ហាងលក់ទំនិញ ភោជនីយដ្ឋាន និងហាងកាត់សក់នៅក្នុងប្រទេសអ៊ីតាលី នឹងបើកដំណើរការឡើងវិញចាប់ពីថ្ងៃចន្ទ ខណៈដែលរដ្ឋាភិបាលនៃប្រទេសនេះ បានបន្ធូរបន្ថយបន្ថែមនូវវិធានការបិទប្រទេស ហើយរដ្ឋាភិបាលបញ្ជាក់ថា ខ្លួនកំពុងតែប្រថុយប្រថាន ក្នុងការដាក់ប្រទេសឲ្យដំណើរការធម្មតាវិញ។
ប្រទេសសេដ្ឋកិច្ចធំបំផុតទី ៣ក្នុងតំបន់អ៊ឺរ៉ុបនេះ កំពុងតែងើបចេញយឺតៗពីការបិទប្រទេសអស់រយៈពេលជាង ២ខែ ដោយអាជីវកម្មទាំងអស់ត្រូវបានអនុញ្ញាតឲ្យបើកដំណើរឡើងវិញជាបន្តបន្ទាប់ ដរាបណាពួកគេអនុម័យវិធានការអនាម័យ និងដាក់ភ្ញៀវឲ្យស្ថិតនៅចំងាយ ១ម៉ែត្រពីគ្នា។
សូមបញ្ជាក់ថា អ៊ីតាលីជាប្រទេសមួយក្នុងចំណោមប្រទេសរងគ្រោះខ្លាំងបំផុត ពីការផ្ទុះវីរុសកូរ៉ូណាដោយតួលេខចុងក្រោយ បានបង្ហាញថា អ៊ីតាលីមានអ្នកស្លាប់ចំនួនជិត ៣២.០០០នាក់ ខណៈដែលអ្នកឆ្លងមានជាង ២២៥.០០០នាក់។
ប្រទេសនេះស្ថិតនៅចំណាត់ថ្នាក់លេខ ៦ជាប្រទេសមានអ្នកឆ្លងវីរុសកូរ៉ូណាច្រើនបំផុត និងលេខ ៣ជាប្រទេសមានអ្នកស្លាប់ច្រើន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
