ភ្នំពេញ៖ ការរីករាលដាលនៃជំងឺកូវីដ-១៩ មានការដ្ឋានសំណង់ជាច្រើន បានបាត់បង់កម្លាំងពលកម្ម។ ក្នុងនោះ មានការខ្វះខាតកម្លាំងពលកម្មទាំងកម្មករជំនាញ និងកម្មករគ្មានជំនាញ ហើយនៅតាមការដ្ឋានសាងសង់នានា ដូចជា បុរីលំនៅឋាន និងខុនដូមួយចំនួន មានការយឺតយ៉ាវនៃការសាងសង់ ធ្វើឲ្យយូជាងកាលកំណត់ ។
យោងតាមរបាយការណ៍ក្រសួងរៀបចំដែនដី នគររូបនីយកម្ម និងសំណង់ បានបង្ហាញថា នៅត្រីមាសទីមួយ ឆ្នាំ២០២០នេះ កម្លាំងពលកម្មផ្នែកវិស័យសំណង់មានការថយចុះប្រមាណជាង១០% នៅទូទាំងប្រទេស ពោលគឺថយពី ១២ម៉ឺននាក់ ក្នុងមួយថ្ងៃ មកនៅត្រឹមជាង ១០ម៉ឺននាក់ក្នុងមួយថ្ងៃប៉ុណ្ណោះ។
នៅក្នុងរបាយការណ៍ដ៏ដែលនោះ បានបញ្ជាក់ថា កម្មករធ្វើការផ្នែកសំណង់ ដែលមានជំនាញ អាចទទួលបានប្រាក់កម្រៃពី ៤ម៉ឺន ទៅ៦ម៉ឺនរៀល ក្នុងមួយថ្ងៃ ហើយកម្មករដែលគ្មានជំនាញ អាចទទួលបានពី ៣ម៉ឺន ទៅ៤ម៉ឺនរៀល ក្នុងមួយថ្ងៃ។ ដោយឡែក ចំពោះវិស្វករ ស្ថាបត្រករ និងអ្នកជំនាញផ្សេងៗទៀត អាចទទួលបានប្រាក់ខែពី ៤០០ដុល្លារ ទៅ ២.៥០០ដុល្លារ ក្នុងមួយខែ។
បើតាមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលធ្លាប់ប្រសាសន៍កន្លងទៅ បានឲ្យដឹងថា កម្ពុជា ត្រូវការកម្លាំងពលកម្មជំនាញបន្ថែមទៀតក្នុងវិស័យសំណង់ និងបានលើកទឹកចិត្តឲ្យយុវជននាំគ្នារៀនជំនាញបច្ចេកទេស និងវិជ្ជាជីវៈ ព្រោះទីផ្សារការងារកំពុងត្រូវការជាចាំបាច់ ក្នុងការចូលរួមអភិវឌ្ឍប្រទេសជាតិ។
គួរបញ្ជាក់ថា ទិន្នន័យសំណង់នៅទូទាំងប្រទេស ក្នុងរយៈពេលត្រីមាសទី១ ឆ្នាំ២០២០ មានគម្រោងសរុប ១.១១៦គម្រោង គិតជាទំហំទឹកប្រាក់ប្រមាណជាង ២.៥០០លានដុល្លារ កើនឡើងជាង៥០% ធៀបនឹងរយៈពេលដូចគ្នាកាលពីឆ្នាំ ២០១៩កន្លទៅ៕
ដោយ៖សម្ផស្ស