បន្ទាយមានជ័យ៖ មនុស្ស៥នាក់កំពុងលួចលក់ និងជក់ថ្នាំញៀន ព្រមទាំងកាំបិត កាំភ្លើង ត្រូវបានកម្លាំងនគរបាលការិយាល័យប្រឆាំងគ្រឿងញៀន ស្នងការដ្ឋាននគរបាលខេត្តបន្ទាយមានជ័យ ចុះបង្ក្រាបកាលពីម៉ោង១២យប់ឈានចូល ថ្ងៃទី១៨ ខែឧសភា ឆ្នាំ២០២០
ក្នុងក្រុងប៉ោយប៉ែត ខេត្តបន្ទាយមានជ័យ ។
ស្នងការរងទទួលបង្ក្រាបគ្រឿងញៀន គឺលោកវរសេនីយ៍ង៉េង សុជា នៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា៖ ជនសង្ស័យដែលមានលំនៅទីទៃពីគ្នា ១៖ ឈ្មោះ អៀន គឹមហុង ភេទប្រុស អាយុ២៧ឆ្នាំ មុខរបរមិនពិតប្រាកដ មាននៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ ២៖ឈ្មោះ សន ចិន្តា ភេទប្រុស អាយុ៣៧ឆ្នាំ មុខរបរកសិករ មានទីលំនៅភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប ។ ៣៖ឈ្មោះ អឿន តារ៉ា ភេទប្រុស អាយុ២៣ឆ្នាំ មុខរបរមិនពិតប្រាកដ មានទំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត។ ៤៖ ឈ្មោះ សេក ភារុន ភេទប្រុស អាយុ២៥ឆ្នាំ ស្នាក់នៅបន្ទប់ជួលភូមិអូរឫស្សី សង្កាត់ផ្សារកណ្តាល មុខរបរកម្មករ។ និង៥ ៖ ឈ្មោះ ទូច ចាន់ថា ភេទប្រុសអាយុ១៨ឆ្នាំ បន្ទប់ជួលភូមិអូរឫស្សី សង្កាត់ផ្សារកណ្តាល ។
សមត្ថកិច្ចនគរបាលធ្វើការដកហូត បានម្សៅក្រាមសថ្លាចំនួន៣កូនថង់តូច ថ្នាំញៀនប្រភេទមេតំហ្វេតាមីន គ្រាប់ពណ៌ផ្កាឈូកចំនួនកន្លះគ្រាប់ ដបកែច្នៃ សម្រាប់ជក់គ្រឿងញៀន២បំពង់កែវ១កំណាត់ ។
កំណាត់បំពង់បឺតច្នៃសម្រាប់ជក់គ្រឿងញៀនមួយចំនួន។ ក្នុងនោះក៏មានទាំង កាំបិតវែង២ដើម កូនកាំបិត៣ដើម សម្បកថង់មួយចំនួន ដែកកេះ៣ និងទូរស័ព្ទដៃ៣គ្រឿងនិងកាំភ្លើងខ្លីមិនស្គាល់ធុន អត់មានបង់ អត់មានគ្រាប់ ១ដើមផងដែរ ៕ ដោយ ៖ បន្ទាយ