ភ្នំពេញ៖ ក្រសួងសាធាណការ និងដឹកជញ្ជូន នៅថ្ងៃទី១៨ ខែឧសភា ឆ្នាំ២០២០ បានចេញសេចក្តីជូនដំណឹងស្តីពីការប្តូរប័ណ្ណសម្គាល់យានជំនិះ និងផ្លាកលេខសម្គាល់យានជំនិះរបស់ក្រសួង ស្ថាប័នរដ្ឋ អង្គការ និងស្ថានទូត។
ក្រសួសាធារណការនិងដឹកជញ្ជូន សូមជម្រាបជូនដល់ម្ចាសគ្រប់យានជំនិះដែលជាកម្មសិទ្ធិរបស់ក្រសួង ស្ថាប័នរដ្ឋ អង្គការ ស្ថានទូត ប្តូរប័ណ្ណសម្គាល់យានជំនិះ និងផ្លាកលេខសម្គាល់យានជំនិះថ្មី ស្របតាមអនុក្រឹត្យរបស់រាជរដ្ឋាភិបាល និងប្រកាសថ្មី របស់ក្រសួង ស្តីពីការផ្លាស់ប្តូរផ្លាកលេខសម្គាល់យានជំនិះឱ្យបានមុនថ្ងៃទី៣០ ខែតុលា ឆ្នាំ២០២០។
យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន បានបញ្ជាក់ថា រាជរដ្ឋាភិបាលបានចេញអនុក្រឹត្យ លេខ៧៣ អនក្រ.បក ចុះថ្ងៃទី៣ ខែមិថុនា ឆ្នាំ២០១៩ ស្តីពី «ការចុះបញ្ជីផ្តល់ប័ណ្ណសម្គាល់យានជំនិះ និងបំពាក់ផ្លាកលេខយានជំនិះ» និងយោងប្រកាសលេខ១៦៣ ប្រក.សក.ដជក ចុះថ្ងៃទី២២ ខែមេសា ឆ្នាំ២០២០ស្តីពី «ការកំណត់ប្រភេទលេខសម្គាល់យានជំនិះជាសម្បត្តិរដ្ឋរបស់ក្រសួង ស្ថាប័ន របស់ក្រសួង ស្ថាប័ន» ក្នុង ក្នុងគោលបំណងគ្រប់គ្រងយានជំនិះ ជាសម្បត្តិរដ្ឋរបស់ក្រសួង ស្ថាប័ន ដើម្បីធានាឱ្យបាននូវសន្តិសុខ សណ្តាប់ធ្នាប់ សុវត្ថិភាព និងសិទ្ធិជាកម្មសិទ្ធិ លើយានជំនិះរបស់ក្រសួង ស្ថាប័ន ជាពិសេសដើម្បីបង្កភាពងាយស្រួល ក្នុងការគ្រប់គ្រងផ្លាកលេខសម្គាល់យានជំនិះ ដោយបានកែសម្រួល និងកំណត់លេខកូដសម្គាល់ផ្លាកលេខរបស់ក្រសួង ស្ថាប័នមួយចំនួនជាថ្មី តាមលំដាប់លេខកូដសម្គាល់ចាប់ពីរដ្ឋ០១ ដល់រដ្ឋ៣៦។
ក្រសួងសាធារណការ បានស្នើដល់ក្រសួង ស្ថាប័នទាំងអស់ដែលជាម្ចាស់គ្រប់គ្រងយានជំនិះ មេត្តារៀបចំធ្វើបច្ចុប្បន្នភាពបញ្ជីសារពើភ័ណ្ឌយានជំនិះ ដែលកំពុងប្រើប្រាស់នៅអង្គភាពរបស់ខ្លួនរួចបញ្ជូនមកក្រសួងសាធារណការនិងដឹកជញ្ជូន និងត្រូវបំពេញបែបបទស្នើសុំប្តូរប័ណ្ណសម្គាល់យានជំនិះ និងផ្លាកលេខសម្គាល់យានជំនិះ ឲ្យស្របតាមខ្លឹមសារនៃអនុក្រឹត្យ និងប្រកាសថ្មីនេះ នៅអគ្គនាយកដ្ឋានដឹកជញ្ជូនផ្លូវគោក ឲ្យបានមុខថ្ងៃទី៣០ ខែតុលា ឆ្នាំ២០២០។
ក្នុងសេចក្តីជូនដំណឹងនេះ ក្រសួងសាធារណការ និងដឹកជញ្ជូន សង្ឃឹមយ៉ាងមុតមាំថា ម្ចាស់គ្រប់គ្រងយានជំនិះជារបស់ក្រសួង ស្ថាប័នពាក់ព័ន្ធទាំងអស់ នឹងចូលរួមសហការ អនុវត្តតាមខ្លឹមសារជូនដំណឹងនេះ ដើម្បីប្រើប្រាស់ប័ណ្ណសម្គាល់យានជំនិះ និងផ្លាកលេខសម្គាល់យានជំនិះ ឱ្យស្របតាមច្បាប់ដែលបានកំណត់៕
ដោយ៖កូឡាប
