ខេត្តស្វាយរៀង៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ក្នុងនាមអ្នកតំណាងរាស្ត្រមណ្ឌលស្វាយរៀង និងជាប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង នាព្រឹកថ្ងៃទី១៦ ខែឧសភា ឆ្នាំ២០២០ បានផ្ដាំផ្ញើអាជ្ញាធរ សមត្ថកិច្ច និងបងប្អូនប្រជាពលរដ្ឋទាំងអស់ ត្រូវបន្តការប្រុងប្រយ័ត្នចំពោះជំងឺ COVID-19 ទោះបីជាស្ថានភាពនៅកម្ពុជា បានធូរស្បើយច្រើនហើយ មិនមានអ្នកឆ្លងថ្មីក៏ពិតមែន និងមានអ្នកជាអស់ហើយក្តី ក៏មិនត្រូវភ្លេចខ្លួនឡើយ ដោយបន្តប្រយុទ្ធប្រឆាំងចំពោះជំងឺរាតត្បាតនោះបន្ថែមទៀត។
លោកជំទាវ ម៉ែន សំអន ថ្លែងបែបនេះ ខណៈដែលបាននាំយកអំណោយ ផ្ដល់ជូនប្រជាពលរដ្ឋក្រីក្រចំនួន ៦៩គ្រួសារ រស់នៅស្រុកស្វាយជ្រំ ខេត្តស្វាយរៀង។ លោកជំទាវ បានផ្ដាំផ្ញើសួរសុខទុក្ខ និងសេចក្ដីនឹករលឹក ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្ដិព្រឹទ្ធបណ្ឌិត ប្រធានកាកបាទក្រហមកម្ពុជា ដែលសម្តេចទាំងទ្វេ តែងតែយកចិត្តទុក្ខដាក់ ចំពោះប្រជាពលរដ្ឋទូទាំងប្រទេស ដោយមិនឲ្យមានប្រជាពលរដ្ឋណាម្នាក់ ស្លាប់ដោយដាច់បាយឡើយ។
លោកជំទាវ ម៉ែន សំអន ក៏បានជូនពរដល់បងប្អូនប្រជាពលរដ្ឋ ទទួលបាននូវសុខភាពល្អ និងជោគជ័យ ក្នុងភារកិច្ចការងារគ្រប់ៗក្រុមគ្រួសារ ពិសេសអំពាវនាវឲ្យប្រជាពលរដ្ឋទាំងអស់ត្រូវ៖
ទី១៖ ប្រុងប្រយ័ត្នឲ្យបានខ្ពស់គ្រប់ៗក្រុមគ្រួសារ ក្នុងការចូលរួមទប់ស្កាត់ នូវការឆ្លងរីករាលដាល នៃជំងឺកូវីដ១៩ ជាពិសេស មិនត្រូវភ្លេចខ្លួននោះទេ បើទោះបីជាប្រទេសកម្ពុជា មានអ្នកឆ្លងនៅមានតិច ក្រោមការអនុវត្តន៍តាមការណែនាំ របស់ក្រសួងសុខាភិបាល និងសារាចរណែនាំ និងវិធានការជាច្រើន របស់សម្តេចតេជោនាយករដ្ឋមន្ត្រី។ ស្របពេលដែលកម្ពុជា មកដល់ថ្ងៃនេះ អ្នកឆ្លងមាន អ្នកជាសះស្បើយមានចំនួន ១២២នាក់ និងពុំមានអ្នកស្លាប់នោះទេ។
ទី២៖ យើងទាំងអស់គ្នា ត្រូវជំរុញការងារកសិកម្មក្នុងការដាំដុះ ចិញ្ចឹមសត្វ នៅក្នុងមូលដ្ឋានជាពិសេស ត្រូវរក្សាទុក្ខនូវស្បៀងអាហារដូចជា អង្គរ អំបិល ប្រហុក ត្រី សាច់ ប្រសិនបើជំងឺកូវីដ១៩នេះ នៅតែអូសបន្លាយ។
ទី៣៖ ត្រូវចូលរួមទាំងអស់គ្នា ក្នុងការគោរពច្បាប់ចរាចរណ៍ផ្លូវគោគ ដើម្បីកាត់បន្ថយនូវគ្រោះថ្នាក់ និងការបាត់បង់អាយុ។
ក្នុងសកម្មភាពចុះអំណោយផ្ដល់ជូនប្រជាពលរដ្ឋក្រីក្រចំនួន ៦៩គ្រួសារ រស់នៅស្រុកស្វាយជ្រំ ខេត្តស្វាយរៀង លោកជំទាវកិត្តិសង្គហបណ្ឌិត ម៉ែន សំអន បាននាំអំណោយសប្បុរសធម៌របស់ សាខាកាទបាទក្រហម ខេត្តស្វាយរៀង ដល់ប្រជាពលរដ្ឋរួមមាន៖ អង្ករ មី ត្រីខកំប៉ុង និងថវិកាចំនួនទៀតផងដែរ៕
ដោយ៖ វ៉ៃកូ
