ខេត្តស្វាយរៀងៈ បុរសជាជនជាតិចិនម្នាក់ ត្រូវបានមិត្តភក្តិ ដឹកដោយរថយន្ត យកមកព្យាបាលនៅមន្ទីរពេទ្យ តែមនុស្យនោះ បានស្លាប់មុនពេលចូល មកដល់មន្ទីរពេទ្យស្វាយរៀង។
សមត្ថកិច្ចបានឱ្យដឹងថា នៅព្រឹកថ្ងៃទី១៦ ខែឧសភា ឆ្នាំ២០២០ វេលាម៉ោង៣ទៀបភ្លឺ លោកអុក សារិន គ្រូពេទ្យប្រចាំការ នៃមន្ទីរពេទ្យខេត្តស្វាយរៀង បានរាយការណ៍មកថា នៅមន្ទីរពេទ្យខេត្ត មានជនជាតិចិនម្នាក់ ត្រូវបានមិត្តភក្តិ ដឹកដោយរថយន្ត យកមកព្យាបាលនៅមន្ទីរពេទ្យ តែមនុស្យនោះ បានស្លាប់មុនពេលចូល មកដល់មន្ទីរពេទ្យ ។
ប្រភពដដែលបានបន្តថា ក្រោយពីទទួលបានព័ត៌មាននេះ ភ្លាមនៅវេលាម៉ោង៧និង៣០នាទីព្រឹក ក្នុងថ្ងៃដដែល កម្លាំងជំនាញការិយាល័យបច្ចេកទេសវិទ្យាសាស្ត្រ កម្លាំងជំនាញការិយាល័យព្រហ្មទណ្ឌកម្រិតធ្ងន់ សហការជាមួយកម្លាំង អធិការដ្ឋាននគរបាលក្រុងស្វាយរៀង កម្លាំងមូលដ្ឋានកងរាជអាវុធហត្ថក្រុង ស្វាយរៀង និងគ្រូពេទ្យ នៃមន្ទីរពេទ្យខេត្តស្វាយរៀង ដោយមានការសម្របសម្រួលពី លោកព្រះរាជអាជ្ញាអមសាលាដំបូងខេត្ត បានចុះពិនិត្យដល់បន្ទប់លេខ៤ នៃមន្ទីរពេទ្យខេត្តឃើញថា សាកសពមានឈ្មោះ គូ ហ្វាងយាន (GU FANGYUAN) ភេទប្រុស អាយុ៣០ឆ្នាំ ជនជាតិចិន មុខរបរមិនពិតប្រាកដ កាន់លិខិតឆ្លងដែនលេខ EG- ៩២៥៥០៤៨ ស្នាក់នៅបន្ទប់លេខB-០២១៨ នៃវិថីថ្មើជើង ស្ថិតក្នុងភូមិបាវិតកណ្តាល មានទីលំនៅខេត្តជាំងស៊ីប្រទេសចិន បានស្លាប់ប្រាកដមែន។ តាមការបំភ្លឺរបស់ឈ្មោះ អុក សារិន គ្រូពេទ្យប្រចាំការនៃមន្ទីរពេទ្យខេត្ត បានបំភ្លឺថា សពឈ្មោះគូ ហ្វាំងយាន បានស្លាប់ តាំងពីមុនពេលចូលមកដល់មន្ទីរពេទ្យម្លេះ។
លទ្ធផលនៃការពិនិត្យសាកសពឃើញថា នៅលើខ្លួនប្រាណសាកសព ពុំឃើញមានស្លាកស្នាមអ្វីគួរឲ្យកត់សម្គាល់ទេ។ តាមការសន្និដ្ឋាន របស់សមត្ថកិច្ចជំនាញ និងគ្រូពេទ្យបញ្ជាក់ថា សាកសពឈ្មោះគូ ហ្វាងយាន ស្លាប់ដោយជំងឺបេះដូង ។ បច្ចុប្បន្នសាកសព សមត្ថកិច្ចយើងបានធ្វើ កំណត់ហេតុ ប្រគល់ឲ្យទៅការិយាល័យពិនិត្យវិភាគ កន្លែងកើតហេតុ នៃនាយកដ្ឋាននគរបាលបច្ចេកទេសវិទ្យាសាស្ត្រ ដើម្បីស្រាវជ្រាវបន្ត និងរក្សាទុករង់ចាំសាច់ញាតិ និងក្រុមគ្រួសារ មកទទួលយកទៅធ្វើបុណ្យតាមប្រពៃណី៕
ដោយ៖វ៉ៃកូ
