ហ្វូស៊ីលដែលត្រូវបានរកឃើញ នៅក្នុងប្រទេសអូស្ត្រាលី ដោយអ្នកកំណាយស្ម័គ្រចិត្តម្នាក់ ត្រូវបានគេកំណត់អត្តសញ្ញាណថា ជាប្រភេទដាយណូស័រគ្មានធ្មេញដ៏កម្រ ដែលមានវត្តមាននៅក្នុងប្រទេសអូស្ត្រាលីកាលពី ១១០លានឆ្នាំមុន។
ដាយណូស័រនោះមានឈ្មោះថា Elaphrosaur ដែលមានន័យថាជាអំបូរបង្កួយទម្ងន់ស្រាល និងស្ថិតក្នុងអំបូរដាយណូស័រ Tyrannosaurus Rex និង Velociraptor។
ហ្វូស៊ីប្រវែង ៥សង់ទីម៉ែត្ររបស់ដាយណូស័រប្រភេទនេះ ត្រូវបានគេរកឃើញក្នុងពេលកំពុងធ្វើកំណាយនៅក្បែរនៅតំបន់ Cape Otway ស្ថិតក្នុងរដ្ឋ Victoria កាលពីឆ្នាំ ២០១៥។
វាគឺជាឆ្អឹងសត្វដាយណូស័រប្រភេទនេះដំបូងដែលត្រូវបានគេរកឃើញនៅក្នុងប្រទេសអូស្ត្រាលី។
ហ្វូស៊ីលនោះ ត្រូវបានរកឃើញដោយអ្នកស្ម័គ្រចិត្តម្នាក់ឈ្មោះ Jessica Parker ដែលបានចូលរួមក្នុងការធ្វើកំណាយប្រចាំឆ្នាំ ដែលដឹកនាំដោយសារមន្ទីរ Melbourne។
នៅពេលនោះ ហ្វូស៊ីលដែលត្រូវបានរកឃើញ ត្រូវបានគេគិតថាជារបស់ពពួកសត្វល្មូនហោះឈ្មោះ pterosaur ប៉ុន្តែនៅពេលអ្នកឯកទេសនៅសកលវិទ្យាល័យ Swinburne ក្នុងទីក្រុង Melbourne បានសិក្សាបន្ថែមពីហ្វូស៊ី ពួកគេបានដឹងថាជាអំបូរដាយណូស័រខាងលើ។
លោកវេជ្ជបណ្ឌិត Stephen Poropat បាននិយាយថា “ដាយណូស័រ Elaphrosaurs មានកវែង និងមានដៃតូចៗ និងមានខ្លួនស្រាល”។
ហ្វូស៊ីលដែលរកឃើញបានបង្ហាញថា សត្វដាយណូស័រនោះមានប្រវែងប្រហែល ២ម៉ែត្រ ប៉ុន្តែហ្វូស៊ីលដែលត្រូវបានរកឃើញនៅក្នុងប្រទេសផ្សេងៗទៀតដូចជា ចិន អាហ្សង់ទីន និងតង់ហ្សានី បានបង្ហាញថាពួវាអាចមានប្រវែងរហូតដល់ ៦ម៉ែត្រ។
លោកវេជ្ជបណ្ឌិតនិយាយទៀតថា សត្វដាយណូស័រ elaphrosaurs ពេញវ័យប្រហែលជាមិនស៊ីសាច់ច្រើននោះទេ។
សូមបញ្ជាក់ថា តំបន់ Cape Otway កន្លែងដែលរកឃើញហ្វូស៊ីលខាងលើ ជាតំបន់ដែលមានមានសារសំខាន់សម្រាប់ការស្រាវជ្រាវ។ ពូជសត្វជាច្រើនប្រភេទ និងពូជដាយណូស័រ ៥ប្រភេទត្រូវបានគេរកឃើញនៅទីនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC