ប្រទេសថៃ ៖ វិបត្តិនៃការរីករាលដាលវីរុសកូរ៉ូណា ឬ Covid-19 ឃើញថាបានជះឥទ្ធិពលយ៉ាងខ្លាំងស្ទើរតែគ្រប់បណ្តាប្រទេសនៅជុំវិញពិភពលោក ដែលបានបង្ខំឲ្យក្រុមហ៊ុនមួយចំនួនត្រូវផ្អាកដំណើរការទាំងស្រុង ជាពិសេសគឺអាជីវកម្មពាក់ព័ន្ធនឹងវិស័យទេសចរណ៍ និងទីកន្លែងកម្សាន្តនានា។
ពិតណាស់ ដោយសារតែបញ្ហានេះ បានធ្វើឲ្យបុគ្គលិកជាច្រើននៅក្នុងប្រទេសថៃ បានសម្រេចចិត្តត្រូវស្វែងរកការងារធ្វើជាបណ្តោះអាសន្ន ដោយមិនរើសមុខ ដើម្បីទទួលបានប្រាក់កម្រៃ ដោះស្រាយជីវភាពប្រចាំរបស់ពួកគេ ។ ជាក់ស្តែង ដូចជានារីៗជាអ្នករាំទាំងនេះដែលកំពុងអត់ការងារធ្វើ បានសម្រេចចិត្តមកស៊ីឈ្នួលជាអ្នកលក់ និងរើសត្រងទុរេនទម្លាក់លើដើម ដ៏ប្រឈមនឹងគ្រោះថ្នាក់ទាំងក្នុងស្ថានភាពស្លៀកស៊ីល្ហល្ហេវ គួរឲ្យអាណិតជាខ្លាំង។
តាមរយៈទំព័រហ្វេសប៊ុក ToKo បានបង្ហោះឲ្យដឹងថា ម្ចាស់ចម្ការទុរេនឈ្មោះ សានង ត្រុងឈឿន អាយុ ៥០ ឆ្នាំ នៅក្នុងស្រុក Klaeng ខេត្ត Rayong (ថៃ) បានជួលនារីៗជាអ្នករាំជាច្រើននាក់ មកពីស្រុក Kaeng Hang Maew ខេត្ត Chanthaburi ដើម្បីមកកាត់ រើស (ត្រង) ទុរេន ដែលបេះទម្លាក់ពីលើដើមមកដី និងបន្ទាប់មក តម្រូវឲ្យពួកគេដឹកជញ្ជូនទុរេនទៅកាន់ទីផ្សារក្នុងស្រុក និងអន្តរជាតិ។
ទោះយ៉ាងណា គេពុំបានបញ្ចេញឲ្យដឹងថា មុខរបរស៊ីឈ្នួលរើសទុរេនដ៏ញាក់សាច់នេះ ទទួលបានប្រាក់ឈ្នួលប៉ុន្មានបាតនោះទេ៕
ប្រែសម្រួល៖ លឹម ហុង
