ភ្នំពេញ៖ លោកឧកញ៉ា ហេង ឡុង បានសរសេរលើហ្វេសប៊ុកថា តារាកំប្លែងនាងឃ្មឹប ពិតជាត្រូវបានអធិការខណ្ឌដូនពេញ ឃាត់ខ្លួនពីបទប្រើប្រាស់គ្រឿងញៀន នៅថ្ងៃទី១៦ ខែឧសភា ឆ្នាំ២០២០ វេលាម៉ោង ១៧និង០០នាទី ពិតប្រាកដមែន។ រង់ចាំទទួលដំណឹងស្អែក ថាតើគាត់ត្រូវបានច្បាប់សម្រេចយ៉ាងណា។ សូមយុវជនចៀសឲ្យឆ្ងាយពីគ្រឿងញៀន។
គួរកត់សម្គាល់ថា ប្រហែលជាប្រិយមិត្តមិនភ្លេចតារាកំប្លែងស្រីនាងឃ្មឹបទេ ។ កាលពីមុនតារាកំប្លែងស្រីរូបនេះ មានជីវភាពសមរម្យ រូបសម្រស់ស្រស់ស្អាត ហើយអាជីពជាតារាកំប្លែងក្នុងក្រុមនាយកុយ ក៏មានភាពកាក់កបគួរសម ។
តែក្រោយពីនាងបែកបាក់ជាមួយនាយហុងដា ជាស្វាមី នាងឃ្មឹប ក៏បានរសាត់ឆ្ងាយពីវិស័យសិល្បៈសូន្យឈឹង លុះពេលនាងលេចមុខនៅពេលនេះ ស្រាប់តែរូបសម្រស់នាងឃ្មឹបមានការប្រែប្រួលអាក្រក់ខ្លាំងមើលសឹងមិនស្គាល់ សូម្បីតែជីវភាព ក៏ធ្លាក់ដុនដាបខ្លាំង រហូតដល់ថ្នាក់សមាគមមិត្តសិល្បៈស្ម័គ្រចិត្តជួយសង្គម ជួយចេញថ្លៃព្យាបាលជំងឺឲ្យនាង។
ក្រោយជួបរឿងបញ្ហាជីវិតដុនដាបមិននឹកស្មានដល់ ពេលនេះនាងឃ្មឹប មានឱកាសចូលសម្តែងកំប្លែងជាថ្មី ជាមួយក្រុមនាយកុយវិញហើយ បន្ទាប់ពីប្រធានក្រុមកំប្លែងនេះបានជួយពន្យល់ទៅកាន់នាយហុង ឲ្យមានការយោគយល់។
ក្រោយការពន្យល់និងសម្របសម្រួលរបស់លោក ហេង ឡុង ស្វាមីអ្នកនាង ចន ច័ន្ទលក្ខិណានោះ នាយ កុយ ព្រមទទួលយកនាង ឃ្មឹប មកចូលក្រុមកំប្លែងរបស់ខ្លួនដដែល។ មុនពេលសម្រេចទទួលយកនាង ឃ្មឹប ចូលក្នុងក្រុមកំប្លែងរបស់ខ្លួនវិញ នាយ កុយ បានទំនាក់ទំនងទៅនាយ ហុងដា ពន្យល់ហេតុផលដែលលោកព្រមទទួលយកអតីតតារាកំប្លែងរូបនេះចូលក្នុងក្រុមកំប្លែងវិញ។ បន្ទាប់ពីបានពន្យល់ហេតុផល នាយ ហុងដា បានយល់ព្រមឲ្យអតីតភរិយាចូលក្រុមកំប្លែងរបស់ខ្លួនវិញម្ដងទៀត។
នាង ឃ្មឹប បានចូលក្នុងក្រុមកំប្លែងវិញមិនបានប៉ុន្មានផង ក៏បានខ្លួនសូន្យឈឹង រហូតមកដល់នៅថ្ងៃទី១៦ ខែមេសា ឆ្នាំ២០២០ ស្រាប់តែនគរបាលនៃអធិការដ្ឋានខណ្ឌដូនពេញ បានចាប់ខ្លួននាងខ្មឹប អតីតតារាកំប្លែងរូបនេះ ពាក់ព័ន្ធនឹងករណីជួញដូរ និងប្រើប្រាស់គ្រឿងញៀន។ ជីវិតនាងឃ្មឹបនៅពេលនេះ កាន់តែធ្លាក់ខ្លួនក្នុងជ្រោះជ្រៅថែមទៀត ដែលមិនអាចស្តារឡើងវិញបានឡើយ ព្រោះប្រឈមនឹងចំណាត់ការរបស់សមត្ថកិច្ចត្រូវកសាងសំណុំរឿងបញ្ជូនទៅតុលាការ ដើម្បីចាត់វិធានការតាមច្បាប់។
សូមបញ្ជាក់ថា នៅថ្ងៃទី១៦ ខែមេសា ឆ្នាំ២០២០ វេលាម៉ោង១៧នាទី ដោយអនុវត្តន៍តាមបទបញ្ជាដ៏ខ្ពង់ខ្ពស់របស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ និងលោក សុខ ពេញវុធ អភិបាល នៃគណៈអភិបាល ខណ្ឌដូនពេញ អធិការដ្ឋាន ប៉ុស្តិ៍ បានបើកការស្រាវជ្រាវបង្ក្រាបករណីជួញដូរនិងប្រើប្រាស់ដោយខុសច្បាប់នូវសារធាតុញៀន ស្ថិតនៅចំណុចបាចតុមុខ ផ្លូវជាតិលេខ៥ ភូមិ១៦ សង្កាត់ស្រះចក ខណ្ឌដូនពេញ។
ជាលទ្ធផលនៃកិច្ចប្រតិបត្តិការណ៍នេះ កម្លាំងសមត្ថកិច្ចយើងបានធ្វើការឃាត់ខ្លួនជនសង្ស័យចំនួន៧នាក់ (ស្រី៣) រួមមាន៖ ១/ឈ្មោះ ឈួន សំណាង ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅទីតាំងខាងលើ (ជួញដូរ)។ ២/ឈ្មោះ ឈួន រ៉ាទី ភេទស្រី អាយុ១៦ឆ្នាំ ជនជាតិខ្មែរ ស្នាក់នៅទីតាំងខាងលើ មុខរបរមិនពិតប្រាកដ(ប្រើប្រាស់)។ ៣/ឈ្មោះ វណ្ណា វណ្ណី ភេទប្រុស អាយុ៣០ឆ្នាំ ជនជាតិខ្មែរ ស្នាក់នៅនិងមុខរបរមិនពិតប្រាកដ(ប្រើប្រាស់) ។ ៤/ឈ្មោះ រ៉េន សុធារី (ហៅ ឃ្មឹប) ភេទស្រី អាយុ៤៦ឆ្នាំ ជនជាតិខ្មែរ ស្នាក់នៅនិងមុខរបរមិនពិតប្រាកដ(ប្រើប្រាស់)។ ៥/ឈ្មោះ ប្រាក់ បញ្ញា ភេទប្រុស អាយុ១៩ឆ្នាំ ជនជាតិខ្មែរ ស្នាក់នៅនិងមុខរបរមិនពិតប្រាកដ(ប្រើប្រាស់)។ ៦/ឈ្មោះ មុត បញ្ញា ភេទប្រុស អាយុ៣០ឆ្នាំ ជនជាតិខ្មែរ ស្នាក់នៅនិងមុខរបរមិនពិតប្រាដក(ប្រើប្រាស់)។ ៧/ឈ្មោះ ម៉ៅ ម៉ាប់ ភេទស្រី អាយុ៣៥ឆ្នាំ ជនជាតិខ្មែរ ស្នាក់នៅនិងមុខរបរមិនពិតប្រាកដ(ប្រើប្រាស់)។
វត្ថុតាងដែលបានដកហូតរួមមាន៖ ក្រាមពណ៌សថ្លាសង្ស័យជាគ្រឿងញៀនចំនួន១៥កញ្ចប់។ ថង់ប្លាស្ទិចសំរាប់ច្រកគ្រឿងញៀនមួយចំនួន។ ឧបករណ៍ប្រើប្រាស់គ្រឿងញៀនមួយចំនួន។
ចំពោះមុខ កម្លាំងជំនាញខណ្ឌ ប៉ុសិ៍្ត កំពុងយកចម្លើយបន្តស្រាវជ្រាវរកបក្ខពួកនិង ក្រុមដទៃផ្សេងទៀត ព្រមទាំងកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញ អនុវត្តតាមនីតិវិធី៕
ដោយ៖កូឡាប