បាត់ដំបង៖ ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ណែនាំ គ្រប់កងកម្លាំងឈរជើង នៅតាមបន្ទាត់ព្រំដែន អាជ្ញាធររដ្ឋបាលដែនដីគ្រប់ថ្នាក់ តាមបណ្តាស្រុកទាំងអស់ ដែលជាប់នឹងព្រំដែនកម្ពុជា ថៃ ត្រូវតែមានកិច្ចសហការល្អ ក្នុងការទប់ស្កាត់ឲ្យខាងតែបាន មិនត្រូវបន្ថូរបន្ថយយោគយល់ មានភាពធូររលុង ឃុបឃិត បណ្ដែតបណ្ដោយ បើកដៃឲ្យពលរដ្ឋលួចឆ្លងព្រំដែនទៅប្រទេសប្រទេសថៃ ដោយខុសច្បាប់បន្តទៀតនោះទេ។ការលើកឡើងនេះ ក្នុងកិច្ចប្រជុំគណៈបញ្ជាការឯកភាពខេត្តបាត់ដំបង កាលពីរសៀលថ្ងៃទី១៨ ខែឧសភា ឆ្នាំ២០២០នេះ។
ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍ថា រហូតមកដល់ពេលនេះ ក្រុមមេខ្យល់បានញុះញង់កៀ
រគរដឹកជញ្ជូនពលរដ្ឋខ្មែរ មកពីតំបន់ផ្សេងៗ តាមបណ្តាស្រុកចំនួន៣លើក សរុបចំនួន១០៦នាក់ ស្រី៤០នាក់និងក្មេង១៦នាក់ ដោយដឹកពួកគេយកទម្លាក់ចោល នៅជិតមាត់ច្រកព្រំដែន តាមបណ្តាច្រករបៀងផ្សេងៗ ដើម្បីលបលួចចូលទៅប្រទេសថៃ ខណៈប្រទេសមួយនេះ កំពុងធ្វើការហាមឃាត់ បិទច្រកទ្វារព្រំដែនទាំងអស់ ដោយសារបញ្ហាជំងឺកូវីដ១៩។ ពលរដ្ឋទាំងអស់នោះ ត្រូវបានកម្លាំងវរការពារព្រំដែនគោក តាមច្រករបៀងឃាត់ខ្លួន ជាបន្តបន្ទាប់ និងបានអប់រំឲ្យពួកគាត់ទាំងនោះ វិលត្រឡប់ទៅកាន់ស្រុកកំណើតវិញ។
សមត្ថកិច្ចដែលឈរជើងប្រចាំនៅព្រំដែន បានលើកឡើងនៅក្នុងកិច្ចប្រជុំនេះថា ក្នុងការងារទប់ស្កាត់ការលួចឆ្លងដែន របស់ពលរដ្ឋខ្មែរទៅប្រទេសថៃនេះ គឺខាងកម្ពុជាជួបការលំបាកមួយចំនួន ដែលខ្វះនូវកិច្ចសហការរវាងកងកម្លាំងតាមបន្ទាត់ព្រំដែន ទាំងខាងខ្មែរនិងថៃ។ នៅពេលខ្លះខាងកម្ពុជា បិទមិនឲ្យចេញ-ចូលឆ្លងដែន តែខាងថៃ បានបើកឲ្យឆ្លងដែនខុសច្បាប់ ដើម្បីយកលុយពីពលរដ្ឋខ្មែរ ដែលលួចឆ្លងដែនទៅ។ កន្លងមកពលករខ្មែរ បានលបលួចឆ្លងដែនខុសច្បាប់ តាមមេខ្យល់ខាងក្នុងប្រទេសកម្ពុជាដឹកនាំចេញទៅ និងខ្លះទៀតតាមរយៈការទំនាក់ទំនង ពីបុគ្គលសមត្ថកិច្ចថៃ ត្រូវរ៉ូវជាមួយថៅកែថៃ លួចអនុញ្ញាតឲ្យចូលទៅដីថៃ ដោយការបិទបាំងលួចលាក់ខុសច្បាប់។
កាលពីថ្ងៃទី១៣ ខែឧសភា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំដល់អភិបាលខេត្តមានព្រំដែនដែន ជាប់ប្រទេសជិត ត្រូវទប់ស្កាត់ប្រជាពលរដ្ឋខ្មែរ កុំឲ្យឆ្លងដែនដោយខុសច្បាប់ ចូលទៅប្រទេសជិតខាង តាមច្រករបៀងនានា។
គួរបញ្ជាក់ផងដែរថា កាលពីថ្ងៃទី១៨ ខែឧសភា ឆ្នាំ២០២០ មានពលករមានទីលំនៅក្នុងខេត្តបាត់ដំបង បានវិលត្រឡប់ពីថៃចូលតាមច្រកក្នុងខេត្ត និងក្រៅខេត្ត ចំនួន១៥នាក់ ស្រី៧នាក់និងពលករ មានទីលំនៅតាមបណ្តារាជធានី ខេត្ត ចូលមកវិញតាមច្រកទ្វារព្រំដែន ក្នុងខេត្តបាត់ដំបង មានចំនួន ៧នាក់ ស្រី៥នាក់ ហើយពលរដ្ឋក្នុងខេត្តបាត់ដំបង មកពីក្រៅប្រទេសក្នុងអំឡុង រីករាលដាលជំងឺកូវីដ១៩នេះ មានចំនួន ១៧.៤០២ នាក់ ៕
ដោយ៖អ៊ុងសារុំ