ភ្នំពេញ៖ មុខរបរដាំស្មៅ ក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ដែលគេសង្កេតឃើញ មានវាលស្រែខៀវខ្ចី រាប់រយហិកតា ជាស្រែដាំស្មៅសម្រាប់រៀបសួន។ មុខរបរនេះ កំពុងរកចំណូលបានគួរសម។
អ្នកស្រី ពឹង សុខ ជា ចាប់មុខរបរដាំស្មៅរៀបសួន បានឲ្យដឹងថា បច្ចុប្បន្ននេះ ស្មៅមានតម្លៃពី ១ដុល្លារ៣កាក់ ទៅ ១ដុល្លារ៤កាក់ក្នុងមួយម៉ែត្រការ៉េ។ អ្នកស្រី បានដាំស្មៅសម្រាប់រៀបសួន ២ប្រភេទ គឺស្មៅជប៉ុន និងស្មៅម៉ាឡេ ។ សព្វថ្ងៃ គាត់បានដាំស្មៅនេះជាង ១ម៉ឺនម៉ែត្រការ៉េ ដែលដីមួយចំនួនជួលគេ និងមួយចំណែកទៀតជាដីផ្ទាល់ខ្លួន។
អ្នកស្រី មានដីដាំស្មៅប្រមាណ៥០ហិកតា ក្រោយពីប្រមូលផលរួច គាត់ត្រូវជួលកម្មករដាំឡើងវិញ ក្នុងម្នាក់មួយថ្ងៃ១៨០០០រៀល តែមិនអស់ថ្លៃពូជស្មៅនោះទេ។
ស្របពេលដែលកំណើននៃអចលនទ្រព្យនៅកម្ពុជា កាន់តែមានកំណើនកើនឡើងខ្លាំង ធ្វើអោយក្រុមហ៊ុនមួយចំនួន កំពុងមានតម្រូវការលើដំណាំស្មៅ សម្រាប់ដាំលម្អនៅតាមសួននានា ដែលធ្វើឲ្យអាជីវកម្មលក់ស្មៅ កំពុងតែរកចំណូលបានគួរសម។ បច្ចុប្បន្ន អ្នកស្រុកនៅឃុំព្រែកតាមាក់ បានចាប់យកមុខរបរដាំស្មៅមិនក្រោមពី ៤០០គ្រួសារនោះទេ៕
ដោយ៖សម្ផស្ស