បាត់ដំបង៖កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស២នាក់និងម្នាក់ទៀតចាប់តាមដីកា ជួញដូររក្សាទុកនិងថ្នាំម៉ាទឹកកក៣ថង់ ម៉ូតូ២គ្រឿង សម្ភារៈពាក់ព័ន្ធមួយចំនួន កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅថ្ងៃទី១៩ខែឧសភាឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពី ថ្ងៃទី១៨ និង១៩ខែឧសភាឆ្នាំ២០២០ នៅចំណុចថ្មគោលនិងស្រុករតនមណ្ឌលខេត្តបាត់ដំបង។
លោកសុខ និមលនាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ ដែលចាប់ឃាត់ខ្លួន ករណីទី១ ឈ្មោះរិន ចាន់ណានភេទប្រុស អាយុ៣៣ឆ្នាំរស់នៅក្រុមទី៥ ភូមិសំរោង ឃុំតាមឺន ស្រុកថ្មគោល ខេត្តបាត់ដំបងនិងឈ្មោះរិន ពិសិដ្ឋ ភេទប្រុស អាយុ៣០ឆ្នាំ រស់នៅក្រុមទី៥ ភូមិសំរោង ឃុំតាមឺន ស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៣ថង់ ម៉ូតូ២គ្រឿង សម្ភារមួយចំនួនទៀតហើយចាប់ឃាត់ខ្លួនកាលពីម៉ោង១៥និង១០នាទីថ្ងៃទី១៨ ខែឧសភា ឆ្នាំ២០២០ នៅចំណុចក្រុមទី៣៤ ភូមិគោកក្ដូច ឃុំតាពួង ស្រុកថ្មគោល ខេត្តបាត់ដំបង។ ករណីទី២ ឈ្មោះឆេង ឈានភេទប្រុស អាយុ១៨ឆ្នាំ រស់នៅភូមិស្ដៅ ឃុំស្ដៅ ស្រុករតនមណ្ឌល ខេត្តបាត់ដំបង។ ជនសង្ស័យរូបនេះ កម្លាំងចាប់តាមដីកាបង្គាប់ឲ្យនាំខ្លួន លេខ២៣៤ត ព្រចុះថ្ងៃទី២៥ ខែមីនា ឆ្នាំ២០២០ របស់លោករ័ត្ន ស៊ីថា ប្រធានចៅក្រមជំនំជម្រះនៃសាលាដំបូងខេត្តបាត់ដំបង ពីបទជួញដូរ ដោយខុសច្បាប់នូវសារធាតុញៀន ដែលប្រព្រឹត្តនៅចំណុចភូមិស្ដៅ ឃុំស្ដៅ ស្រុករតនមណ្ឌល ខេត្តបាត់ដំបង កាលពីថ្ងៃទី២៨ ខែសីហា ឆ្នាំ២០១៨ មួយករណី ហើយចាប់ខ្លួន បានកាលពីវេលាម៉ោង១០និង០០នាទី ថ្ងៃទី១៩ ខែឧសភា ឆ្នាំ២០២០ នៅចំណុចភូមិដង្គត់ ឃុំស្ដៅ ស្រុករតនមណ្ដល ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយ កម្លាំងប៉ូលិសស្រុក ចុះបង្ក្រាបបានករណីទាំង២នេះ ហើយចាប់ឃាត់ខ្លួនជនសង្ស័យ៣ក់ និងវត្ថុតាងបានភ្លាមៗ ជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿង បញ្ជូនជនសង្ស័យនិងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី១៩ ខែឧសភា ឆ្នាំ២០២០ហើយ៕
ដោយ៖អ៊ុងសារុំ