បុរសជនជាតិអូស្ត្រាលីម្នាក់ដែលបានធ្វើសកម្មភាពខ្លួនឯង ដើម្បីជួយរំដោះត្រីបាឡែនចេញពីមង បាននិយាយថា គាត់ត្រូវបានអាជ្ញាធរផាកពិន័យដោយសារតែធ្វើសកម្មភាពសង្គ្រោះ។
ត្រីបាឡែនជាប់មង ត្រូវបានគេប្រទះឃើញនៅក្នុងទឹក នៅសមុទ្រ Gold កាលពីថ្ងៃអង្គារ បណ្តាលឲ្យមានការស្នើអន្តរាគមន៍ពីអាជ្ញាធរ។
ប៉ុន្តែ មិនមានការឆ្លើយតបណាមួយពីអាជ្ញាធរសោះ បន្ទាប់ពីរយៈពេល ១ម៉ោង ហើយបុរសម្នាក់ក៏បានចាប់ផ្តើមធ្វើការសង្គ្រោះត្រីនោះដោយខ្លួនឯង ដោយគាត់បានចេញទូករបស់គាត់ និងបានហែលទៅកាន់ត្រូបាឡែន និងធ្វើការដោះមងចេញដែលជាប់នៅព្រុយរបស់វា។
បុរសរូបនោះបានថ្លែងប្រាប់សារព័ត៌មានថា នៅពេលគាត់ត្រឡប់មកកាន់ច្រាំងវិញ គាត់ត្រូវបានមន្ត្រីធ្វើការផាកពិន័យ។
គេមិនបានដឹងច្បាស់លាស់ពីការផាកពិន័យនោះទេ ប៉ុន្តែរដ្ឋ Qeeunland នឹងធ្វើការផាកពិន័យដល់អ្នកទាំងឡាយណាដែលរំខាន់ទៅដល់ទ្រព្យសម្បតិ្តក្រុមប្រឹក្សា រួមមានការចូលជិត ត្រីបាឡែនជាដើម។
បុរសសង្គ្រោះត្រីបាឡែនរូបនោះ បានប្រាប់ថាគាត់ឈ្មោះ Django។ គាត់បានថ្លែងប្រាប់សារព័ត៌មានអូស្ត្រាលី ABC ថា “ខ្ញុំគ្រាន់តែចង់រំដោះត្រីបាឡែនចេញពីមងប៉ុណ្ណោះ”។ គាត់មានកូនកាំបិត ប៉ុន្តែគាត់គ្រាន់តែដោះមងចេញពីព្រុយត្រីបាឡែនប៉ុណ្ណោះ។
សូមបញ្ជាក់ថា ការប្រើប្រាស់មងត្រីឆ្លាមនៅជុំវិញសមុទ្រអូស្ត្រាលីមានភាពចម្រូងចម្រាស់ ដោយសារតែការរាយមងនោះប៉ះពាល់ទៅដល់សត្វដទៃ។
កាលពីឆ្នាំមុន មានត្រីបាឡែនយ៉ាងតិច ៥ក្បាលបានជាប់មងរបស់អាជ្ញាធរ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC