បាត់ដំបងៈកម្លាំងនគរបាលការិយាល័យជំនាញព្រហ្មទ័ណ្ឌកំរិតស្រាល បានបង្ក្រាបចាប់ក្រុមក្មេងស្ទាវ៤នាក់ប្រដាប់ដោយកាំបិតខ្វែវជិះម៉ូតូដេញកាប់បុរសម្នាក់រងរបួសជាច្រើនកន្លែង(រឿងគំនុំ)កសាងសំណុំរឿងបញ្ជួនទៅតុលាការ ដើម្បីចាត់ការទៅតាមផ្លូវច្បាប់។
ហេតុការណ៍នេះ បានកើតឡើងកាលពីវេលាម៉ោង ២៣និង៣០នាទីយប់ថ្ងៃទីទី១៦ខែឧសភាឆ្នាំ២០២០នៅចំណុចសួនច្បារ ស្ថិតក្នុងភូមិរំចេក៤សង្កាត់រតនៈ ក្រុងបាត់ដំបងខេត្តបាត់ដំបង។
លោកវរសេនីយ៍ទោ ឈឿង គឹមសុងនាយការិយាល័យព្រហ្មទណ្ឌកម្រិតស្រាលនគរបាលខេត្តបាត់ដំបង បានឲ្យដឹងថាកម្លាំងសហការជាមួយកម្លាំងអន្តរាគមន៍ បង្ការ បង្ក្រាប ចុះប្រតិបត្តិការបង្ក្រាបករណី ហិង្សាដោយចេតនាមានស្ថានទម្ងន់ទោស(កាប់ដោយកាំបិត)មួយករណី ដែលបង្កឡើងដោយក្មេងស្ទាវមួយក្រុមមានគ្នា៤នាក់ប្រដាប់ដោយកាំបិតធ្វើសកម្មភាពជិះម៉ូតូដេញកាប់យុវជនឈ្មោះឃុន ប៉ូឡា ភេទប្រុស អាយុ៣៣ឆ្នាំ មានទីលំនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបងខេត្តបាត់ដំបង បណ្ដាលឲ្យរងរបួស មុតរយះលើខ្លួនប្រាណជាច្រើនកន្លែង ។
ជនសង្ស័យចំនួន ០៤នាក់ដែលចាប់ឃាត់ខ្លួនមានទី១ឈ្មោះ លឿប ភៀន ភេទប្រុស អាយុ ២៣ឆ្នាំមានទីលំនៅភូមិតាគម ឃុំពាមឯក ស្រុកឯកភ្នំខេត្តបាត់ដំបង(ជាអ្នកកាន់កាំបិតកាប់ )។ទី២ឈ្មោះលឿន សាវីនភេទប្រុសអាយុ១៩ឆ្នាំមានទីលំនៅភូមិព្រែកឆ្ដោរ ឃុំពាមឯក ស្រុក ឯកភ្នំខេត្តបាត់ដំបង(ជាអ្នកកាន់កាំបិតកាប់)។ទី៣ឈ្មោះ វ័ន វណ្ណៈ ហៅគួយ ភេទប្រុសអាយុ១៦ ឆ្នាំមានទីលំនៅភូមិករហាល ឃុំពាមឯក ស្រុកឯកភ្នំ ខេត្តបាត់ដំបង(ជាអ្នកបើកម៉ូតូ)។ទី៤ឈ្មោះ រួម វុធ ហៅ វឹម ភេទប្រុស អាយុ ១៦ ឆ្នាំមានទីលំនៅភូមិតាគម ឃុំពាមឯក ស្រុកឯកភ្នំខេត្តបាត់ដំបង( ជាអ្នកបើកម៉ូតូ)។
ហេតុការណ៍នេះផ្តើមចេញពីគំនុំ ហើយមានក្រុមស្ទាវចំនួន ០៨នាក់ ជិះម៉ូតូចំនួន ០៤គ្រឿង ប្រដាប់ដោយកាំបិតកែច្នៃចំនួន ០៤ដើម បានធ្វើសកម្មភាពដេញកាប់ជនរងគ្រោះឈ្មោះ ឃុន ប៉ូឡា បណ្ដាលឲ្យរងរបួស មុតរយះខ្នងនិងគូទជាច្រើនកន្លែង។ វត្ថុតាងដកហូតពីក្រុមស្ទាវ៤នាក់ដែលចាប់ឃាត់ខ្លួនរួមមាន កាំបិតកែច្នៃចំនួន ០៤ដើម ម៉ូតូ២គ្រឿង។រីឯបក្សពួកចំនួន ០៤នាក់ទៀតកំពង់រត់គេចខ្លួន។
បច្ចុប្បន្ននៅរសៀលថ្ងៃទី១៨ឧសភា កម្លាំងការិយាល័យព្រហ្មទណ្ឌកម្រិតស្រាលបានកំពុងកសាងសំណុំរឿងបញ្ជូនជនសង្ស័យនិងវត្ថុតាងទៅសាលាដំបូងខេត្តបាត់ដំបង ដើម្បីចាត់ការទៅតាមផ្លូវច្បាប់៕
ដោយៈអ៊ុងសារុំ
