ខេត្តប៉ៃលិនៈ លោកជំទាវ បាន ស្រីមុំ បានសូមអំពាវនាវឲ្យបងប្អូនខ្មែរ រួមជាមួយបងប្អូនសាសនិកខ្មែរឥស្លាមទូទាំងខេត្តប៉ៃលិន កុំរើអើងប្រកាន់សាសនាពូជសាសន៍ សូមរួមគ្នា ប្រយុទ្ធប្រឆាំងទប់ស្កាត់ ដោយបន្តរស់នៅស្អាតកុំធ្វេសប្រហែស ដើម្បីចូលរួមប្រយុទ្ធប្រឆាំងការរីករាលដាលមេរោគជំងឺកូវីដ១៩។
បងប្អូនសាសនិកខ្មែរ ឥស្លាមខេត្តប៉ៃលិន ចំនួន ២១៥គ្រួសារ ត្រូវបានលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន អញ្ជើញជួបសំណេះសំណាលសួរសុខទុក្ខ និងនាំយកគ្រឿងឧបភោគបរិភោគ ទៅចែកជួនក្នុងខែបួសរ៉ម៉ាឌន កាលពីរសៀលថ្ងៃទី១៦ ខែឧសភា ឆ្នាំ២០២០។
លោកជំទាវបាន ស្រីមុំ អ្នកតំណាងរាស្ត្រមណ្ឌលប៉ៃលិន បានមានប្រសាសន៍ថា ការសួរសុខទុក្ខដោយក្តីនឹករលឹក និងអរគុណយ៉ាងជ្រាលជ្រៅបំផុត ពីសំណាក់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ជូនចំពោះបងប្អូនសាសនិកខ្មែរឥស្លាមទូទាំងខេត្តប៉ៃលិន។ ជានិច្ចកាលសម្តេច តែងតែគិតគូរពីសុខទុក្ខ និងជីវភាពរស់នៅ របស់ប្រជាពលរដ្ឋគ្រប់រូប គ្រប់ក្រុមគ្រួសារ នៅគ្រប់កាលៈទេសៈ និងគ្រប់ទីកន្លែង។ ពុកម៉ែបងប្អូនកូនក្មួយ សាសនិកខ្មែរឥស្លាមទាំងអស់ ក៏ជាសាច់ឈាម ខ្មែរតែមួយដូចគ្នា មានសិទ្ធិស្មើៗគ្នា គ្រាន់តែកាន់ជំនឿសាសនា ទំនៀមទម្លាប់ ប្រពៃណី ផ្សេងៗគ្នាតែប៉ុណ្ណោះ។
លោកជំទាវ បាន ស្រីមុំ បានសូមអំពាវនាវឲ្យបងប្អូនខ្មែរ រួមជាមួយបងប្អូនសាសនិកខ្មែរឥស្លាមទូទាំងខេត្តប៉ៃលិន កុំរើអើងប្រកាន់សាសនាពូជសាសន៍ សូមរួមគ្នា ប្រយុទ្ធប្រឆាំងទប់ស្កាត់ ដោយបន្តរស់នៅស្អាតកុំធ្វេសប្រហែស ដើម្បីចូលរួមប្រយុទ្ធប្រឆាំង ការរីករាលដាលមេរោគជំងឺកូវីដ១៩។
បើទោះបីនៅពេលនេះ ក្នុងប្រទេសកម្ពុជា បានស្ងប់ស្ងាត់ និងបានព្យាបាលអ្នកជំងឺកូវីដ១៩ ជាសះស្បើយអស់យ៉ាងណាក៏ដោយ ក៏សូមឲ្យបងប្អូនទាំងអស់ បន្តរស់នៅដោយប្រុងប្រយ័ត្នខ្ពស់ ពីសុខភាពផ្ទាល់ខ្លួន និងក្រុមគ្រួសារ ការរស់នៅត្រូវស្អាត មានអនាម័យ លាងដៃឲ្យបានញឹកញាប់ជាមួយសាប៊ូ និងទឹកស្អាត ឬទឹកអាល់កុល ស្នាក់នៅក្នុងផ្ទះបើគ្មានការចាំបាច់ចេញទៅក្រៅ មានការប្រមូលផ្តុំគ្នា ពាក់ម៉ាស ឬកន្សែងឲ្យបានត្រឹមត្រូវ នៅពេលចេញទៅក្រៅ រក្សាគម្លាតពីគ្នា ២ម៉ែត្រ នៅពេលជួបសន្ទនាគ្នា។ ចំពោះបងប្អូនប្រជាពលរដ្ឋ ចំណូលមកក្នុងស្រុក សូមស្នាក់នៅដាច់ដោយឡែក ពីសាច់ញាតិបងប្អូនក្រុមគ្រួសារ មិត្តភក្តិ រយៈពេល១៤ថ្ងៃសិន។
បើមានករណីថា សង្ស័យ ដូចជាផ្តាស្សាយ ហៀសំបោរ មានកំដៅលើសពី ៣៧,៥អង្សា ក្អកស្ងួត ឈឺបំពង់ក ពិបាកដកដង្ហើម សូមប្រញ៉ាប់ទៅកាន់មណ្ឌលសុខភាព ឬមន្ទីរពេទ្យបង្អែកដែលនៅជិតផ្ទះបំផុត ឬទំនាក់ទំនងទៅកាន់លេខ១១៥ ឬរាយការណ៍ជូនអាជ្ញាធរភូមិ ឃុំ សង្កាត់ ដែលនៅកៀកជាប់ផ្ទាល់ជាមួយបងប្អូន ដើម្បីបញ្ជូនបងប្អូនទៅកាន់មន្ទីរពេទ្យ ធ្វើការពិព្យាបាលជំងឺជូនផងដែរ៕
ដោយៈ អ៊ុងសារុំ
