ភ្នំពេញ៖ ដូចដែលប្រិយមិត្តបានជ្រាបរួចហើយ ចំពោះវីដេអូផ្ទុះកក្រើកកាលពីម្សិលមិញ ដែលបង្ហាញឲ្យឃើញកុមារា ហុង ត្រូវបានបុរសម្នាក់ប្រើអំពើហិង្សាយ៉ាងសាហាវ ដោយទះមួយកំផ្លៀងយ៉ាងធ្ងន់ដៃ និងលើកជើងធាក់កណ្តាលៗមុខផ្ទួនៗ ព្រោះតែបុរសនោះខាងកុមារារូបនេះ ជេរម៉ែរបស់ខ្លួន។
ទោះយ៉ាងណា ការវាយទាត់ធាក់មកលើកុមារា ហុង បានធ្វើឲ្យមនុស្សភាគច្រើនខឹងសម្បារយ៉ាងខ្លាំង រហូតដល់ថ្នាក់រកមុខអ្នកវាយទៀតផង ព្រោះថា បើទោះជាក្មេងរូបនេះឈ្លើយយ៉ាងណា ក៏មិនត្រូវធ្វើបែបនេះមកលើរូបគេនោះទេ មិនគាំទ្រសោះឡើយ ចំពោះរូបភាពហិង្សាមកលើកុមារ។
យ៉ាងណាមិញ ក្រោយវីដេអូនេះផ្ទុះឡើង គណនីហ្វេសប៊ុកមួយបានចេញសេចក្តីបំភ្លឺថា នេះជាវីដេអូចាស់បានកើតឡើងយូរហើយ ដែលកាលនោះកុមារា ចាន់ ហុង ជាជនរងគ្រោះត្រូវបានមនុស្សធំដាក់ថ្នាំបង្ខំយកមកប្រើប្រាស់ធ្វើសកម្មភាពលួច រហូតមានបញ្ហាសតិ និងភ្នែក ប៉ុន្តែ សព្វថ្ងៃនេះ ចាន់ ហុង….។
នេះបើយោងតាមគណនីហ្វេសប៊ុកឈ្មោះ “ទីក្រុង ប៉ុស្តិ៍” បានបញ្ជាក់ឲ្យដឹងច្បាស់ថា៖ “សេចក្តីបំភ្លឺពីបង ស្រី នៅ ពិសី ! ទាក់ទិន វិដេអូ ហិង្សា លើ ក្មួយ ចាន់ ហុង និង រូបភាព ផ្សេងៗនូវអំពើ មិនគប្បី ជាវីដេអូចាស់។
ចាន់ ហុង ជាជនរងគ្រោះ ត្រូវបានមនុស្សធំ ដាក់ថ្នាំ បង្ខំ យកមកប្រើប្រាស់ធ្វើសកម្មភាពលួច រហូត មានបញ្ហា សតិ និងភ្នែក សព្វថ្ងៃ ចាន់ ហុង ត្រូវបានប្រធានអង្គការមួយនៃសាសនាគ្រិស្ទ យកទៅរក្សា និងព្យាបាល ឲ្យរៀនសូត្រ និងរស់នៅក្នុងមណ្ឌល ។
បច្ចុប្បន្ន ចាន់ ហុង កំពុងមានភាពប្រសើរ នៃ សតិ និងសើចសប្បាយ ជាមួយមិត្តក្នុងមណ្ឌល ហើយអង្គការ ក៏បានគិតគូរ អនាគតវែងឆ្ងាយ របស់ក្មេងប្រុសនេះ ក៏សូមអំពាវនាវ ឲ្យមានការលុបចេញ រាល់រូបភាព នៃវីដេអូទាំងឡាយ ដែលបង្កផលមិនល្អ ដល់អនាគតក្មេង ក្នុងពេលខាងមុខ ។
សូមបញ្ជាក់ ចាន់ហុង មិនបានចេញធ្វើសកម្មភាពអាក្រក់ទៀតឡើយ ចំណែកវីដេអូបង្ហោះនៅពេលថ្មីៗនេះ ជារូបភាពចាស់។
ព័ត៌មានចាស់ ចាន់ហុង ធ្លាប់បានបញ្ចូលទៅអប់រំ នៅអង្គការ តាប៉ាង នៅក្រុងកំពង់សោម តាមរយៈសមត្ថកិច្ច ក្រោយប្រព្រឹត្តបទល្មើស តែអង្គការនេះ មានការលំបាក ក្នុងការអប់រំ និងព្យាបាលក្មេង បច្ចុប្បន្ន ចាន់ ហុង កំពុងផ្លាស់ប្រែយ៉ាងប្រសើរ នៅមណ្ឌលថ្មី”។
សូមរំលឹកផងដែរថា កុមារា ចាន់ ហុង បានល្បីឈ្មោះនៅលើបណ្តាញសង្គម គឺបន្ទាប់វីដេអូសាក្សីមួយចំនួន បង្ហាញឲ្យឃើញកុមារារូបនេះ អាចមានសមត្ថកិច្ចភាពបើកបរម៉ូតូរ៉ឺម៉ក នៅលើដងផ្លូវសាធារណៈ ដែលធ្វើឲ្យគ្រប់គ្នាព្រួយបារម្ភសុវត្ថិភាពជំនួសជាខ្លាំង ។ ជាមួយនឹងសមត្ថភាពដ៏មិននឹកស្មាននេះផងដែរ ក្រោយមក កុមារ ហុង ក៏បានក្លាយជាចោរទាំងនៅវ័យក្មេង (អាយុ ៧ ឆ្នាំ) ពីបទលួចម៉ូតូ និងក៏បានធ្វើឲ្យមនុស្សជាច្រើនហៅថា ជាក្មេងកំពូលឌឺទៀតផង៕
ដោយ៖ លឹម ហុង