ការធ្វើអាជីវកម្មតាមបែបបច្ចេកវិទ្យាមានសារ:សំខាន់បំផុត ក្នុងបរិបទសាកលភាវូបនីយកម្មនេះ ពីព្រោះគេអាចធ្វើអាជីវកម្ម រឺមុខជំនួញបានច្រើនយ៉ាង ចំណេញពេលវេលា មានទំនាក់ទំនងទីផ្សាររហ័ស មានការទូទាត់ត្រឹមត្រូវ ជាមួយនិងការធានានូវគុណភាពទំនិញ។ នេះបើយោងតាម លោកស្រី ទូច សុជាតិតា តំណាងប្រចាំកម្ពុជានៃសហគ្រាសសង្គម Womentum។
លោកស្រីមានប្រសាសន៍បែបនេះក្នុងជំនួបការងារជាមួយ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចមប្រសិទ្ធទេសរដ្ឋមន្រី្ត រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក្នុងគោលបំណងដើម្បីពិនិត្យមើលភាពទំនាក់ទំនងគ្នា និងកិច្ចការមួយចំនួនដែលត្រូវសហការ ក្នុងវិស័យបច្ចេកវិទ្យាសម្រាប់ពង្រឹងសហគ្រិនភាពជាស្ត្រី។
លោកស្រី ទូច សុជាតិតា តំណាងប្រចាំកម្ពុជានៃសហគ្រាសសង្គម Womentumថ្លែងថា សហគ្រាសសង្គមមួយ ឈ្មោះ Womentumទើបត្រូវបង្កើតឡើងនៅកម្ពុជា ដែលធ្វើការងារផ្តោតការយកចិត្តទុកដាក់ទៅលើការជុំរុញភាពជាសហគ្រិនរបស់ស្ត្រីក្នុងវិស័យបច្ចេកវិទ្យា ។
ក្នុងនោះថ្មីៗនេះ Womentumទើបត្រូវបានបង្កើតនូវកម្មវិធីមួយឈ្មោះថា៖ Women Tech Media ក្នុងគោលបំណងផ្សព្វផ្សាយឲ្យមានការយល់ដឹងនូវការប្រើប្រាស់បច្ចេកវិទ្យា និងគោលនយោបាយរបស់រាជរដ្ឋាភិបាលក្នុងការលើកស្ទួយអាជីវកម្មរបស់សហគ្រាសខ្នាតតូច និងមធ្យម ឆ្ពោះទៅសេដ្ឋកិច្ចទីផ្សារឌីជីថល។
លោកស្រី ទូច សុជាតិតា បានជម្រាបជូនពីប្រវត្តិនៃការបង្កើតសហគ្រាសសង្គម Womentumនៅកម្ពុជា ដោយទទួលបទពិសោធន៍ពីស្ថាបនិកម្នាក់នៅប្រទេសសឹង្ហបុរី ដែលសហគ្រាសរបស់គេបានបង្កើតឡើងតាំងពីឆ្នាំ២០១៤ ដោយយកទស្សន:វិស័យ នៃការដឹកនាំផ្តោតជាសំខាន់ទៅលើការប្រើប្រាស់បច្ចេកវិទ្យា ជាពិសេស ជួយជំរុញភាពជាសហគ្រិនរបស់ស្ត្រី ។
លោកស្រីថា៖«យើងក៏នឹងអាចឈានពីអាជីវកម្មគ្រួសារ ទៅជាអាជីវកម្មបែបស្តង់ដារ ព្រមទាំងអាចឈានដល់កំរិតសង្វាក់ផលិតកម្មសកល ដោយសារការអនុវត្តសេដ្ឋកិច្ចតាមបែបឌីជីថល រឺ ពាណិជ្ជកម្ម អេឡិចត្រូនិច (E-Commerce)នេះ» ។ ក៏ប៉ុន្តែការងារនេះ មិនមែនសាមញ្ញពេកទេ ត្រូវការបណ្តុះបណ្តាលឲ្យមានជំនាញប្រើប្រាស់ប្រព័ន្ធបច្ចេកវិទ្យាទំនើប និងសុវត្ថិភាព អាចជឿទុកចិត្តបាន ។ លោកស្រី បានសង្កត់ធ្ងន់ថា៖ មិនមែនដោយគ្រាន់តែចេះលក់ផលិតផល Live តាម Online ក្នុងបណ្តាញ Facebook និងការដឹកជញ្ជូនដល់គេហដ្ឋាន ថាជាអាជីវកម្មឌីជីថលគ្រប់ជ្រង់ជ្រោយនោះទេ ។
ដោយឡែក ជាមួយក្រសួងកសិកម្ម សហគ្រាសសង្គម Womentumរបស់លោកស្រីកំពុងសហការជាមួយក្រសួង ទាក់ទងនិងគម្រោងបង្កើត Agri-SMEs Linkage ដោយផ្តោតទៅលើផែនទីស្វែងរកទីតាំងផលិតរបស់កសិករ តើពួកគាត់ផលិតអ្វីខ្លះ ? នៅទីតាំងណាខ្លះ ? មានសង្វាក់ផលិតកម្មបែបណា ? ដើម្បីពិនិត្យលទ្ធភាពជួយពួកគាត់ក្នុងទំនាក់ទំនងលក់ផលិតផលក្នុងទីផ្សារបែបឌីជីថល ។
ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះលទ្ធផលការងារ និងគុណតម្លៃនៃការប្រើប្រាស់បច្ចេកវិទ្យាសម្រាប់អាជីវកម្មបែបឌីជីថល ដែលកំពុងមានការវិវឌ្ឍន៌រីកចម្រើនជាសាកល ។ កិច្ចការនេះទើបក្រសួងឧស្សាហកម្ម និងសិប្បកម្ម ត្រូវរាជរដ្ឋាភិបាលបានប្តូរឈ្មោះ ទៅជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៌ ដែលបានបង្កើតនូវអគ្គនាយកដ្ឋានទទួលបន្ទុកមួយ និងវិទ្យាស្ថានមួយ ដែលនឹងរួមមាន មន្ទីរពិសោធន៌ និងថ្នាលបណ្តុះបណ្តាលនៅក្នុងនោះផងដែរ។
ទាក់ទងការងារបណ្តុះបណ្តាលសហគ្រិនស្ត្រី ក្នុងវិស័យបច្ចេកវិទ្យា ក្នុងខេត្តបាត់ដំបង និងខេត្តសៀមរាប ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី បានសាទរ និងសូមឲ្យធ្វើការទំនាក់ទំនងជាមួយអគ្គនាយកដ្ឋានជំនាញរបស់ក្រសួង រួមមានអគ្គនាយកដ្ឋាន វិទ្យាសាស្ត្រ បច្ចេកវិទ្យា និងនវានុវត្តន៌ អគ្គនាយកដ្ឋានសហគ្រាសធុនតូច និងមធ្យម និងអគ្គនាយកដ្ឋានឧស្សាហកម្ម ហើយក៏សូមឲ្យមានឈ្មោះស្ត្រីក្នុងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៌ចូលរួមក្នុងវគ្គបណ្តុះបណ្តាលតាមប្រព័ន្ធ Online នោះផងដែរ ដើម្បីក្លាយជាគ្រូបង្គោលសម្រាប់បណ្តុះបណ្តាល ក្នុងក្របខ័ណ្ឌក្រសួងបន្ត ៕
ដោយ ៖ សម្ផស្ស