ភ្នំពេញ៖ អធិការដ្ឋាននគរបាលខណ្ឌមានជ័យ បានឃាត់ខ្លួនជនល្មើស២នាក់ ករណីអំពើប៉ុនប៉ងលួច យកម៉ូតូ។ កើតហេតុ ថ្ងៃទី១៦ ខែឧសភា ឆ្នាំ២០២០ វេលាម៉ោង១និង៣០នាទីរំលងអធ្រាត្រ នៅចំណុចផ្លូវលេខ៣៧១ ភូមិឬស្សី សង្កាត់ ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
អធិការដ្ឋាននគរបាលខណ្ឌមានជ័យ បានឲ្យដឹងថា ជនសង្ស័យឈ្មោះ ម៉ៅ វាសនា ហៅ វែង ភេទប្រុស អាយុ ២៩ ឆ្នាំ ជនជាតិ ខ្មែរ ទីលំនៅផ្ទះជួល ផ្លូវលំ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ មុខរបរ មិនពិតប្រាកដ (ឃាត់ខ្លួន មានផ្ទុកសារធាតុញៀន) និងជនសង្ស័យឈ្មោះ ម៉ាន សត្យា ហៅ ញ៉ាញ់ ភេទប្រុស អាយុ ២៤ ឆ្នាំ ជនជាតិខ្មែរ ទីលំនៅផ្ទះជួល ផ្លូវលំ ភូមិត្នោតជ្រុំ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ មុខរបរ មិនពិតប្រាកដ(ឃាត់ខ្លួន មានផ្ទុកសារធាតុញៀន) ។
វត្ថុតាងចាប់យក ៖ ដែកមុខស្រួចសំប៉ែតចំនួន ១ដើម , សោទីបលេខ៨ចំនួន១ដើម, ដែកលួសសរសៃចំនួន៣កំណាត់ , ទុលឡឺវីសចំនួន២ ដើម និង ម៉ូតូ១គ្រឿងម៉ាកហុងដាវីសិន ពណ៌ទឹកប៊ិច លេខម៉ាស៊ីន 0186411 ពាក់ផ្លាកលេខ តាកែវ 1M9458 (ជារបស់ជនសង្ស័យ) ។
នគរបាលបានរៀបរាប់ហេតុការណ៍ ៖ កាលពីថ្ងៃទី ១៦ ខែ ឧសភា ឆ្នាំ ២០២០ វេលាម៉ោង១និង៣០នាទីរំលងអធ្រាត្រ កម្លាំងនគរបាលប៉ុស្តិ៍ស្ទឹងមានជ័យទី២ បានសហការជាមួយកម្លាំងផ្នែកអន្តរាគមន៍ ចំណុះអធិការដ្ឋាននគរបាលខណ្ឌមានជ័យ ធ្វើការល្បាតពួនស្ទាក់នៅក្នុងមូលដ្ឋាន ពេលមកដល់ផ្លូវលេខ៣៧១ ភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ស្រាប់តែឃើញជនសង្ស័យចំនួន៣នាក់ឈ្មោះ ម៉ៅ វាសនា ហៅ វែង ភេទប្រុស អាយុ ២៧ ឆ្នាំ , ឈ្មោះ ម៉ាន សត្យា ហៅ ញ៉ាញ់ ភេទប្រុស អាយុ ២៤ ឆ្នាំ និងឈ្មោះ ធី ភេទប្រុស អាយុ ២៦ ឆ្នាំ ជិះម៉ូតូ១គ្រឿងម៉ាកហុងដាវីសិន ពណ៌ទឹកប៊ិច ពាក់ផ្លាកលេខ តាកែវ 1M9458 ដោយមានការសង្ស័យសមត្ថកិច្ចយើងបានឃាត់ម៉ូតូដើម្បីត្រួតពិនិត្យ ស្រាប់តែជនសង្ស័យម្នាក់ឈ្មោះ ធី បានលោតចុះពីលើម៉ូតូរត់គេចខ្លួនបាត់ ភ្លាមនោះសមត្ថកិច្ចយើង បានឃាត់ខ្លួនសង្ស័យ២នាក់ឈ្មោះ ម៉ៅ វាសនា ហៅ វែង , ឈ្មោះ ម៉ាន សត្យា ហៅ ញ៉ាញ់ ឆែកឆេររកឃើញឧបករណ៍សម្រាប់គាស់សោរទ្វារផ្ទះ និងសម្រាប់កាច់សោកម៉ូតូមួយចំនួនរួមមាន ៖ ដែកមុខស្រួចសំប៉ែតចំនួន ១ដើម ,សោទីបលេខ៨ចំនួន១ដើម, ដែកលួសសរសៃចំនួន៣កំណាត់ , ទុលឡឺវីសចំនួន២ ដើម នៅជាប់ខ្លួនជនសង្ស័យឈ្មោះ ម៉ៅ វាសនា ហៅ វែង ឃើញដូចនោះសមត្ថកិច្ចយើង ក៏បាននាំខ្លួនជនសង្ស័យទាំង២នាក់ឈ្មោះ ម៉ៅ វាសនា ហៅ វែង , ឈ្មោះ ម៉ាន សត្យា ហៅ ញ៉ាញ់ យកមកសាកសួរនៅស្នាក់ការនគរបាលប៉ុស្តិ៍ស្ទឹងមានជ័យទី២ ដើម្បីចាត់ការតាមនីតិវិធី ។
បច្ចុប្បន្នជនសង្ស័យឈ្មោះ ម៉ៅ វាសនា ហៅ វែង ,ឈ្មោះ ម៉ាន សត្យា ហៅ ញ៉ាញ់ ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី៕
ដោយ៖កូឡាប