ភ្នំពេញ៖ ឧត្តមសេនីយ៍ឯក ម៉ៅ សុផាន់ បានណែនាំ ដល់នាយទាហាន និងពលទាហានទាំងអស់អនុវត្តន៍នូវវិន័យកងទ័ព ជៀសវាងការជួញដូរអាវុធ ព្រោះនេះជាបទល្មើសខុសច្បាប់។ អាវុធគ្រប់ប្រភេទត្រូវរក្សាទុកក្នុងឃ្លាំងឲ្យបានល្អ បើយកចេញបាន លើកលែងតែការហ្វឹកហ្វឺន,ចេញបេសកកម្ម,ការពារគោលដៅ តាមបទញ្ជារបស់អគ្គបញ្ជាការ។
លោកឧត្តមសេនីយ៍ឯក ម៉ៅ សុផាន់ ជាមេបញ្ជាការកងពលតូចលេខ៧០ នៅថ្ងៃទី១៩ ខែឧសភា ឆ្នាំ២០២០នេះ បានដឹកនាំកិច្ចប្រជុំផ្សព្វផ្សាយនូវសេចក្តីណែនាំ ស្តីពីការបង្ការការពារទប់ស្កាត់គ្រប់គ្រងជំងឺឆ្លងកូវីដ-១៩ របស់ក្រសួង សុខាភិបាល, តាមបទបញ្ជារបស់ក្រសួងការពារជាតិ ,អគ្គមេបញ្ជាការ មេបញ្ជាការកងទ័ពជើងគោក សម្រាប់យោធិនក្នុងកងពលនៅតែបន្តរឹតបណ្តឹងការចេញចូលពេលធ្វើការជារៀងរាល់ថ្ងៃតាមរយៈការវាស់កំដៅ,លាងដៃដោយសាប៊ូ បាញ់អាល់កុលឬជែលអាល់កុលជាដើម។
ថ្លែងក្នុងឱកាសនោះ លោកឧត្តមសេនីយ៍ឯក ម៉ៅ សុផាន់ បានផ្សព្វផ្សាយបន្ថែមអំពីស្ថានភាពវិវឌ្ឍន៍ចុងក្រោយ នៃការរីករាលដាលជំងឺមួយនេះ នៅលើពិភពលោក។ បើទោះបីកម្ពុជា ព្យាបាលអ្នកកើតកូវីដ១៩ ជាសះស្បើយក៏ពិតមែន ប៉ុន្ដែមិនអាចបណ្ដែតបណ្ដោយ ឬធ្វេសប្រហែសបាននោះទេ ពោលត្រូវរក្សាគោលការណ៍អនាម័យ តាមអ្វីដែលក្រសួងសុខាភិបាលបានណែនាំ។
ជាមួយគ្នានេះ លោកឧត្តមសេនីយ៍ឯក ក៏បានណែនាំន្ថែមអំពី វិន័យកងទ័ព និងលើកឡើងថា អាវុធគ្រប់ប្រភេទត្រូវរក្សាទុកក្នុងឃ្លាំងឲ្យបានល្អ បើយកចេញបាន លើកលែងតែការហ្វឹកហ្វឺន,ចេញបេសកកម្ម,ការពារគោលដៅ តាមបទញ្ជារបស់អគ្គបញ្ជាការ និងបញ្ជាការដ្ឋានកងទ័ពជើងគោក ហើយពាក់ព័ន្ធការប្រើប្រាស់អាវុធ ដោយគ្មានការចាត់តាំងនោះ គឺសុទ្ធតែ មានទោស។
លោកក៏បានណែនាំ ដល់នាយទាហាន និងពលទាហានទាំងអស់ អនុវត្តន៍នូវវិន័យកងទ័ព ចៀសវាងការជួញដូរអាវុធ ព្រោះនេះជាបទល្មើសខុសច្បាប់។ លោកបានបន្តទៀតថា នាយទាហាន នាយទាហានរង នៅក្នុងបញ្ជាការដ្ឋានកងពលតូចលេខ៧០ ហាមមិនឲ្យមានការប្រើប្រាស់គ្រឿងញៀនទេ ប្រសិនបើមានករណីនេះកើតឡើង ត្រូវចាត់វិធានការតាមច្បាប់ និងវិន័យកងទ័ព៕
ដោយ៖បញ្ញាស័ក្តិ
