ភ្នំពេញ៖ នៅរសៀលថ្ងៃចន្ទ ទី១៨ ខែឧសភា ឆ្នាំ២០២០ នាទីស្តីការក្រសួងមហាផ្ទៃ បើកកិច្ចប្រជុំឆ្លងសេចក្តីព្រាងច្បាប់ ស្តីពីការបង្កើតគណៈកម្មាធិការជាតិប្រឆាំងទារុណកម្ម ក្រោមអធិបតីភាព ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្ម អំពើឃោរឃៅ អំពើអមនុស្សធម៌ អំពើធ្វើទុកបុកម្នេញ ឬទណ្ឌកម្ម និងជាប្រធានគណៈកម្មការរៀបចំសេចក្តីព្រាងច្បាប់ស្តីពីការបង្កើតគណៈកម្មធិការជាតិប្រឆាំងទារុណកម្ម និងឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ។
កិច្ចប្រជុំលើកទី៥នេះ បានពិភាក្សាបន្តពីលទ្ធផល នៃសេចក្តីព្រាងច្បាប់នេះ ក្រោយក្រុមការងារបច្ចេកទេសអន្តរក្រសួងបានប្រមូលធាតុចូលដើម្បីតាក់តែងឡើង។
មានប្រសាសន៍ក្នុងកិច្ចប្រជុំនេះ ឯកឧត្តម ប៊ុន ហុន បានឱ្យដឹងថា កិច្ចប្រជុំនេះធ្វើឡើង ដើម្បីពិក្សាទៅលើច្បាប់នៃបង្កើតគណៈកម្មការជាតិប្រឆាំងទារុណកម្ម ដោយសារពាក់ព័ន្ធជាមួយកម្ពុជា ជារដ្ឋភាគីហត្ថាលេខីនៃអនុសញ្ញាស្តីពីការប្រឆាំងការធ្វើទារុណកម្ម យោងតាមស្មារតីនេះ សម្តេចអគ្គមហាសេនាបតីតេជោហ៊ុនសែន ក៏បានអនុញ្ញាតឱ្យបង្កើតគណៈកម្មធិការមួយដែលយើងនឹងពិភាក្សាបន្តិចទៀតនេះ។
សូមជម្រាបថា ច្បាប់នេះមានគោលបំណងបង្កើតគណៈកម្មធិការជាតិប្រឆាំងទារុណកម្ម ដើម្បីធានាការពារជនទាំងឡាយដែលត្រូវបានដកហូតសេរីភាពឱ្យរួចផុតពីការធ្វើទារុណកម្ម និងការប្រព្រឹត្តមកលើខ្លួន ឬទណ្ឌកម្មដទៃទៀត ដែលឃោរឃៅ អមនុស្សធម៌ ឬបន្ថោកបន្ទាបដោយដាក់វិធានការត្រួតពិនិត្យជាទៀងទាត់ នៅកន្លែងឃុំឃាំងនានា និងទីកន្លែងដែលជនទាំងឡាយណា ត្រូវបាន ឬអាចត្រូវបានដកហូតសេរីភាព។
ជាងនេះទៅទៀត ច្បាប់នេះ មានវិសាលភាពអនុវត្តនៅគ្រប់ទីកន្លែងឃុំឃាំងជនទាំងឡាយណា ត្រូវបានឬអាចត្រូវបានដកហូតសេរីភាពនៅក្នុងព្រះរាជាណាចក្រកម្ពុជា។
ឯកឧត្តម ឧត្តមអគ្គានុរក្សថ្នាក់លេខ១ នុត សវនា អគ្គនាយករងបានចូលរួមជាតំណាងរបស់ឯកឧត្តម សន្តិបណ្ឌិត អគ្គនាយក ចាន់ គីមសេង បានឲ្យដឹងថា ជាលទ្ធផល កិច្ចប្រជុំបានឯកភាពលើការពិនិត្យទៅតាមទម្រង់ ដែលបានតាក់តែងហើយ តែនឹងពិនិត្យបន្តដោយក្រុមការងារបច្ចេកទេសផ្ទៃក្នុងដោយមានការចូលរួមពីថ្នាក់ដឹកនាំ នៃក្រុមប្រឹក្សានីតិកម្ម និងលេខាធិការដ្ឋាន នៃគណៈកម្មាធិការប្រឆាំងទារុណកម្ម។
ក្រុមការងារនឹងពិនិត្យលើខ្លឹមសារ មួយចំនួនពាក់ព័ន្ធនឹងឯករាជ្យភាពក្នុងការតែងតាំងសមាជិកគណៈ កម្មាធិការ ឯករាជ្យភាពក្នុងការបំពេញមុខងារ លក្ខខណ្ឌនៃក្របខណ្ឌមន្ត្រីក្នុងលេខាធិការដ្ឋាន ស្របតាមបទដ្ឋានជាតិ និងអន្តរជាតិ ដើម្បីធានាបាននូវប្រសិទ្ធភាពការងារ ក្នុងនាមជាស្ថាប័នឯករាជ្យ ស្របតាមចំណារដឹកនាំដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីដើមខែកុម្ភៈ ឆ្នាំ២០២០។
បើតាមឧត្តមអគ្គានុរក្សថ្នាក់លេខ១ នុត សវនា មានមតិថ្នាក់ដឹកនាំខ្លះបានលើកឡើងថា គណៈកម្មាធិការសិទ្ធិមនុស្សកម្ពុជា និងគណៈកម្មាធិការជាតិទប់ស្កាត់ទារុណកម្ម មានលក្ខណៈស្រដៀងគ្នា និងអាចបំពេញកិច្ចការជាន់គ្នា។
“ខ្ញុំសូមបញ្ជាក់ថា គណៈកម្មាធិការសិទ្ធិមនុស្សជាយន្តការ ឬជាសេនាធិការផ្ទាល់របស់រាជរដ្ឋាភិបាល ដែលមានតួនាទីទូទៅឃ្លាំមើលលើការអនុវត្តនានាស្របតាមការគោរពសិទ្ធិមនុស្សជាសកល។ យន្តការនេះត្រូវបានរដ្ឋាភិបាលសឹងតែគ្រប់ប្រទេសលើសកលលោកយកមកប្រើដើម្បីធានាបានការគោរពសិទ្ធិមនុស្សទូទៅ។ដោយឡែកយន្តការថ្នាក់ជាតិដើម្បីទប់ស្កាត់ទារុណកម្មអាចបង្កើតបានលុះត្រាតែរដ្ឋាភិបាល នៃប្រទេសនោះបានផ្តល់សច្ចាប័នលើពិធីសារបន្ថែមស្តីពីការទប់ស្កាត់ទារុណកម្ម និងត្រូវតែរក្សាឯករាជ្យភាពសម្រាប់សមាជិកភាពនៃគណៈកម្មាធិការ និងឯករាជ្យភាពក្នុងការបំពេញមុខងារ” ឧត្តមអគ្គានុរក្សថ្នាក់លេខ១ នុត សវនា បញ្ជាក់យ៉ាងដូច្នេះ៕
ដោយ៖កូឡាប