ភ្នំពេញ៖ នាយកដ្ឋាននគរបាលព្រហ្មទណ្ឌ បានអះអាងថា បន្ទាប់ពីមានការបង្ហោះសារ ក៏ដូចជាវីដេអូឃ្លីបលើបណ្តាញសង្គម ថាមានបុរសម្នាក់អាងខ្លួនជានាយរងការិយាល័យ ដកកាំភ្លើងមកគំរាមខ្ញុំមកនោះ អគ្គស្នងការ បានចុះស្រាវជ្រាវ រហូតឈានដល់កោះហៅលោកអនុសេនីយ៍ឯក ទេព ចាន់មុនី មានតួនាទីជានាយរងផ្នែក នៃការិយាល័យឧក្រិដ្ឋវិទ្យា មកអប់រំ ណែនាំ និងដាក់ពិន័យកងកម្លាំង នៅអង្គភាពនាយកដ្ឋាននគរបាលព្រហ្មទណ្ឌ នៅថ្ងៃទី២០ ខែឧសភា ឆ្នាំ២០២០នេះ។
បើតាមផេកហ្វេសប៊ុក Nath Sovuthy បានសរសេរថា “មានបុរសម្នាក់អាងខ្លួនជានាយរងការិយាល័យ ដកកាំភ្លើងមកគំរាមខ្ញុំ”។
នាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ កាលពីថ្ងៃទី២០ខែឧសភាឆ្នាំ២០២០ បានឲ្យដឹងថា យើងខ្ញុំសូមជូនដំណឹងដល់សាធារណជន និងអ្នកនិយមប្រើប្រាស់បណ្តាញទំនាក់ទំនងសង្គម ជ្រាបថា លោកអនុសេនីយ៍ឯក ទេព ចាន់មុនី ជានាយរងផ្នែកនៃការិយាល័យឧក្រិដ្ឋវិទ្យា នៃនាយកដ្ឋាននគរបាលព្រហ្មទណ្ឌ ត្រូវបានអង្គភាពហៅមកធ្វើការអប់រំ ណែនាំ ដាក់ពិន័យកងកម្លាំង និងបានធ្វើកិច្ចសន្យាលាយលក្ខណ៍អក្សរ នៅអង្គភាព នៅថ្ងៃទី២០ ខែឧសភា ឆ្នាំ២០២០នេះ ក្រោយមានការប៉ះទង្គិចពាក្យសម្ដី ឬកាយវិការមិនសមរម្យជាមួយប្រជាពលរដ្ឋ។
ចំពោះរូបភាពដែលបានចែកចាយ នៅតាមបណ្ដាញសង្គម Facebook ដោយលាយលំជាមួយសារមិនសមរម្យមួយចំនួននោះ នាយកដ្ឋាននគរបាលព្រហ្មទណ្ឌ សូមជម្រាបជូនថា លោកអនុសេនីយ៍ឯក ទេព ចាន់មុនី គ្មានចេតនាក្នុងការយកកាំភ្លើងរបស់ខ្លួន ទៅគំរាមប្រជាពលរដ្ឋនោះទេ ពោលពេលនោះ ករណីនេះកើតឡើងគឺចំពេលដែលលោកបានយកសម្ភារ រួមទាំងអាវុធខ្លីពីក្នុងរថយន្តទៅទុកក្នុងផ្ទះតែប៉ុណ្ណោះ តែចៃដន្យក៏ជួបបញ្ហានោះតែម្តង លោកបានយកអាវុធខ្លីនោះដាក់សៀតចង្កេះបន្តការជជែកគ្នាដោយសម្តី។ តាមរូបភាពវីដេអូឃ្លីបនោះបង្ហាញថា គាត់ពុំបានយកអាវុធភ្ជង់គំរាមភាគីជម្លោះនោះទេ។
សាមីខ្លួន អនុសេនីយ៍ឯក ទេព ចាន់មុនី បានធ្វើកិច្ចសន្យាបញ្ឈប់សកម្មភាពណាមួយ ពិសេសបង្ហាញសម្ភារសឹកនៅមុខមហាជនផ្ទុយពីបេសកកម្ម ដែលអាចធ្វើឲ្យប៉ះពាល់ដល់កិត្ដិយសកងកម្លាំង និងមហាជនមានការយល់ច្រឡំ។
សូមជម្រាបថា លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ តែងតែក្រើនរំលឹក និងដាស់តឿនមន្ដ្រីនគរបាលទាំងអស់ ចំណុះអង្គភាពនាយកដ្ឋាននគរបាលព្រហ្មទណ្ឌ មិនត្រូវប្រព្រឹត្តទង្វើណាដែលផ្ទុយពីច្បាប់ ឬវិន័យកងកម្លាំងនោះឡើយ ប្រសិនបើរកឃើញថា មន្ដ្រីណាប្រព្រឹត្តខុស នឹងមិនអត់ឱនឲ្យនោះឡើយ។
នាយកដ្ឋាននគរបាលព្រហ្មទណ្ឌ សូមអរគុណដល់ប្រជាពលរដ្ឋ អ្នកប្រើប្រាស់បណ្ដាញសង្គម Facebook ដែលបានផ្ដល់ព័ត៌មាន និងរាយការណ៍ព័ត៌មានផ្សេងៗ មកកាន់នាយកដ្ឋានយើងខ្ញុំ៕
ដោយ៖កូឡាប
