ខេត្តមណ្ឌលគិរី ៖ មន្ត្រីរដ្ឋបាលការពារនិងអភិរក្សធម្មជាតិរបស់មន្ទីរបរិស្ថានខេត្តមណ្ឌលគិរី កោះអញ្ជើញរូបវ័នបុគ្គលមកសាកសួរករណីកាន់កាប់ដីព្រៃក្នុងតំបន់របៀងអភិរក្សជីវចម្រុះ។ ជននេះ គឺជាមេខ្លោងដែលកៀរគរកម្លាំងពលកម្ម ឲ្យកើតមានការសង់រោង និងធ្វើសកម្មភាពអារច្រៀកឈើអនាធិប តេយ្យដោយខុសច្បាប់ ហើយនៅថ្ងៃទី១៩ខែឧសភាឆ្នាំ២០២០ មន្ទីរបរិស្ថានខេត្តមណ្ឌលគិរី បានរៀបចំកសាងសំណុំរឿង ចាត់ការបន្តតាមនីតិវិធីច្បាប់។
ក្រសួងបរិស្ថាន បានផ្សាយព័ត៌មានថា នៅព្រឹកថ្ងៃទី១៨ ខែឧសភា ឆ្នាំ២០២០ មន្ត្រីរដ្ឋបាលការពារនិងអភិរក្សធម្មជាតិ នៃមន្ទីរបរិស្ថានខេត្តមណ្ឌលគិរី បានកោះអញ្ជើញបុរសម្នាក់មកសាកសួរនៅមន្ទីរបរិស្ថានខេត្តមណ្ឌលគិរី ពាក់ព័ន្ធនឹងករណីកាន់កាប់ដីព្រៃនៅក្នុងរបៀងអភិរក្សជីវចម្រុះប្រព័ន្ធតំបន់ការពារធម្មជាតិ ក្នុងភូមិសាស្ត្រស្រុកពេជ្រាដា ខេត្តមណ្ឌលគិរី ដើម្បីកំណត់អត្ថិភាព និងបទល្មើសធនធានធម្មជាតិ ដែលមានចែងក្នុងបញ្ញត្តិច្បាប់ស្ដីពីតំបន់ការពារធម្មជាតិ។
រូបវន្តបុគ្គលដែលកោះអញ្ជើញមកសាកសួរមានឈ្មោះ គ្រិះ ផន អាយុ៥០ឆ្នាំ មានទីលំនៅបច្ចុប្បន្នរស់នៅភូមិក្រង់តេះ ឃុំក្រង់តេះ ស្រុកពេជ្រាដា ខេត្តមណ្ឌលគិរី។
គួររំលឹកជូនបន្ថែមថា ជននេះគឺជាមេខ្លោងដែលកៀរគរកម្លាំងពលកម្មឲ្យកើតមានការសង់រោង និងធ្វើសកម្មភាពអារច្រៀកឈើអនាធិបតេយ្យដោយខុសច្បាប់ និងសាងសង់រោងក្រោលគោ ក្នុងរូបភាពនៃការទន្ទ្រានកាន់កាប់ដីព្រៃ របស់រដ្ឋដោយខុសច្បាប់ និងធ្វើសកម្មភាពរារាំងមន្ត្រីរដ្ឋបាលការពារ និងអភិរក្សធម្មជាតិក្នុងការបំពេញភារកិច្ច។ បច្ចុប្បន្នជននេះត្រូវបានមន្ត្រីរដ្ឋបាលការពារ និងអភិរក្សធម្មជាតិ នៃមន្ទីរបរិស្ថានខេត្តមណ្ឌលគិរី រៀបចំកសាងសំណុំរឿងចាត់ការបន្តតាមនីតិវិធីច្បាប់៕
ដោយ៖កូឡាប