ម្ចាស់ហាងកាហ្វេ Cafe Rothe ស្ថិតនៅ Schwerin ត្រូវបានអនុញ្ញាតិឱ្យបើកទ្វារបម្រើសេវាដល់ភ្ញៀវឡើងវិញ កាលពីថ្ងៃសៅរ៍សប្តាហ៍មុន បន្ទាប់ពីការរឹតបន្តឹងស្ថានការណ៍កូវីដ១៩ ត្រូវបានបញ្ចប់។
ខណៈពេលដែលប្រជាពលរដ្ឋគ្រប់គ្នាមានការរំភើប ចំពោះការបើកដំណើរការឡើងវិញនេះ ហាងកាហ្វេខាងលើនេះបានប្រារព្ធពិធីរបស់ពួកគេ ដោយផ្តល់នូវមូកឆាងម៉ាងដ៏ចម្លែក ទៅឱ្យអតិថិជនរបស់ខ្លួន ដើម្បីរក្សាការស្ថិតនៅឆ្ងាយពីគ្នា។
ជំនួសឲ្យការគូរគំនូសនៅលើកម្រាល ដើម្បីឲ្យមនុស្សនៅដាច់ដោយឡែកពីគ្នា ម្ចាស់ហាងកាហ្វេនេះនឹកឃើញនូវគំនិតច្នៃប្រឌិតមួយ ដោយយកបំពង់ស្នោអាងហែលទឹក២ ដាក់ខ្វែងគ្នាលើផ្នែកខាងលើនៃមួក។ វាពិតជាគួរឱ្យអស់សំណើចណាស់ ដែលមើលឃើញពីរបៀបដែលការឃ្លាតឆ្ងាយពីសង្គម អាចត្រូវបានធ្វើដោយច្នៃប្រឌិតបែបនេះ។
ម្ចាស់ហាងកាហ្វេបានចែករំលែករូបភាពនៅលើទំព័រហ្វេសបប៊ុកកាហ្វេរបស់ពួកខ្លួន ឃើញថាទទួលបានការចាប់អារម្មណ៍យ៉ាងច្រើននៅលើបណ្តាញសង្គម ។ មនុស្សជាច្រើនបានចែករំលែក និងផុសឡើងវិញពីរូបភាពនេះ ដោយលាន់មាត់ថា វាពិតជាអស្ចារ្យមែនទែន។
ម្ចាស់ហាងកាហ្វេឈ្មោះ Rothe អាយុ ៥៤ ឆ្នាំ បានប្រាប់ CNN ថា មានអតិថិជនយ៉ាងច្រើនបានសម្រុកមកហាងកាហ្វេរបស់ខ្លួន ដើម្បីរីករាយនឹងកាហ្វេ នំ ឬ ស្រាបៀរ នៅក្រោមពន្លឺថ្ងៃ។ Rothe បានបញ្ជាក់ថា នេះជាវិធីសាស្ត្រដ៏ល្អបំផុត ដើម្បីរក្សាអតិថិជនឲ្យនៅដាច់ពីគ្នា។
អ្នកស្រីក៏បានលើកឡើងថា វាមិនងាយស្រួលទេក្នុងការរក្សាចម្ងាយសុវត្ថិភាព ១,៥ ម៉ែត្រ ទេ ហើយអ្នកស្រីរីករាយជាខ្លាំង ដែលអតិថិជនរបស់អ្នកស្រីពេញចិត្តពាក់មួក DIY-ed ៕
ប្រែសម្រួល៖ លឹម ហុង (ប្រភព៖ worldofbuzz)