ខេត្តស្វាយរៀងៈ អាជ្ញាធរខេត្តស្វាយរៀង បានដាក់យន្តការគ្រប់គ្រងដឹកនាំ ក្នុងការប្រមូលសំរាម និងតម្លៃសេវាឲ្យបានត្រឹមត្រូវ ដើម្បីងាយស្រួលចាត់វិធានការផាកពិន័យចំពោះជនខិលខូច បោះចោលសំរាមពាសវាលពាសកាល។
លោក តូច ប៉ូលីវ៉ា អភិបាលរងខេត្តស្វាយរៀង នៅថ្ងៃទី១៩ ខែឧសភា ឆ្នាំ២០២០នេះ បានអញ្ជើញចូលរួមកិច្ចប្រជុំបូកសរុបការងារបរិស្ថាន និងការរៀបចំផែនការសកម្មភាព ថវិកាសម្រាប់គ្រប់គ្រងសំរាម សំណល់រឹង ក្រុង/ស្រុក ខេត្តស្វាយរៀង ក្រោមអធិបតីភាពលោកស្រី ព្រំ សុភី អនុរដ្ឋលេខាធិការក្រសួងបរិស្ថាន នៅសាលប្រជុំមន្ទីរបរិស្ថានខេត្ត។
លោក អភិបាលរងខេត្ត នាឱកាសនោះ បានមានប្រសាសន៍ផ្តោតការសំខាន់ នៃប្រភពធំៗ ចំនួន ៣ របស់បញ្ហាប្រឈម គឺ៖
១-កត្តាប្រជាពលរដ្ឋមិនចូលរួមសហការ ដោយមិនបានយល់ដឹងអំពីបញ្ហាទុកដាក់សម្រាម
២-កត្តាក្រុមហ៊ុនដឹកសម្រាមនៅមានកម្រិត ទាំងធនធានសម្ភារ មនុស្ស ការគ្រប់គ្រងដឹកនាំ
៣-កត្តាការដឹកនាំ គ្រប់គ្រង របស់រដ្ឋបាលក្រុង លើការងារគ្រប់គ្រងសំណល់រឹង ។
បន្ទាប់មកលោកអភិបាលរងខេត្ត ក៏បានលើកឡើងបន្ថែមនូវចំណុច មួយចំនួនទៀតរួមមាន៖ រៀបចំយន្តការគ្រប់គ្រងដឹកនាំ ក្នុងការប្រមូលសំរាម កំណត់មុខសញ្ញាជាអាទិភាពក្នុងការប្រមូលសំរាម រៀបចំកាលវិភាគ សម្រាប់ប្រមូលសំរាម រៀបចំផែនការសកម្មភាពប្រចាំឆ្នាំ លើការងារប្រមូលសំរាម និងតម្លៃសេវាឲ្យបានត្រឹមត្រូវ ផ្សព្វផ្សាយអនុក្រឹត្យលេខ១១៣ ឲ្យបានទូលំទូលាយ ដើម្បីងាយស្រួលចាត់វិធានការផាកពិន័យចំពោះជនខិលខូច បោះចោលសំរាមពាសវាលពាសកាល បង្កើតដេប៉ូសម្រាប់ដាក់សំរាម នៅតាមឃុំ សង្កាត់ កំណត់តម្លៃសេវា ក្នុងការប្រមូលសំរាម៕
ដោយ៖ វ៉ៃកូ