ភ្នំពេញ៖ បន្ទាប់ពីឆ្លងកាត់ការទប់ស្កាត់ជំងឺកូវីដ១៩ មួយរយៈពេលធំមក ឥឡូវនេះអាជីវករមួយភាគធំ នៅផ្សារធំថ្មី បានបើកដំណើរការតូបរបស់ខ្លួន ជាង៩០ភាគរយហើយ ក្រោយពីអាជីវករមួយចំនួនបានធ្វើការបិទតូបមួយរយៈដោយខ្លាចឆ្លងជំងឺកូវីដ១៩។
ជាមួយនិងការមកលក់ជាធម្មតាវិញ អ្នកលក់ទាំងអស់ ក៏ចាប់មានការប្រុងប្រយ័ត្នខ្ពស់ជាងមុន ដោយតែងតែលាងដៃញឹកញាប់ជាមួយសាប៊ូ បាញ់អីវ៉ាន់នឹងទឹកអាកុល ដើម្បីសម្លាប់មេរោគនិងអាជីរករមួយចំនួនបានធ្វើការទ្បាយ និងផុស លើគេហទំព័រហ្វេសប៊ុកក្នុងការលក់បន្ថែមផងដែរ។
នាពេលកំពុងកើតមានជំងឺ Covid-19 បានកំពុងវាយលុកទូទាំងពិភពលោក និងកម្ពុជានោះ ធ្វើឱ្យទីផ្សារសេដ្ឋកិច្ច ធ្លាក់ចុះ។ បើក្រឡេកមើលអាជីវករលក់ បោះដុំសម្ភារបរិក្ខារពេទ្យ បែរជាលក់ដាច់ខ្លាំង គឺអាល់កុល ទឹកលាងដៃ និងម៉ាស ហើយផលិតផលផ្សេងៗទៀត លក់ធម្មតាៗ។
បើតាម រដ្ឋាករស្វយ័តផ្សារធំថ្មី បានឲ្យដឹងថា ផ្សារធំថ្មី មានតូបសរុបចំនួន ៣២៨០តូប ប៉ុន្តែដោយសារតែអាជីវករភ័យខ្លាចវីរុសកូវីដ១៩ ផង និងខ្សត់ភ្ញៀវផង គឺមានតូបចំនួន៦៣០តូប ត្រូវបានបិទទ្វារ ឬផ្អាកជាបណ្តោះអាសន្ន។
ការជាសះស្បើយអ្នកជំងឹឆ្លងកូវីដ១៩នៅកម្ពុជា ធ្វើឲ្យអារម្មណ៍ប្រជាជនល្អប្រសើរជាងមុន ក្នុងនោះអាជីវករផ្សារធំថ្មីមួយភាគធំប្រមាណ ៩០ភាគរយ បានបើកដំណើរការតូបឡើងវិញ ក្នុងការប្រកបរបរប្រចាំថ្ងៃ ជាមួយនិងការប្រយ័ត្នប្រយែងក្នុងការការពារជំងឺកូវីដ១៩ជាងមុន។ ប្រជាជនដើរផ្សារក្នុងផ្សារធំថ្មី បានអះអាងថា ពេលពួកគេមកផ្សារម្តងៗ មានអារម្មណ៍ភ័យខ្លាចខ្លះដែរ ប៉ុន្តែពួកគាត់ មានអារម្មណ៍ប្រសើរ ព្រោះបានឃើញផ្សារធំថ្មី រៀបចំនូវវិធានការការពារអតិថិជនពីវីរុសកូវីដ១៩៕
ដោយ៖សម្ផស្ស