាន ដើម្បីកុំឲ្យអំពើដ៏អាក្រក់នេះ កើតមានក្នុងសង្គមយើងបន្តទៀត។
បើយោងតាមសេចក្តីថ្លែងការណ៍ ស្តីពីករណីឪពុកចុង ប្រើអំពើហិង្សាកាច់ដៃ កាច់ជើង កូនចុង នៅភូមិឈើក្រំ សង្កាត់កូនក្រៀល ក្រុងសំរោង ខេត្តឧត្តរមានជ័យ គណៈកម្មការដឹកនាំការអនុវត្តន៍ផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ នៃក្រសួងសង្គមកិច្ច អតីតយុទ្ធជន និងយុវនីតិសម្បទា សូមថ្កោលទោសដាច់អហង្ការ និងមិនអាចទទួលយកបានចំពោះអំពើអមនុស្សធម៌របស់ឪពុកចុងឈ្មោះ ធួន ផាន់ណា ភេទប្រុស អាយុ៣៤ឆ្នាំ ដែលបានប្រើអំពើហិង្សា និងធ្វើទារុណកម្ម កាច់ដៃ កាច់ជើង កូនចុងឈ្មោះ ភី វាសនា អាយុ៧ខែនៅភូមិឈើក្រំ សង្កាត់កូនក្រៀល ក្រុងសំរោង ខេត្តឧត្តរមានជ័យ កាលពីខែមេសា ឆ្នាំ២០២០ និងទើបបែកធ្លាយក្រោយពេលម្តាយបង្កើតដាល់ពាក្យបណ្តឹងនៅថ្ងៃទី១៣ ខែឧសភា ឆ្នាំ២០២០។
គណៈកម្មការដឹកនាំការអនុវត្តន៍ផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ ក៏ដូចជាសាធារណជនទូទៅមានការរន្ធត់ តក់ស្លុតឥតឧបមា និងមានការអាណិតអាសូរ យ៉ាងក្រៃលែងចំពោះកុមាររងគ្រោះ ដោយអំពើអមនុស្សធម៌នេះ និងយល់ឃើញថាអំពើដ៏សាហាវ យង់ឃ្នង ឃោរឃៅ ព្រៃផ្សៃ និងអមនុស្សធម៌របស់ឪពុកចុងរូបនេះ គឺជាការរំលោភបំពានយ៉ាងធ្ងន់ធ្ងរទៅលើ សិទ្ធិរបស់កុមារ ជាពិសេសសិទ្ធិទទួលបនានូវការការពារ។
សូមបញ្ជាក់ថា លោកលឹម ចន្ថា ចៅក្រមស៊ើបសួរសាលាដំបូងខេត្តឧត្តរមានជ័យ នៅថ្ងៃទី ១៤ ខែឧសភា ឆ្នាំ២០២០ ចេញដីកាបង្គាប់ឲ្យឃុំខ្លួនបុរសម្នាក់ដាក់ពន្ធនាគារខេត្តឧត្តរមានជ័យ ជាបណ្ដោះអាសន្ន ពីបទ ហឹង្សាដោយចេតនាមានស្ថានទម្ងន់ទោសកាច់ដៃកាច់ជើងកុមារាម្នាក់ និង ប្រើប្រាស់ដោយខុសច្បាប់នូវសារធាតុញៀន ប្រព្រឹត្តទៅនៅថ្ងៃទី២៥, ២៨ ខែមេសា ឆ្នាំ២០២០ ។
ជនត្រូវចោទឈ្មោះ ធួន ផាន់ណា រស់នៅភូមិឈូក ឃុំសំរោង ស្រុកសំរោងខេត្តឧត្ដរមានជ័យ។
សូមបញ្ជាក់ថា កងកម្លាំងសមត្ថកិច្ច ចាប់ខ្លួនបុគ្គលម្នាក់បន្ទាប់ពីបង្ហោះផ្សព្វផ្សាយវីដេអូបង្ហាញពីអំពើឃោរឃៅ និងទារុណកម្មទៅលើកុមារ។
កាលពីថ្ងៃទី១២ ខែឧសភា ឆ្នាំ២០២០, វីដេអូបង្ហោះតាមបណ្តាញ Facebook បង្ហាញពីអំពើឃោរឃៅ និងទារុណកម្មទៅលើកុមារអាយុ ៧ខែ និងមានចោទអំពីអំពើហឹង្សាក្នុងគ្រួសារ ថែមទាំងគំរា មទៅលើក្មេងរងគ្រោះ និងម្តាយ។ ក្រុមការងារ CPU បានទទួលដំណឹងអំពីវីដេអូនេះ និងបានចាប់ផ្តើមធ្វើការស៊ើបអង្កេត។
ក្នុងកិច្ចសហប្រតិបត្តិការជាមួយនគរបាលខេត្តឧត្តរមានជ័យ និងក្រសួងមហាផ្ទៃ, បុរសអាយុ៣៤ឆ្នាំត្រូវបានកម្លាំងសមត្ថកិច្ចធ្វើការចាប់ខ្លួនដើម្បីសួរនាំ។
ករណីនេះជាគំរូដ៏ល្អមួយដែលបង្ហាញពីការប្តេជ្ញារបស់នគរបាលជាតិកម្ពុជា និងCPU ចំពោះការស៊ើបអង្កេតទៅលើវីដេអូដែលបង្ហាញពីអំពើហឹង្សា ឬរូបភាពបៀតបៀនកេរ្តិ៍ខ្មាស់លើកុមារ បន្ទាប់ពីយើងបានទទួលដំណឹង។ សូមអបអរសាទរដល់គ្រប់អង្គភាពពាក់ព័ន្ធក្នុងការស៊ើបអង្កេតមួយនេះ។
កាលពីថ្ងៃទី១៣ខែឧសភា ឆ្នាំ២០២០ ការិយាល័យជំនាញ នៃស្នងការដ្ឋាននគរបាលខេត្តឧត្តរមានជ័យ បានកោះហៅឈ្មោះ ធួន ផាណា ភេទ ប្រុស អាយុ ៣៤ ឆ្នាំ ពាក់ព័ន្ធករណីប្រើអំពើហឹង្សាកាច់ដៃកាច់ជើងកូនចុងរបស់ខ្លួន កាលពីថ្ងៃ២៨ ខែមេសា ឆ្នាំ២០១៩ ជាអនីតិជនដែលបែកធ្លាយតាមសង្គមហ្វេសប៊ុកនៅថ្ងៃទី១២ ខែឧសភា ឆ្នាំ២០២០៕
ដោយ៖កូឡាប
