បាត់ដំបង៖ក្រុមហ៊ុននាំអង្ករចេញទៅក្រៅប្រទេស បានត្រៀមរួចជាស្រេច និងមានអង្ករគ្រប់គ្រាន់ ក្នុងការនាំចេញប្រភេទអង្ករស បន្ទាប់ពីរាជរដ្ឋាភិបាលអនុញ្ញាតឡើងវិញ កាន់តែធ្វើឲ្យការនាំអង្ករចេញ របស់ខេត្តបាត់ដំបង នឹងមានភាពល្អប្រសើរឡើង។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង បានប្រាប់តាមទូរស័ព្ទកាលពីថ្ងៃទី១៩ ខែឧសភា ឆ្នាំ២០២០ថា ទោះបីជាបច្ចុប្បន្នជំងឺកូវីដ១៩ នៅតែបន្តធ្វើឲ្យពិភលោក មានការព្រួយបារម្ភ និងមានការប្រុងប្រយ័ត្ន តែពលរដ្ឋនៅតែបន្តធ្វើអាជីវកម្មរបស់ខ្លួន ដែលមានទាំងវិស័យឧស្សាហកម្ម កសិកម្មនិងការនាំចេញជាដើម ក្នុងនោះខេត្តបាត់ដំបង ក៏មានការនាំចេញអង្ករ ទៅក្រៅប្រទេសផងដែរ។
លោកបានបន្តថា ចំពោះខេត្តបាត់ដំបង ក្នុងមួយឆ្នាំៗ អាចផលិតអង្ករបានជាង១លានតោន ហើយអាចមានសមត្ថភាព នាំចេញគ្រប់ពេល ឲ្យតែមានការអនុញ្ញាត ពីរាជរដ្ឋាភិបាល ហើយសម្រាប់ខេត្តបាត់ដំបងនេះ ក៏មានក្រុមហ៊ុនចំនួន១៥ កំពុងធ្វើអាជីវកម្ម លើការងារនាំចេញ ខណៈមានរោងម៉ាស៊ីនរាប់រយកន្លែង កំពុងធ្វើអាជីវកម្ម កិនស្រូវនៅក្នុងខេត្ត។
ពាក់ព័ន្ធនឹងតម្លៃស្រូវវិញ មន្ទីរជំនាញ បានណែនាំដល់ម្ចាស់រោងម៉ាស៊ីននានា ទទួលទិញស្រូវរបស់ពលរដ្ឋ ត្រូវសរសេរតម្លៃប្រភេទស្រូវនីមួយៗឲ្យបានត្រឹមត្រូវ និងច្បាស់លាស់ ដាក់នៅខាងមុខ ដើម្បីឲ្យពលរដ្ឋបានដឹង។ សុំស្នើដល់កសិករ ត្រូវស្ដាប់តាមការណែនាំរបស់មន្ត្រីជំនាញ ក្នុងការបង្កបង្កើនស្រូវនេះ ឲ្យស្របតាមតម្រូវការទីផ្សារ ក៏ដូចជាការដាក់ជីគីមី ឲ្យបានតាមស្ដង់ដារបច្ចេកទេស ដើម្បីឲ្យអង្ករមានគុណភាពល្អ ងាយស្រួលក្នុងការរកទីផ្សារទៅក្រៅប្រទេស ។
គួរបញ្ជាក់ថា បន្ទាប់ពីប្រកាសមួយរយៈក្នុងការនាំអង្ករសទៅក្រៅប្រទេស ដោយសារវិបត្តិជំងឺកូវីដ១៩ រាជរដ្ឋាភិបាលក៏អនុញ្ញាតឲ្យនាំចេញឡើងវិញ ចាប់ពីថ្ងៃទី២០ ខែឧសភា ឆ្នាំ២០២០ ប៉ុន្តែការបិទមិនឲ្យនាំចេញអង្ករស រយៈពេលខ្លីនេះ មិនមានផលប៉ះពាល់ដល់ក្រុមហ៊ុន នាំចេញអង្ករនៅក្នុងខេត្តនោះទេ ព្រោះពួកគេក៏អាចនាំអង្ករប្រភេទក្រអូបបានដែរ៕
ដោយ៖អ៊ុងសារុំ
