ភ្នំពេញ ៖ មជ្ឈមណ្ឌលសិទ្ធិមនុស្សកម្ពុជា បានចេញផ្សាយព័ត៌មានថា នៅព្រឹកថ្ងៃទី២០ ខែឧសភា ឆ្នាំ២០២០ នេះ សាលាដំបូងរាជធានីភ្នំពេញ បានបើកសវនាការលើសំណុំរឿងលោក គង់ រ៉ៃយ៉ា ខណៈលោកមិនមានវត្តមាននោះទេ។ តុលាការនឹងប្រកាសសាលក្រមរបស់ខ្លួន នៅរសៀលថ្ងៃទី១៩ ខែមិថុនា ឆ្នាំ២០២០។
នៅថ្ងៃទី២០ ខែឧសភា ឆ្នាំ២០២០ នេះ សាលាដំបូងរាជធានីភ្នំពេញនឹងបើកសវនាការលើសំណុំរឿងលោក គង់ រ៉ៃយ៉ា ជាសកម្មជនធ្វើការសង្គមត្រូវបានចាប់ខ្លួនកាលពីខែកក្កដា ឆ្នាំ២០១៩ និងចោទប្រកាន់ពីបទញុះញង់ (មាត្រា ៤៩៤ និង ៤៩៥ នៃក្រមព្រហ្មទណ្ឌ) បន្ទាប់ពីធ្វើការផ្សព្វផ្សាយលក់អាវយឺតដែលមានរូបភាពនិងសាររបស់អ្នកវិភាគនយោបាយ លោកបណ្ឌិត កែម ឡី ព្រមទាំងបង្ហោះលេខទូរស័ព្ទអ្នកបើកតាក់ស៊ីដែលអាចដឹកអ្នកដំណើរទៅកាន់ភ្នំពេញ ដើម្បីចូលរួមពិធីបុណ្យរំលឹកខួបនៃការស្លាប់របស់លោកបណ្ឌិត កែម ឡី។
លោក គង់ រ៉ៃយ៉ា ដែលឧស្សាហ៍រិះគន់បញ្ហាក្នុងសង្គម ត្រូវបានដោះលែងឱ្យនៅក្រៅឃុំបណ្ដោះអាសន្នកាលពីថ្ងៃទី២៩ ខែវិច្ឆិកា ឆ្នាំ២០១៩ ក្នុងលក្ខខណ្ឌមិនអនុញ្ញាតឱ្យចាកចេញពីប្រទេសកម្ពុជា មិនអនុញ្ញាតឱ្យផ្លាស់ប្ដូរអាសយដ្ឋានរស់នៅ និងមិនអនុញ្ញាតឱ្យធ្វើសកម្មភាពលើបណ្ដាញសង្គមនានា ពាក់ព័ន្ធនឹងបទចោទរបស់ខ្លួន។
សាលាដំបូងរាជធានីភ្នំពេញ ជនត្រូវឈ្មោះ គង់ រ៉ៃយ៉ា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។ កាលពីថ្ងៃទី១៣ កក្កដា ឆ្នាំ២០១៩ សមត្ថកិច្ចខណ្ឌសែនសុខ បានធ្វើការឃាត់ ខ្លួនឈ្មោះ គង់ រ៉ៃយ៉ា ប្រពន្ធ និងបងប្អូនសាច់ថ្លៃរបស់គង់ រ៉ៃយ៉ាចំនួន២នាក់ផ្សេងទៀត ដែលជាប់ពាក់ព័ន្ធនិងការផលិតអាវយឺតមានរូបលោកបណ្ឌិតកែម ឡី និងពាក្យស្លោក(ជូតទឹកភ្នែករួចបន្តដំណើរទៅមុខទៀត) និង (បើអ្នកមិនធ្វើអ្វីសោះ គង់តែរងគ្រោះ គ្រាន់តែមិនទាន់ដល់វេនអ្នកប៉ុណ្ណោះ) ដែលពាក្យស្លោកទាំង២ប្រយោគនោះ ត្រូវបានអាជ្ញារធរយល់ឃើញថា ជាការញុះញង់ នៅក្នុងអំឡុងពេលបុណ្យសពគំរប់៣ឆ្នាំរបស់លោកបណ្ឌិតកែម ឡី ។
អាជ្ញាធរក៏បានរឹបអូសអាវយឺតព៌ណស ដែលផលិតរួចចំនួន៧៣អាវ អាវយឺត ពណ៌ខ្មៅផលិតរួចចំនួន៨៣អាវ កុំព្យូទ័រចំនួន៣គ្រឿង និងសៀវភៅទស្សនៈ របស់បណ្ឌិត កែម ឡី មួយចំនួនធំទៀត ។ ជនត្រូវចោទឈ្មោះ គង់ រ៉ៃយ៉ា ត្រូវបានសាលាដំបូងសម្រេចឃុំខ្លួនមួយដាក់ពន្ធនាគារជាបណ្តោះអាសន្ន ប៉ុន្តែក្រោយមកក៏បានដោះលែងឲ្យនៅក្រៅឃុំវិញ ចំណែកប្រពន្ធ និងសាច់ថ្លៃមិនពាក់ពន្ធទេ ។
យុវជន គង់ រ៉ៃយ៉ា ធ្លាប់បានផ្តល់ចម្លើយនៅចំពោះមុខតុលាការថា ខ្លួនបានផលិត និងបានជួលគេឲ្យបោះពុម្ភអាវយឺត ស ខ្មៅ មានរូបលោកបណ្ឌិត កែម ឡី និងទស្សនៈរបស់គាត់(ជូតទឹកភ្នែករួចបន្តដំណើរទៅមុខទៀត)និង(បើអ្នកមិនធ្វើអ្វីសោះ គង់តែរងគ្រោះ គ្រាន់តែមិនទាន់ដល់វេនអ្នកប៉ុណ្ណោះ) នេះលក់តាមអនឡាញតាំងពីឆ្នាំ២០១៧មកម្ល៉េះ ដោយលើកទី១ បោះពុម្ភបានចំនួន ៣០០អាវ លក់អស់ ហើយលើកទី២បោះពុម្ភចំនួន២០០ អាវកំពង់លក់។
សូមបញ្ជាក់ថា កន្លងមក យុវជន គង់ រ៉ៃយ៉ា ធ្លាប់ត្រូវបានតុលាការផ្តន្ទាទោសរយៈពេល១ឆ្នាំ៦ខែម្តងរួចមកហើយ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធការប្រកាសធ្វើបដិវត្តពណ៌ តាមបណ្តាញសង្គម Facebook ៕
ដោយ៖កូឡាប
