ភ្នំពេញ៖ ក្រុមសង្គមស៊ីវិលចំនួន១៣២ នៅថ្ងៃទី១៨ ខែឧសភា ឆ្នាំ២០២០ បានចេញសេចក្តីថ្លែងការណ៍ សូមស្នើសុំដល់រាជរដ្ឋាភិបាលកម្ពុជា សូមមេត្តាទម្លាក់ចោលការចោទប្រកាន់ចំពោះ អ្នកសារព័ត៌មានដែលកំពុងជាប់ឃុំក្នុងពន្ធនាគារ លោក សុខ ឧត្តម និងលោក សុវណ្ណ រឹទ្ធី និងបញ្ឈប់ការធ្វើទុក្ខបុកម្នេញចំពោះអ្នកសារព័ត៌មានមិនស្ថិតក្នុងការឃុំឃាំងផ្សេងទៀត ដែលប្រឈមមុខនឹងការផ្ដន្ទាទោសដោយសារការងាររាយការណ៍ព័ត៌មានរបស់ពួកគាត់ ។ នេះបើតាមការផ្សាយព័ត៌មានរបស់អង្គការលីកាដូ នៅថ្ងៃទី១៩ ខែឧសភា ឆ្នាំ២០២០នេះ។
ក្រុមសង្គមស៊ីវិលចំនួន១៣២ បានលើកឡើងថា” យើងខ្ញុំ ក៏សង្ឃឹមយ៉ាងមុតមាំថា រាជរដ្ឋាភិបាល នឹងប្រគល់អាជ្ញាប័ណ្ណវិទ្យុ និងគេហទំព័រផ្សាយព័ត៌មាន ដែលត្រូវបានដកហូតកន្លងមក និងក្នុងរយៈពេលចុងក្រោយនេះ ដល់ម្ចាស់អាជ្ញាប័ណ្ណទាំងអស់នោះឱ្យបានដំណើរការឡើងវិញ” ។
កាលពីថ្ងៃពុធសប្ដាហ៍នេះ នគរបាលបានចាប់ខ្លួនម្ចាស់ស្ថានីយវិទ្យុក្នុងស្រុកមួយនៅខេត្តកំពង់ឆ្នាំងគឺលោក សុខ ឧត្តម ដោយចោទប្រកាន់ពី “បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍” ។ ជាញឹកញាប់ លោក ឧត្តម បានរាយការណ៍ពីជម្លោះដីធ្លីដែលបានអូសបន្លាយពេលជាយូរមកហើយរវាង សហគមន៍កសិករមូលដ្ឋាន និងមន្ត្រីថ្នាក់ស្រុកដ៏មានអំណាច ។ មុនពេលចាប់ខ្លួនលោក ឧត្តម មួយថ្ងៃ ក្រសួងព័ត៌មានបានលុបចោលអាជ្ញាប័ណ្ណផ្សាយព័ត៌មានរបស់លោកគឺ ស្ថានីយវិទ្យុរឹទ្ធីសែន និងគេហទំព័ររបស់វិទ្យុនេះ ទោះបីជា លោក ឧត្តម មិនទាន់ត្រូវបានចោទប្រកាន់ពីបទល្មើសណាមួយនៅពេលនោះក៏ដោយ ។ លោកកំពុងត្រូវបានឃុំខ្លួនបណ្ដោះអាសន្នរង់ចាំសវនាការ ។
ការឃុំខ្លួនលោក សុខ ឧត្តម និងការបិទវិទ្យុនិងគេហទំព័ររបស់លោកយ៉ាងឆាប់រហ័សនេះ ធ្វើឡើងបន្ទាប់ពីការចាប់ខ្លួន លោក សុវណ្ណ រឹទ្ធី កាលពីដើមខែមេសា ឆ្នាំ២០២០ ក្រោយពីលោកបានស្រង់សម្ដីផ្ទាល់របស់សម្ដេចនាយករដ្ឋមន្ត្រី ដែលមានប្រសាសន៍ជាសាធារណៈ ក្នុងពេលរាជរដ្ឋាភិបាលឆ្លើយតបចំពោះបញ្ហារីករាលដាលជាសកលនៃវីរុសកូវីដ១៩ ។
លោក រឹទ្ធី ត្រូវបានចាប់ខ្លួននៅយប់ថ្ងៃទី៧ ខែមេសា ឆ្នាំ២០២០។ លោកត្រូវបានចោទប្រកាន់នៅ២ថ្ងៃបន្ទាប់ ពី“បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍” ។ អាជ្ញាប័ណ្ណគេហទំព័រ TVFB របស់លោក រឹទ្ធី ត្រូវបានលុបចោល ក្រោយការចាប់ខ្លួនលោកមួយថ្ងៃ ។ លោក រឹទ្ធី កំពុងត្រូវបានឃុំខ្លួនបណ្ដោះអាសន្នរង់ចាំសវនាការ ។ ទាំងលោក សុវណ្ណ រឹទ្ធី និងលោក សុខ ឧត្តម ប្រឈមមុខនឹងការជាប់ពន្ធនាគាររហូតដល់២ឆ្នាំ ប្រសិនបើត្រូវបានផ្ដន្ទាទោស ។
នៅដើមឆ្នាំ២០២០នេះ យ៉ាងតិចណាស់មានអ្នកសារព័ត៌មានជាង១០នាក់ ត្រូវបានកោះហៅ និងសាកសួរដោយនគរបាល និងមន្ត្រីយុត្តិធម៌ ដោយសារការរាយការណ៍ព័ត៌មានរបស់ពួកគាត់ ។ ការបន្តចាប់ខ្លួន ឃុំខ្លួន និងការធ្វើទុក្ខបុកម្នេញផ្លូវច្បាប់ ចំពោះអ្នកសារព័ត៌មាន ដែលហ៊ានផ្សាយព័ត៌មានរិះគន់ គឺជាការរំលោភយ៉ាងធ្ងន់ធ្ងរចំពោះសិទ្ធិទទួលបានព័ត៌មានរបស់ប្រជាពលរដ្ឋកម្ពុជា៕
ដោយ៖កូឡាប
