ប្រទេសស៊ុយអ៊ែត បានទាមទារឲ្យមានការផ្តល់ចំលើយពីខាងភាគីចិន ជុំវិញការចាប់ខ្លួនអ្នកបោះពុម្ពសៀវភៅជនជាតិស៊ុយអ៊ែតម្នាក់ និងស្នើឲ្យមានការដោះលែងរូបលោកជាបន្ទាន់។ នេះបើតាមការចេញផ្សាយរបស់ CNN នៅថ្ងៃពុធនេះ។
អ្នកបោះពុម្ពសៀវភៅម្នាក់ឈ្មោះ Gui Minhai អាយុ ៥៣ ឆ្នាំ ត្រូវបាននាំខ្លួនដោយប៉ូលីសចិន ខណៈពេលលោកកំពុងស្ថិតនៅលើរថភ្លើងកាលពីថ្ងៃសៅរិ៍កន្លងទៅនេះ។ ការចាប់ខ្លួននេះ ធ្វើឡើងនៅនឹងមុខអ្នកការទូតស៊ុតអ៊ែតតែម្តង ដែលបានអមដំណើរគាត់ទៅត្រួតពិនិត្យសុខភាពនៅស្ថានទូតស៊ុយអ៊ែតក្នុងទីក្រុងប៉េកាំង។
ជុំវិញបញ្ហានេះដែរ ក្រសួងការបរទេសស៊ុយអ៊ែតបានកោះហៅឯកអគ្គរដ្ឋទូតចិនឈ្មោះ Gui Congyou មកសាកសួរចំនួន ២ដង ហើយលើកទី ២គឺសួរនៅយប់ថ្ងៃអង្គារម្សិលមិញ ដើម្បីឲ្យធ្វើការពន្យល់ពីសកម្មភាពចាប់ខ្លួនពលរដ្ឋស៊ុយអ៊ែតរបស់រដ្ឋាភិបាលចិន។
នៅក្នុងសេចក្តីប្រកាស ប្រទេសស៊ុយអ៊ែតរំពឹងថា លោក Gui Minhai នឹងត្រូវបានដោះលែង ដើម្បីអាចឲ្យលោកទៅជួបអ្នកការទូតស៊ុយអ៊ែត និងបុគ្គលិកពេទ្យ។
ចំនែកអ្នកនាំពាក្យរបស់ក្រសួងការបរទេសចិន មិនបានផ្តល់ចំលើយលំអិតទេជុំវិញករណីរបស់លោក Gui Minhai ក្នុងកំឡុងពេលថ្លែងទៅកាន់សារព៌តមានកាលពីថ្ងៃអង្គារ។
អ្នកនាំពាក្យដដែលឈ្មោះ Hua Chunying គ្រាន់តែបញ្ជាក់ថា “ជនបរទេសទាំងអស់ដែលនៅក្នុងប្រទេសចិន រួមទាំងអ្នកការទូតនៅក្នុងស្ថានទូតបរទេស និងកុងស៊ុល មិនត្រូវល្មើសច្បាប់អន្តរជាតិ ឬច្បាប់ប្រទេសចិនឡើយ”។
នៅថ្ងៃពុធនេះផងដែរ ឯកអគ្គរដ្ឋទូតសហភាពអ៊ឺរ៉ុបប្រចាំប្រទេសចិន បានជំរុញឲ្យទីក្រុងប៉េកាំងដោះលែងអ្នកបោះពុម្ពសៀវភៅជនជាតិស៊ុយអ៊ែតរូបនោះជាបន្ទាន់៕ សុភ័ក្ត្រ
