បរទេស៖ ចំនួនមនុស្សស្លាប់សរុបដោយសារវីរុស Covid-19 បានកើនឡើងដល់ ៣១៦.៥១៤នាក់ហើយ នៅជុំវិញពិភពលោក គិតត្រឹមថ្ងៃចន្ទ ទី១៨ ខែឧសភា ឆ្នាំ២០២០នេះ ស្របពេលដែលអ្នកជំងឺវីរុស Covid-19 ប្រមាណ ១.៨៥៥.១៥០នាក់ បានជាសះស្បើយ ពីវីរុសផ្លូវដង្ហើមមួយនេះ ដែលនេះបើតាមការចុះផ្សាយរបស់ Worldometer ។
ចំណែកការឆ្លងរាលដាលនៃវីរុស Covid-19 នៅជុំវិញពិភពលោក ក៏នៅតែបន្តកើនឡើង ឥតឈប់ឈរជារៀងរាល់ថ្ងៃផងដែរ ដែលរហូតដល់ថ្ងៃចន្ទដដែលនេះ កំណើនមនុស្សឆ្លងវីរុសនេះ បានកើនឡើងដល់ជិត ៥លាននាក់ហើយ គឺចំនួន ៤.៧៩៩.០៨៨នាក់។
សូមបញ្ជាក់ជូនថា សហរដ្ឋអាមេរិក គឺជាប្រទេសឈរ ក្នុងលំដាប់ថ្នាក់លេខ១ នៅលើពិភពលោក ដែលមានមនុស្សឆ្លង និងមនុស្សបាត់បង់ជីវិត ដោយសារវីរុស Covid-19 ច្រើនជាងគេ គឺមានមនុស្សឆ្លងសរុបរហូតដល់ ១.៥២៧.៤៨៦នាក់ និងមនុស្សស្លាប់សរុបមានចំនួន ៩០.៩៧៣នាក់៕
ដោយ៖បញ្ញាស័ក្តិ
