ភ្នំពេញ៖ ប៉ូលិសខណ្ឌពោធិ៍សែនជ័យម្នាក់ ដែលផ្ទុះអាវុធបណ្តាលឱ្យបុរសម្នាក់ស្លាប់ ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ ធ្វើការចោទប្រកាន់ជាផ្លូវការហើយ ពីបទ មនុស្សឃាតដោយអចេតនា តាមមាត្រា២០៧ នៃក្រមព្រហ្មទណ្ឌ អាចនឹងប្រឈមការជាប់ពន្ធនាគារពី១ ទៅ៣ឆ្នាំ និងពិន័យជាប្រាក់ពី ២ទៅ៦លានរៀល។
ព្រះរាជអាជ្ញា សៀង សុខ បានសម្រេចចោទប្រកាន់មន្ដ្រីនគរបាលរូបនេះ បានធ្វើឡើងនៅព្រឹក ថ្ងៃទី២៤ ខែមករា ឆ្នាំ២០១៨នេះ។ មន្ត្រីនគរបាលរូបនេះ មានឈ្មោះ ចន វិរៈ មានឋានន្តរស័ក្តិអនុសេនីយ៍ត្រី (ស័ក្តិ១) បម្រើផ្នែកអន្តរាគមន៍ នៃអធិការដ្ឋាននគរបាល ខណ្ឌពោធិ៍សែនជ័យ។ នគរបាលខណ្ឌពោធី៍សែនជ័យរូបនេះ ដែលផ្ទុះអាវុធពេលចុះបង្ក្រាបសង្វៀនជល់មាន់ បណ្តាលឲ្យត្រូវចំបុរសម្នាក់ស្លាប់ ប្រព្រឹត្តនៅចំណុចក្រោយផ្សារកាណាស៊ីធី ដីឡូត៌គ្មានលេខ ភូមិចោមចៅ២ សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ កាលពីថ្ងៃទី២១ ខែមករា ឆ្នាំ២០១៨ ។ សំណុំរឿងនេះត្រូវបានបញ្ជូនទៅចៅក្រមស៊ើបសួរដើម្បីចាត់ការបន្ត។ ចំណែកជនរងគ្រោះឈ្មោះ សៀក រ៉ន អាយុ៣៣ឆ្នាំ មុខរបររោងចក្រ ស្នាក់នៅក្បែរផ្សារកាណាស៊ីធី មានស្រុកកំណើតនៅ ខេត្តកំពង់ស្ពឺ៕ ដោយ៖បញ្ញាស័ក្តិ
