ប្តីប្រពន្ធជនជាតិចិនមួយគូ ដែលកូនប្រុសពួកគេត្រូវបានគេចាប់ពង្រត់យកទៅកាលពីឆ្នាំ ១៩៨៨ ពេលនេះបានជួបជុំនឹងកូនប្រុសវិញហើយ បន្ទាប់ពីបែកគ្នាអស់រយៈពេល ៣២ឆ្នាំ។
កុមារ Mao Yin ត្រូវបានចាប់យកទៅ នៅពេលគាត់មានអាយុត្រឹម ២ឆ្នាំ ខណៈពេលដែលឪពុកគាត់បានយកទឹកនៅសណ្ឋាគារដើម្បីឲ្យគាត់ផឹក។
ពេលបាត់ខ្លួន ឪពុកម្តាយគាត់បានខិតខំស្វែងរកគាត់ក្នុងប្រទេស ហើយម្តាយគាត់បានចែកខិតប័ណ្ឌអស់ជាង ១០០.០០០សន្លឹក ដើម្បីផ្សព្វផ្សាយរកកូនប្រុស។
គ្រួសារនេះ បានធ្វើការជួបជុំគ្នាឡើងវិញ នៅក្នុងសន្និសិទដែលរៀបចំឡើងដោយប៉ូលិស កាលពីថ្ងៃចន្ទដើមសប្តាហ៍នេះ ហើយកូនប្រុសពួកគេបច្ចុប្បន្នមានអាយុ ៣៤ឆ្នាំ។ កូនប្រុសនោះបាននិយាយថា លោកមានគម្រោងចំណាយពេលវេលាឲ្យច្រើនដើម្បីនៅជាមួយឪពុកម្តាយ។
អ្នកស្រី Li Jingzhi ដែលជាម្តាយរបស់ក្មេងប្រុសបាត់ខ្លួនអស់ ៣២ឆ្នាំ បាននិយាយថា “ខ្ញុំសូមអរគុណទៅដល់មនុស្សរាប់ម៉ឺននាក់ដែលបានជួយពួកយើង”។
តើមានអ្វីកើតឡើងចំពោះកុមារ Mao Yin?
គាត់បានកើតថ្ងៃទី ២៣ ខែកុម្ភៈ ឆ្នាំ ១៩៨៦។ នៅក្នុងកិច្ចសម្ភាសន៍ជាមួយនឹងសារព័ត៌មាន South China Morning កាលពីខែមករា មុនពេលគាត់ត្រូវបានរកឃើញ ម្តាយរបស់គាត់បានហៅគាត់ថា ជាក្មេងប្រុសគួរឲ្យស្រឡាញ់ ឆ្លាត និងមានសុខភាពល្អ។
នៅថ្ងៃទី ១៧ ខែតុលា ឆ្នាំ ១៩៨៨ ឪពុកគាត់ឈ្មោះ Mao Zhenjing បានយកគាត់ពីកន្លែងក្មេងលេងកម្សាន្តមកផ្ទះវិញ ក្នុងទីក្រុង Xian ស្ថិតក្នុងខេត្ត Shaanxi។
ក្មេងប្រុសនោះបានសុំទឹកផឹក ដូច្នេះពួកគេបានឈប់នៅមុខច្រកចូលសណ្ឋាគារមួយ។ ខណៈដែលឪពុកគាត់កំំពុងផ្តុំទឹកក្តៅឲ្យត្រជាក់ គាត់ក៏បានក្រឡេកមើលទៅកូនប្រុស ហើយឃើញមានគេចាប់ឆក់យកទៅ។
ប្តីប្រពន្ធនោះបានស្វែងកូនប្រុសនៅក្នុងទីក្រុង Xian និងបានដាក់បដាផ្សព្វផ្សាយជាច្រើន។
អ្នកស្រី Li Jingzhi បានឈប់ធ្វើការ ដើម្បីស្វែងរកកូនប្រុស ដោយបានចែកខិតប័ណ្ឌជាង ១០០.០០០សន្លឹកនៅក្នុងខេត្ត និងក្រុងចំនួនជាង ១០ ប៉ុន្តែការប្រឹងប្រែងនោះមិនមានផ្លែផ្កាឡើយ។
អស់រយៈពេលជាច្រើនឆ្នាំ អ្នកស្រីបានចេញមុខតាមកញ្ចក់ទូរទស្សន៍ជាច្រើន ដោយស្នើឲ្យមានការជួយរកកូនប្រុសគាត់។
ក្នុងឆ្នាំ ២០០៧ អ្នកស្រីបានចាប់ផ្តើមធ្វើជាអ្នកស្ម័គ្រចិត្តជាមួយនឹងក្រុមការងារដែលមានឈ្មោះថា “កូនត្រឡប់មកផ្ទះវិញ (Baby Come Back Home)” ដើម្បីជួយឪពុកម្តាយណាដែលបាត់កូន។
បើតាមប្រព័ន្ធផ្សព្វផ្សាយ គាត់បានជួយក្មេងចំនួន ២៩នាក់ឲ្យជួបជុំគ្រួសារពួកគេវិញ ខណៈដែលកូនប្រុសគាត់ខ្លួនឯង កំពុងតែនៅបាត់ខ្លួន។ គាត់បន្តធ្វើកិច្ចការជាមួយក្រុមនោះ។
តើលោក Mao Yin ត្រូវគេរកឃើញដោយរបៀបណា?
កាលពីខែមេសា ប្រព័ន្ធផ្សព្វផ្សាយបាននិយាយថា ប៉ូលិសទទួលបានតម្រុយពីបុរសម្នាក់មកពីខេត្ត Sichuan ចំងាយប្រមាណ ១.០០០គីឡូម៉ែត្រពីទីក្រុង Xian ដែលបានសុំកូនយកមកចិញ្ជឹមអស់ជាច្រើនឆ្នាំមកហើយ។
ប៉ូលីសបានរកឃើញ អ្នកដែលត្រូវគេសុំយកមកចិញ្ជឹមដែលឥឡូវនេះ មានអាយុ ៣៤ឆ្នាំ ហើយមានការធ្វើតេស្តលើ DNA ដើម្បីចង់ដឹងថាតើគាត់មានពាក់ព័ន្ធនឹងលោក Mao Zhengjing និងអ្នកស្រី Li Jingzhi ឬយ៉ាងណា។ លទ្ធផលពិនិត្យបង្ហាញវិជ្ជមាន មានន័យថាពួកគេពាក់ព័ន្ធនឹងគ្នា។
លោក Mao Yin ដែលត្រូវបានគេដាក់ឈ្មោះសារថ្មីថា Gu Ningning មានមុខរបបជាអ្នកដឺគ័រផ្ទះ។ លោកនិយាយថា លោកមិនទាន់ប្រាកដពីអនាគតនៅឡើយទេ ប៉ុន្តែគាត់នឹងចំណាយពេលនៅជាមួយឪពុកម្តាយ។
ប៉ូលិសបញ្ជាក់ថា កុមារ Mao Yin ត្រូវបានគេលក់អោយប្តីប្រពន្ធមួយគូ ក្នុងតម្លៃ ៨៤០ដុល្លារ។
អ្នកស្រី Li Jingzhi ត្រូវបានគេប្រាប់ព័ត៌មានពីការរកឃើញកូនប្រុសអ្នកស្រីនៅថ្ងៃ ទិវាអ្នកម្តាយក្នុងប្រទេសចិន។ គាត់ថា វាគឺជាកាដូរដ៏ពិសេសបំផុតសម្រាប់គាត់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
