ភ្នំពេញ៖ កាលពីម្សិលមិញ មានការផ្ទុះកក្រើកខ្លាំងតែម្តង ទាក់ទងរឿងរ៉ាវសង្គ្រាមពាក្យសម្តីដែលបានផ្ទុះឡើងសារជាថ្មី រវាងអ្នកនាង ម៉េង កែវពេជ្ជតា និងអ្នកនាង ចន ច័ន្ទលក្ខិណា ប្រធានសមាគមសិល្បៈ បន្ទាប់ពីអ្នកនាង ពេជ្ជតា ព្រោះតែអត់ទ្រាំពុំបានៗ ចេញវីដេអូទម្លាយចេញពីចរិតពិតរបស់អ្នកនាង ចន ច័ន្ទលក្ខិណា ដែលចោទប្រកាន់ថានៅតែឆ្លៀតនិយាយបញ្ឈឺ បញ្ចើចបញ្ចើ ឌៀមដាម ជុំវិញរឿងរ៉ាវដែលអ្នកនាង ពេជ្ជតា គ្រាន់តែលើកឡើងពីហេតុផល ដ៏ឈឺចាប់ដែលអតីតស្វាមី បង្កើតរឿងបន្សល់ទុកជាសំឡេងឈ្លោះប្រកែកគ្នាខ្លាំងៗ បង្កឲ្យរាលដាលនៅក្នុងបណ្តាញសង្គម មកទល់សព្វថ្ងៃ ដែលធ្វើឲ្យមហាជន មានការយល់ច្រឡំទៅលើអ្នកនាងកាន់តែខ្លាំង។
ក្រោយពីអ្នកនាង ម៉េង កែវពេជ្ជតា បានចេញវីដេអូនិយាយដាក់ឲ្យធ្ងន់ៗបែបនេះ ស្រាប់តែអ្នកនាង ចន ច័ន្ទលក្ខិណា បានបង្ហោះសារដោយភ្ជាប់ជាមួយសាច់រឿងនាង ឃ្មឹប ដែលត្រូវសមត្ថកិច្ចចាប់ខ្លួនព្រោះតែគ្រឿងញៀន តបទៅកាន់ទៅអ្នកនាង ពេជ្ជតា ក្នុងលក្ខណៈធ្វើជាអ្នកទន់ខ្សោយយ៉ាងដូច្នេះថា៖ “គាត់ដើរផ្លូវខុសហើយធ្វើឲ្យគេមើលងាយដល់ អ្នកសិល្បៈដែលត្រឹមត្រូវមួយចំនួននិងមាន អ្នកចោទមកប្រធានសមាគមទៀតហើយ គិតទៅខ្ញុំចាំតែខុសទេ . សុំលុយគេមកជួយអ្នកសិល្បៈក្រីក្រឈឺក៏ខុស . អ្នកណាធ្វើរឿងប៉ះពាល់ដល់សង្គមក៏ថាខ្ញុំខុស . អ្នកណាស៊ិចស៊ីបង្អួតសម្រស់ក៏ថាខ្ញុំខុស . ចោទថាក្រុមខ្ញុំ . បក្ខពួកខ្ញុំ . ខ្ញុំរកស៊ីលក់ឡេ លក់ផលិតផលក៏វាយ តម្លៃខ្ញុំ . បើខ្ញុំមិនប្រឹងរកស៊ីក្រៅការងារសមាគម តើខ្ញុំបានលុយឯណាចិញ្ចឹមកូន ? តើមុខរបរថតកុនថតភាពយន្តបានលុយប៉ុន្មាន ? ហើយថតមួយរឿងៗប៉ុន្មានខែប៉ុន្មានឆ្នាំបានចប់ ? អ្នកសម្តែងកុនល្បីមិនដូចអ្នកចម្រៀងល្បីៗ ច្រៀងម្តងៗបានរាប់ពាន់ដុល្លារឯណា ខ្ញុំថតកុនមួយរឿង បានកម្រៃស្មើអ្នកច្រៀង ៣ ម៉ោង គិតទៅតួនាទីនេះគឺធ្វើអ្វីគឺចាំតែខុស ។ ខ្ញុំទ្រាំឲ្យគេវាយប្រហារតែប៉ុន្មានខែទៀតទេ ជិតដល់អាណត្តិដូរតំណែងហើយ ខ្ញុំឆ្អែតចិត្តជាមួយអ្នកពេកហើយ” ។
ដោយឡែកកាលពីវេលាម៉ោង ៩ និង៣០ នាទី យប់មិញ (១៨ ឧសភា) ក្រោយពីឃើញសារវាយបកបង្ហោះ ត្អូញត្អែរតែបែបឌៀមដាម ពីអ្នកនាង ចន ច័ន្ទលក្ខិណា ដែលថាប្រធានសមាគមចាំតែខុស ឬ អ្នកសម្តែងរកចំណូលមិនដូចអ្នកចម្រៀង ចប់១រឿង ស្មើនឹងអ្នកច្រៀងស្រែក៣ម៉ោង គឺត្រូវតែឆ្លៀតលក់ផលិតអនឡាញ ដើម្បីចិញ្ចឹមខ្លួនឯង និងកូនអ៊ីចឹងជាដើមនោះ ស្រាប់តែអ្នកនាង ពេជ្ជតា បានឆ្លើយតបដោយចាក់បណ្តោយតាមខ្សែទឹក ជាហូរហែដូចក្នុងវីដេអូ៕
ដោយ៖ លឹម ហុង
