ភ្នំពេញ៖ មានករណីផ្ទុះអាវុធចំនួន១គ្រាប់បង្កឲ្យមានការភ្ញាក់ផ្អើលទាំងអ្នកកាសែតនិងសមត្ថកិច្ច ហេតុការណ៍នេះនៅវេលាម៉ោង១ និង៣០នាទីរំលងអធ្រាត្រ ឈានចូលថ្ងៃទី២០ខែ ឧសភា ឆ្នាំ២០២០ តាមបណ្តោយផ្លូវព្រះមុន្នីរ៉េត ដែលស្ថិតក្នុងសង្កាត់ អូឬស្សី២ ខណ្ឌ៧មករា។
យោងតាមប្រភពពីសមត្ថកិច្ចដែលល្បាតតាមមូលដ្ឋាននៅកន្លែងកើតហេតុបានឲ្យដឹងថា មុនពេលមានហេតុការណ៍បាញ់បោះយ៉ាងសេរីបែបនេះ គឺមានរថយន្តម៉ាក toyota Lang Cruiser ពណ៌ស ស៊េរីទំនើប១ គ្រឿង មិនចាំផ្លាកលេខ បានធ្វើដំណើរក្នុងទិសដៅពីលិចមកកើតយ៉ាងលឿន ពេលដែលមកដល់ចំណុចកើតហេតុ រថយន្តបង្កខាងលើបានបើកកញ្ចក់ឡាន រួចហូតកាំភ្លើងបាញ់១គ្រាប់ឡើងលើ រួចក៏បានបន្តដំណើរជិះចេញពីកន្លែងកើតហេតុបាត់ស្រមោល។ ប្រភពដដែលបានបន្តទៀតថា ជនបង្កមិនបានស្គាល់អត្តសញ្ញាណទេ មិនដឹងថាជាមនុស្សប្រុស ឬស្រី និងជាជនជាតិអ្វីនោះទេ។
ក្រោយពេលកើតហេតុសមត្ថកិច្ចមូលដ្ឋានបានរកសម្បកកាទូស្ស ដើម្បីធ្វើការស្រាវជ្រាវបន្ត៕
ដោយ៖សាម៉េត
