គិតត្រឹមថ្ងៃចន្ទ សហរដ្ឋអាមេរិចមានអ្នកស្លាប់ដោយសារវីរុសកូរ៉ូណាលើស ៩០.០០០នាក់ និងឆ្លងជាង ១,៥លាននាក់។ នេះបើតាមទិន្នន័យរបស់សកលវិទ្យាល័យ Johns Hopkins។
អាមេរិចជាប្រទេសដែលមានអ្នកស្លាប់ និងឆ្លងច្រើនជាងគេ ចាប់តាំងពីវីរុសមរណៈនេះបានផ្ទុះឡើងដំបូង ចេញពីទីក្រុងវូហានប្រទេសចិន កាលពីចុងឆ្នាំ ២០១៩។
ទីក្រុង New York មានចំនួនអ្នកស្លាប់ច្រើនជាង ២៨.៣០០នាក់ ដែលស្មើនឹង ១ភាគ ៣នៃចំនួនអ្នកស្លាប់សរុប។
បើតាមការវិភាគរបស់សកលវិទ្យាល័យ Massachusetts អាមេរិចនឹងមានអ្នកស្លាប់ប្រហែល ១១២.០០០នាក់ នៅថ្ងៃទី ៦ ខែមិថុនាខាងមុខ។
អាមេរិចបានធ្វើតេស្តរកវីរុសកូរ៉ូណាលើពលរដ្ឋខ្លួនចំនួន ១១,៥លាននាក់ ហើយក្នុងចំណោមនោះ មានមនុស្ស ២៧២.០០០ផ្ទុកវីរុស។
សូមបញ្ជាក់ថា ការរាតត្បាតវីរុសកូរ៉ូណា ឬ COVID-19 ចាប់តាំងពីចុងឆ្នាំ ២០១៩ មានសម្លាប់ជីវិតមនុស្សជាង ៣១៦.០០០នាក់ និងឆ្លងជិត ៤,៩លាននាក់ទូទាំងពិភពលោក៕ប្រភព៖ Channelnewsasia
អត្ថបទប្រែសម្រួលដោយ៖ សុភ័ក្រ