ភ្នំពេញ៖ ថ្ងៃនេះ (១៧ឧសភា) គឺជាទិវាអន្តរជាតិប្រឆាំងនឹងការរើសអើង អ្នកស្រឡាញ់ភេទដូចគ្នា។ នៅកម្ពុជា បុគ្គលដែលស្រឡាញ់ភេទដូចគ្នា កែភេទ និងស្រឡាញ់ ទាំងពីរភេទ នៅតែទទួលរងនូវការរើសអើងក្នុងសង្គម។
ស្ថានទូតសហរដ្ឋអាមេរិក ប្រចាំកម្ពុជា (U.S. Embassy Phnom Penh, Cambodia) បានសរសេរសារលើហ្វេសប៊ុកផ្លូវាករថា ថ្ងៃនេះគឺជាទិវាអន្តរជាតិប្រឆាំងនឹងការរើសអើង អ្នកស្រឡាញ់ភេទដូចគ្នា។ ក្រសួងការបរទេសសហរដ្ឋអាមេរិក ធ្វើការដោយមិនគិតការនឿយហត់ ដើម្បីការពារនិងលើកកម្ពស់សិទ្ធិមនុស្ស និងសេរីភាពជាមូលដ្ឋាន នៃមនុស្សជាតិទាំងអស់ នៅទូទាំងពិភពលោក ដោយមិនគិតពីភេទ ជំនឿសាសនា ប្រភពដើមនៃសញ្ជាតិ ចំណង់ផ្លូវភេទ ឬស្ថានភាពសេដ្ឋកិច្ចឡើយ។
ចំណែកស្ថានទូតសហភាពអឺរ៉ុបប្រចាំកម្ពុជា (European Union in Cambodia) បានលើកឡើងផងដែរថា នៅកម្ពុជា បុគ្គលដែលស្រឡាញ់ភេទដូចគ្នា កែភេទ និងស្រឡាញ់ ទាំងពីរភេទ នៅតែទទួលរងនូវការរើសអើងក្នុងសង្គម រួមមាន ការបង្ខំឲ្យរៀបការជាមួយបុគ្គលភេទផ្ទុយគ្នា ការរើសអើងនៅកន្លែងធ្វើការ និងការគំរាមធ្វើបាបនៅសាលារៀន។
គម្រោងរបស់សហភាពអឺរ៉ុប “សំឡេងដើម្បីសមភាពយេនឌ័រ” គាំទ្រដល់កិច្ចខិតខំប្រឹងប្រែង ដើម្បីបញ្ចប់ការមាក់ងាយនេះ។ គម្រោងនេះ ធ្វើការជាមួយសកម្មជន ជាច្រើន ដូចជា នីត វ៉ាន់យូ ដែលជាអ្នកដឹកនាំបណ្តាញអ្នកស្រឡាញ់ ភេទដូចគ្នាដែលមានសមាជិក ៣៣ នាក់។
វ៉ាន់យូ គូសបញ្ជាក់ថា “អ្នកស្រឡាញ់ភេទដូចគ្នា គឺជាធនធានមនុស្សដ៏សំខាន់ និងមានតម្លៃ ហើយដើរតួនាទីយ៉ាងសំខាន់ ក្នុងការអភិវឌ្ឍសង្គម” ។
ជាមួយគ្នានោះដែរ Cambodian Center for Human Rights មជ្ឈមណ្ឌលសិទ្ធិមនុស្សកម្ពុជា បានកត់សម្គាល់ថា នៅថ្ងៃទី១៧ ខែឧសភា ឆ្នាំ២០២០ នេះយើងទាំងអស់គ្នា ចូលរួមអបអរសាទរទិវាអន្ដរជាតិប្រឆាំងការរើសអើង ទៅលើអ្នកស្រឡាញ់ភេទដូចគ្នា។ ដើម្បីចូលរួមក្នុងទិវានេះ មជ្ឈមណ្ឌលសិទ្ធិមនុស្សកម្ពុជា (“ម.ស.ម.ក”) ចេញផ្សាយខិត្តប័ណ្ណព័ត៌មាន ដើម្បីលើកកម្ពស់ការយល់ដឹង អំពីការរើសអើង ដែលប្រឈមមុខដោយស្ដ្រីស្រឡាញ់ស្ដ្រី បុរសស្រឡាញ់បុរស អ្នកស្រឡាញ់ទាំងពីរភេទ អ្នកប្ដូរ យេនឌ័រ អន្ដរភេទ ឬ អ្នកដែលមិនទាន់កំណត់អត្ដសញ្ញាណ។
មជ្ឈមណ្ឌលសិទ្ធិមនុស្សកម្ពុជា ម.ស.ម.ក បានធ្វើការសិក្សាស្រាវជ្រាវកាលពីឆ្នាំមុន ដោយបង្ហាញថា បុគ្គលអ្នកស្រឡាញ់ដូចគ្នាជាច្រើន ប្រឈមនឹងការរើសអើង និងការយាយី នៅក្នុងវិស័យការងាររបស់ពួកគេ ដោយសារតែនិន្នាការភេទ អត្តសញ្ញាណយេនឌ័រ និងការបង្ហាញនូវទំនោរយេនឌ័រ ឬលក្ខណៈផ្លូវភេទ ។
ខិត្តប័ណ្ណព័ត៌មាននេះ បង្ហាញប្រភេទ និង ផលប៉ះពាល់ នៃការរើសអើងជាមូលដា្ឋន ដោយផ្អែកលើនិន្នាការភេទ អត្តសញ្ញាណយេនឌ័រ និងការបង្ហាញនូវទំនោរយេនឌ័រ ឬលក្ខណៈផ្លូវភេទនៅកម្ពុជា/ការវាយតម្លៃ នៃការខកខានខាងផ្លូវច្បាប់ ក្នុងការការពារការរើសអើង អ្នកស្រឡាញ់ភេទដូចគ្នា និងការផ្ដល់អនុសាសន៍ដល់និយោជក/សហគមន៍អន្ដរជាតិ ក៏ដូចជា រាជរដ្ឋាភិបាល ដើម្បីធ្វើឲ្យសម្រេចបាននូវសិទ្ធិអ្នកស្រឡាញ់ភេទដូចគ្នា។ សិទ្ធិអ្នកស្រឡាញ់ភេទដូចគ្នា គឺជាសិទ្ធិមនុស្ស៕
ដោយ៖កូឡាប