ភ្នំពេញ៖ ក្រសួងសុខាភិបាលកម្ពុជា បានច្រានចោលទាំងស្រុងនូវព័ត៌មាន ដែលបានចុះផ្សាយដោយកាសែតព័ត៌មានរបស់វៀតណាមឈ្មោះ Vietnam News ចុះផ្សាយនាថ្ងៃទី១៦ ខែឧសភា ឆ្នាំ២០២០ ស្តីពីករណីបុរសជនជាតិវៀតណាមម្នាក់ ដែលបានចាកចេញពីកម្ពុជាថា មានផ្ទុកជំងឺកូវីដ១៩។
ក្រសួងសុខាភិបាល នៅយប់ថ្ងៃទី១៨ ខែឧសភា ឆ្នាំ២០២០នេះ បានចេញសេចក្តីជូនព័ត៌មាន ស្តីពីការច្រានចោលទាំងស្រុង ករណីបុរសជនជាតិវៀតណាម មានវិជ្ជមានវីរុសកូវីដ១៩ ចេញពីកម្ពុជា ។
ករណីនេះ ក្រសួងសុខាភិបាលកម្ពុជា តាមរយៈនាយករដ្ឋានប្រយុទ្ធនឹងជំងឺឆ្លង និងការងារចត្តាឡីស័កនៃមន្ទីរសុខាភិបាល និងអាជ្ញាធរនៃខេត្តសៀមរាប បានរុករកស្រាវជ្រាវ ដោយយកចិត្តទុកដាក់ជាទីបំផុត និងជាបន្ទាន់ តែមិនមានឈ្មោះជនជាតិវៀតណាម ដូចការចុះផ្សាយនៅក្នុងកាសែតវៀតណាម នៅខេត្តសៀមរាបនោះទេ ហើយការលើកឡើងថា ជនជាតិវៀតណាមរូបនេះ រស់នៅខេត្តសៀមរាប មានផ្ទុកជំងឺកូវីដ១៩នោះ ក៏មិនមែនជាការពិតទេ។
បើតាមសេចក្តីប្រកាសរបស់ក្រសួងសុខាភិបាលកម្ពុជា ក្រសួងបានវាយតម្លៃថា ដោយសារមិនមានឈ្មោះបុគ្គលនោះនៅកម្ពុជាដូចការលើកឡើង ការឆ្លងវីរុសកូវីដ១៩ របស់បុគ្គលជនជាតិវៀតណាមរូបនេះ គឺកើតឡើងនៅប្រទេសវៀតណាមតែម្តង។
ក្រសួង សូមអំពាវនាវដល់ភាគីវៀតណាម សូមគោរពតាមបទដ្ឋានបច្ចេកទេស និងគោលការណ៍និយ័តកម្មអន្តរជាតិ លើករណីជំងឺឆ្លង មុននឹងធ្វើការសន្និដ្ឋាន ឬចុះផ្សាយដែលជាការប៉ះបាល់ធ្ងន់ធ្ងរដល់កិច្ចខិតខំប្រឹងប្រែងរបស់កម្ពុជា ជាពិសេសនៅក្នុងដំណាក់កាលប្រយុទ្ធនឹងជំងឺកូវីដ១៩នេះ ដើម្បីជាផលប្រយោជន៍ដល់ប្រជាជនទាំងពីរប្រទេស។
ក្រសួងសុខាភិបាល នៅតែប្រកាន់ជំហរសហប្រតិបត្តិការល្អ មានតម្លាភាពជានិច្ច និងបន្តការយកចិត្តទុកដាក់ស្រាវជ្រាវជាបន្តទៀត ហើយប្រសិនបើមានព័ត៌មាន ឬក៏មានការវិវឌ្ឍថ្មីណាមួយដែលពាក់ព័ន្ធទៅនឹងជំងឺកូវីដ១៩នេះ ក្រសួងសុខាភិបាល នឹងជម្រាបជូនសាធារណជនឲ្យបានជ្រាបជាមិនខាងឡើយ។ សូមបញ្ជាក់ជូនសាជាថ្មីថា មកទល់ថ្ងៃនេះ ក្រសួងសុខាភិបាលកម្ពុជា មិនមានរកឃើញមានករណីវីរុសកូវីដ១៩ថ្មីនៅកម្ពុជានោះទេ៕
ដោយ៖កូឡាប
